ابنى يسرقنا و محترف كذب

[غير مسجل]

السلام عليكم و رحمة الله و بركاته
انا عندى 3 أولاد الوسطانى فيهم كان عنده فرط حركة الكبير 15 سنة و الوسطانى 13 سنة و الصغير 10 سنين
عندى مشاكل معاهم فى انهم مبيسمعوش الكلام و مهملين فى كل حاجة و مفسدين لكل حاجة يعنى بيخربوا اى حاجة و مبيهمهمش
لكن مصيبتى الكبيرة فى الوسطانى
من صغره و هو بيحب الظهور و فعلا ملفت للانتباه و كان دايما بيحب يبان قدامى انه احسن اخواته و كان بيطلع يا الاول يا التانى
يعنى كان واخد الانتباه من اخواته كلهم و كل الناس قرايبنا و معارفنا كانوا بيحبوه
لكن كان بيفضل الأغراب على اخواته
كنت اشترى لهم التلاتة حاجات ياخد حاجته و ياخد حاجة اخواته من وراهم يديها لأصحابه
لو اخوه و ابن عمه اتخانقوا يقف فى صف ابن عمه حتى و لو هو الغلطان و ممكن يأذى أخوه
كنت دايما أقوله ان اخواته بيحبوه و لازم يحبهم اكتر من اى حد لكن هو كان انانى جدا
المصيبة الكبيرة بدأت من كام شهر
اهمال فى الدروس و المدرسة و اكتشفنا انه مبيحضرش دروس القرآن أتاريه بيروح البارك و اغرى اخوه و بقى بيروح معاه
اكتشفنا كده و اتعاقب هو و اخوه على الكدب و على تفويت حصص القرآن
بعدها بدأت فلوس تختفى منى و من والده مبالغ كبيرة فى المرة متقلش عن 200 جنيه
لقيت فى دولابه مرة فلوس منها فهمتهم من غير ما يحسوا ان انا عارفة كل حاجة و فاهمة اللى بيعملوه و كنت اكتشفت انهم بيروحوا سايبر و لما زنقت عليهم
جه و قالى ان أخوه بيجيب فلوس مش عارف منين و انه هو اللى بياخده للسايبر و انه تاب و مش حيعمل كده تانى
كلمت اخوه الكبير اعترف بمرواح السايبر لكن قال ان الوسطانى هو السبب و حلف انه مخدش فلوس
قبلها عمل مشكلة فى المدرسة و اتفصل عشان شتم صاحبه بلفظ بزىء عمرى ما اتخيلت ان ابنى يقوله
و كدب عليا و قالى قصة متلفقة عن انه اتظلم و انه معملش حاجة غلط و لما كلمت المدرسة اكتشفت انه كدب فى كدب
و كل مرة الفلوس تختفى الكل ينفى انه اخدها و هو يحلف انه ميعرفش حاجة
لغاية ما اخوه الصغير عنيه و جعته و كان باباه مشغول جدا و يعرف دكتور العيون جنبنا كلمه فى التليفون و بعته مع اخوه الوسطانى للدكتور يكشف عليه
رجع قالنا الدكتور قال انه محتاج جلسات على عنيه مع روشتة الدوا جلستين فى الاسبوع و انه حيروح معاه
و طبعا كل جلسة بمبلغ و راحوا جلستين و فى التالتة اتصل باباه يسأل الدكتور اكتشف ان مفيش جلسات و انه مقلوش يروحله تانى
الصغير اعترف علطول انهم و هما راجعين البيت الوسطانى قاله انه يسكت و هو حيقول حاجات يوافق عليها و كانوا الوقت ده بيروحوا السايبر و البارك
طبعا اكتشفنا انه هو اللى بيسرق منى و من باباه سرق مننا فلوس عدت الألفين جنيه فى فترة قليلة
غير طبعا اكتشفنا ان كل كلامه كدب و ان الدرس ارخص من ما بيقول و انه حصتين بس و التالتة بيروح يلعب فيها
و خد فصل تانى من المدرسة عشان ظبطوه بيولع باسبراى و طبعا حاكالى الموضوع كدب و المدرسة كلها كانت بتتكلم عن الفلوس الرهيبة اللى معاه
الخلاصة ابنى سارق و كاذب و بيسرق و يكدب عادى جدا بدون ما عنيه ترمش و لا كأنه بيعمل اى حاجة غلط
و عنده استعداد يحلف 100 يمين كاذب بدون أى تغير لا فى ملامحه و لا شكله و يصر على كذبه بطريقة فظيعة و يألف الكدبة فى ثانية
انا تعبت معاه
باباه كلمه فى الحرام و الحلال و قاله ان ربنا بيقبل التوبة و انه يتوب و احنا نسامحه لأن التائب ذنوبه بتتحول لحسنات و اتفق معاه
لكن أنا شايفاه لسة كداب و سارق و مبقتش طايقة اشوفه قدامى
و اسلوبه الوحش مع اخواته بيكرهنى فيه اكتر و خصوصا انه كتير اتسبب فى أذيتهم
و خايفة يجراله حاجة يموت و هو انسان وحش كده و مذنب تبقى آخرته وحشة
انا طبعا مش بكرهه بجد لكن مش طايقاه قدامى و عارفة انه بيمثل علينا
اعمل ايه فيه و اعالجه ازاى
وديته لدكتور نفسى لكن كذب برضه و مفيش فايدة
على فكرة هو مش عشان الوسطانى كان مظلوم بل العكس هو اكتر واحد كان مدلع فى اخواته فى البيت و من القرايب و الصحاب و الكل يشهد بكده

ربنا يجازيكم خير دلونى اعمل ايه

[فريق استشارات سرك فى بير(الأخوات)]

رد: ابنى يسرقنا و محترف كذب

الحمد لله والصلاة والسلام على رسول الله صلى الله عليه وسلم ,أما بعد,
مرحبا بكِ أختنا الفاضله ,ولاتحزنى أختى بإذن الله سيكون هناك حل لمشكلة ابنك ولكن يجب أن نضع أيدينا على الأسباب التى جعلته يمد يده :
يسرق الطفل الصغير لعدة أسباب : 1- يسرق لأنه لا يفرق بين الاستعارة والسرقة وأن مفهوم الملكية الخاصة غير واضح عنده .
2- البعض يسرق بسبب الحرمان من أشياء تتوفر للآخرين .
3- للانتقام من الوالدين أو لفت انتباههما .
ماذا نصنع ؟العلاج :

1- التزام الهدوء : بدلاً من التوبيخ والتعيير حافظ على الهدوء فالموقف فرصة لأن تعلم ابنك . وإسأليه ,هل مصروفك لايكفيك يابنى .؟ هل تشتهى شىء ولم أحضره لك .؟

2- وعظ الطفل : بيِّنى له حكم السرقة في الإسلام ، وأن الله قال في كتابه العزيز : ( والسارق والسارقة فاقطعوا أيديهما .. ) وأن النبي صلى الله عليه وسلم أخذ العهد في بيعة النساء أن لا يسرقن كما قال الله تعالى : ( ولا يسرقن .. ) . وذكِّر طفلك بمراقبة الله عز وجل . قال الله تعالى : ( وهو معكم أينما كنتم .. ) وقال عز وجل : ( والله شهيد على ما تعملون ) . وقل له إن الله يراك ولو سرقت خفية بعيداً عن نظر الناس لأنه تعالى ( يعلم السر وأخفى ) .
3- واجه الطفل : ينبغي أن تواجهى الطفل بالسبب والباعث له على السرقة كأن تقول له أنا أعرف أنك أخذت النقود من درج المكتب وأنت أخذتها لأنك تشعر بالحاجة إليها ولكن سرْقتها ليست الحل ، المرة القادمة إذا رغبت في شيء تحدث معي أولاً ، أنا أعرف بأنك تحب أن تكون أميناً ، وحاول أن تضع الطفل موضع الآخرين لو كنت مكان الشخص الذي سُرقت منه النقود كيف ستشعر ؟
4- تشديد الجزاءات : كأن يطلب من الطفل إرجاع الشيء المسروق مع الاعتذار ، أو تعويض قيمته في حال إتلافه مع الحرمان من الامتيازات في المنزل .
5- مراقبة الطفل وعدم إغفاله لفترات طويلة .

6-حاولى أن تكونى صديقه لإبنك يااختى ,وضعى فى الحسبان أن من شب على شى شاب عليه ,فيجب أن نعالجه الآن ونصبر عليه حتى لايؤثر عليه اصحاب السوء ويصل الأمر الى أن يدمن المخدرات أو يكون والعياذ بالله من مرتادوا المقاهى وأماكن اللهو ,وان شاء الله سيعود إليكِ ابنك بكل الصفات التى تتمنيها فيه ولكن ملحوظه بعد أن يتوب عن هذه العادات السيئه إياكِ أن تذكريه بما كان يفعل ,وتجاهلى الموضوع تماما واحفظى سره ,وان شاء الله لن ينسى هو لكِ هذا وستنشأ الموده بينكما وسيحاول أن يرضيكى فى أى وقت ,شفاه الله وعافاه وأعانك انتى ووالده على انتشال فلذة كبدكم من شرور الدنيا ونسأل الله لولدكم الصلاح والهدايه وأن يكون بار بكما ,
وبالله التوفيق .

والله الهادي إلى سواء الصراط .