(( كـــــــــــــــ ياااااما كان ـــــــــــــــان ))

[أبويحيى]

:LLL:

الحقيقة فكرت كتير قبل كتابة هذا الموضوع ... لسببين

الأول : لإن الموضوع ده من أكتر المشاكل اللى بعانى منها ... مش معنى كده إنها موجوده فيا ... لكن بعانى منها لما بشفها فى حد امامى ...

الثاني :إن ده آخر موضوع فى سلسلة (( أنا راجع )) اللي بدأناها من فترة عن الانتكاس اسبابه وعلاجه ... وهيكون في فهرس ان شاء الله فى آخر الموضوع به كل المواضيع السابقة ... وخايف أن يكون فى أخ حبيب لينا أو أخت منتكسه ومتكنش رجعت وتكون لسه مصممه تكمل على نفس الطريق ... نسأل الله ان يوفقنا لما يرضيه عنا ...

هسألكم سؤال علشان نوصل لأصل المشكلة ...

كلنا عارفين إن فى أوائل التسعينات كان فى صحوة إسلامية كبيرة ... وعلى الرغم مما أخذ عليها من مآخذ إلا إن أكيد كان فى عدد كبير من الملتزمين ... طيب ... العدد ده راح فين ... ؟؟؟

كام مرة بتشوف واحد ملتزم كبير فى السن مثلا فى الأربعينات وتجده بيدخن ... أو بناته متبرجات ... وهو بلحيه خنافس ... وبيصلى فى المسجد فى المناسبات ...؟؟؟

كام مرة بتشوفي واحدة لابسه نقاب نينجا ... وعباية multicolour وممكن تلاقيها بتطلع مصايف مع عيلتها عادى وبتكلم الأجانب عنها عادى ... وولادها برده عادى اغانى و مفيش عندها مشكلة ...؟؟؟

باختصار كام مرة بتشوف واحد راح منه كل معانى الالتزام عدا بقايا لحية ... وواحده ذهبت منها جميع معانى الالتزام عدا نقاب ... يعنى بقى ملتزم صورة وشكل ؟؟

اليوم بضع إيدى معاكم على المشكلة ...

لازم نرجع بالأيام للخلف قليلا ... ونشوف إيه اللى حصل ... تعالوا نشوف النموذجين دول ... وشوف إنت وإنتى فى انهى مرحلة دلوقتى ... علشان تلحق نفسك قبل ما تبقى في يوم ما كان ياما كان ...

كان ياما كان فى شاب روش طحن ... مش سايب معصية إلا مبيعملها ... من عيله فوق المتوسطة ... وفي يوم مات أعز اصدقائة بينما كانوا بيشدوا مع بعض بالعربيات ... عربيته اتقلبت واتحرقت امام عينه ...
صاحبنا حس إن الحياة فيها معانى كتير مكانش شايفها ... بدأ صاحبنا يقرب من ربنا يوم بعد يوم .... لكن صاحبنا كان يفتقد شئ مهم جدا ... يفتقد الصحبة ... هو نفسه يلتزم بس حاسس إن في فرق كبير بينه وبين الملتزمين ... حتى لما بيكون معاهم مبيبقاش مبسوط أوى ... بيقارن دايما بين جلساته معاهم بعد الالتزام وجلساته مع أصحابه قبل الالتزام ...

المهم صاحبنا تقدم فى الالتزام بالفعل ... وبقى من المجتهدين فى الدعوة وطلب العلم ... وخلص الشاب كليته ... وبدأ يشتغل فى شغل تبع العائلة ... واتجوز بنت عمه ... هى كانت مش ملتزمه ... بس كان بيقول إنها يجى منها و عندها قابليه للالتزام ... و مرت الأيام وصاحبنا مع ضغط الشغل والجواز و بعد ما ربنا رزقه بأول ولد ... بدأ صاحبنا يبعد يوم بعد يوم عن الصحبة اللى أصلا كانت علاقته بيهم ضعيفه .... مش قادر يفتكر كام مرة اتصلوا بيه علشان يحضر معاهم الدروس ويطلع معاهم فى الدعوة ... كتير أوى ... لكن المشكلة مكانتش فى البعد بس ... فجلسات العائلة اللى كانت شبه أسبوعية كانت ليها تأثير كبير عليه ... ولاد عمه و ولاد عماته وزوجاتهم .... ده غير الرحلات فى الصيف ... من الآخر صاحبنا اندمج تانى مع الجو ده ... وطبعا هو كده كل اللى حوليه سعيد ... ومتسألش بقى كام صلوات جماعة ضاعت ... وكام سنن اتنست ... وبقى صاحبنا مجرد منظر ملتزم ... بقايا أو ذكريات ... حتى نفسه اللى كانت فى الأول بتلومه على اللى بيعمله ... هى كمان اتعودت ....


كان ياما كان فتاة .... عايشه حياتها بمنظورها عادى ... يعنى مكنش حد بيقولها إن فى حاجة اسمها حجاب فرض ... ولا إيه صفات الحجاب ده ... المهم ... انها تأثرت كتير بموت والدها ... وبدأت بالفعل تصاحب بعض الأخوات الملتزمات وتحضر دروس علم ... وكم من أرض خصبة تنتظر من يسقيها لتنبت ... هكذا كانت الأخت دي ... كانت مستنيه حد فقط يدلها على الطريق ... يوم بعد يوم والأخت بتقدم خطوه بخطوة ... وجاء المحك الأكبر في حياتها ... تقدم ليها شاب بمفهوم الناس محترم ... وظيفة كويسة وجايله فرصة للعمل فى دوله أوربية ... ومن الآخر ميترفضش بمفهوم أهل الدنيا ... الأخت كان نفسها فى واحد ملتزم يعليها فى الدين ... لكن مع ضغط امها وافقت وقالت .. هو كويس وأكيد في يوم ما الحاجات الناقصة دي هتكمل ... واختصارا ... كانت النهاية كالسابقة ... وبقت الأخت بقايا ملتزمة ...

ياترى ايه السبب .. والأهم إزاى نحمي نفسنا من إننا نوصل لكده :

1- نظرية الانصهار التدريجى : من اهم النظريات لتفسير الانتكاسات الجزئية ... بل وتفسير طريقة عمل الشيطان معانا ... لو إنت جبت كوب شاى ساخن ووضعته وسط اربع أكواب ثلج ... هيحصل إيه
الخمس أكواب هتصل لدرجة حرارة متوسطة ( الاتزان الحرارى ) يعنى الشاى هيسقع شوية والثلج هيسيح شوية

هى دي المشكلة ... وجودك فى وسط اقل منك التزاما أو غير ملتزم خطر عليك ... وأكيد هينقصوا منك ... مالم يكن لك وجود مع أوساط أعلى منك فتعليك ... وده مش كلامى ده ملخص الآية :

( واصبر نفسك مع الذين يدعون ربهم بالغداة والعشي يريدون وجهه ولا تعد عيناك عنهم تريد زينة الحياة الدنيا ولاتطع من أغفلنا قلبه عن ذكرنا واتبع هواه وكان أمره فرطا )

والحل بسيط : ارمي نفسك في صحبة أعلى منك على طول ولا تخالط خسيسي الهمة فيثبطوك

والغريب فعلا إن لو واحد انتكس تلاقى اصحابه الملتزمين بعدوا عنه ... أو لنكون أوضح فالبعد بيبدأ من المنتكس ذاته ... وفى نفس الوقت بيبدأ اصحابة القدام أو صحبة السوء تقرب منه أو بعبارة أدق برده هو اللى بيقرب منهم ...

.... وعلشان كده بقلك انت اللى في إيدك الاختيار لو صادق وعايز ترجع اختار صحبتك ... والمرء على دين خليله ... ومتخدعش نفسك كتير .. لو انت بتقول إنك نفسك ترجع بجد ... طيب بتعمل إيه مع الصحبة دي ؟؟؟ ياترى ترضى تحشر معاهم يوم القيامه ... يعنى اختم بالكلمة دي ... ( صحبتك = مصيرك )

2- الخطوط الحمراء : خطر كبير إن ميكنش ليك خطوط حمراء فى الدين ... يعنى خطوط فى الطاعات والعبادات لايمكن للدنيا تعديها مهما كانت ... وعلى قدر ما هتكون الخطوط الحمراء دى واسعه وتشمل حجم كبير من الدين على قدر ثباتك والتزامك

والحل : هات ورقة وقلم واكتب خطوطك الحمراء ( عبادات وطاعات ودروس علم ودروس وعظ وسماع شرائط ) وكل شهر حاول تزود فيها شوية لإنك كل ما هتزود فيها فإنك بتزود فى حمايتك وفى حالة حدوث أى اقتحام الحق قلبك على طول ودخله مغسلة الوعظ واسمعلك شريطين آخره على زيارة مقابر على شوية دعوات وهيبقى كله تمام ولو استعصى الأمر استعن بأحد المشايخ واعرض عليه مشكلتك علشان يشخصك ويديك الحل

3- واعلم أن مرة واحدة قد تكفى : تساهلك مرة فى معصية ... قد تكون نهاية كل ما بنيته

أوعى أبدا تتساهل فى معصية واحدة مهما صغرت ...

والحل : اعرف نفسك : ابعد نفسك دوما عن مناطق المعصية ... و احترم لحظات ضعفك ... وابعد عن نفسك طرق المعصية ... واعلم ان هدفك الأول هو رضى الرحمن وجنته وكل ما يبعدك عنها ... ابعده انت عنك من الآن

4- انك مقضيها وخلاص : عدم وجود هدف وعدم حمل هم الدين

والحل : اعرف إن المسلم مينفعش يعيشها كده لإن خيرتك مشروطة بالإيمان بالله والدعوة إليه
وراغبي أعالى الجنان لا يكادوا يجدون وقتا فى حياتهم لقضاء فى فضول المباحات
فتطلع إلى القمم واجعل هدفك المراتب العليا من الدين وان استطعت ألا يسبقك إلى الله أحد فافعل

5- الجهل : من أكبر مداخل الشيطان ليك إنك تكون جاهل بدينك ... يستلمك بقى فى الوضوء ويشكك فى الطهارة وفى الصلاة ..

والحل : فتعلم دينك تحصن نفسك من هذا المدخل .. وضع لنفسك برنامج منتظم فى طلب العلم

6- اللى عايز يعمل حاجة بيعملها ::: أكفار فى الجاهلية خوار فى الإسلام

فاكر أيام المعصية ... كنت لما تحب تطلع رحلة ولا تتأخر بره البيت ولا ... ولا ... ولا ... مكنش فى حد فى البيت يقولك لأ ... ودلوقتى بعد ما التزمت ... مش عارف تروح مسجد

وإنت مش عارفه تلبسي نقاب بعد ما كنتى بتنزلى بلبس غصب عن والدك ووالدتك ايام المعصية ولو كان حد كلمك كنتى تعيطى لغاية لما يوافقوا

إيه ياجماعة ... هو الدين رخيص عندنا للدرجة دي ... ليه مستعدين نضحى بالدين فى سبيل أى شئ ... وليس العكس ... اعلم إن دينك هو أهم شئ عندك لو هتضحى بعمرك كله فى سبيل إقامة دينك ... فلن توفى ثمن الدين قط ... اوعى تستسلم بسهولة أمام ضغوط الحياة أو العائلة ... واعلم ان الخير كل الخير فى اختيارك للدين ... والهلاك الهلاك فى تفضيل اى شئ من حطام الدنيا الزائل عليه
لاتخف أى بشر مهما كان فى الدين ... فالله أحق أن تخاف منه ... ففلان لن يمنعك من الله ... والله يمنعك من كل شئ إن أنت أطعته وكنت على مراده



اختم برسالة بسيطة إلى كل أخ أو أخت منتكسه أو بيفكروا فى الانتكاس ...

كان الدين غريبا يوم جاء نبينا محمد صلى الله عليه وسلم ... ومر الدين بصعاب شديدة ... عارفين ليه ... علشان اللى يثبتوا على الدين فى الآخر كان ليهم أكبر ثواب ومنهم من بشر بالجنة وهما لسه أقدامهم على الأرض ...

الفتن كتير ... واحنا بنمر وهنمر لسه بامتحانات كتير للتمحيص والاصطفاء ... فلاترضى ابدا إلا بأن تكون قائدا للصف الإسلامى ... لا أن تكون ممن يبتعد عنه لأى فتنه مرت به

... الدين غالى ياجماعة ... ولو إنت مضحتش مين اللى هيضحى علشانه
والثواب كبير والله ... جنات تجري من تحتها الأنهار و نظر لوجه الملك
واعرف ان تضحيتك غالية عند ربنا وإن ربنا هيشكرك عليها فى الدنيا قبل الآخر

قبل ما تفكر فى الانتكاس قول لنفسك إيه اللى يستاهل ابيع الجنة ؟؟ علشان بنت ولا سيجارة ولا وظيفة ولا مظاهر خداعة ؟؟؟

وقبل ما تفكر تكمل فى طريق الانتكاس قول لنفسك إيه اللى يستاهل لحظة عذاب فى جهنم نتيجة معصية من المعاصى اللى بعملها ومت قبل أن تتوب منها ؟؟؟ وقول لنفسك وفكر فى مصيرك لو مت على ما أنت عليه الآن ؟؟؟

ولو أخذت قرار الرجوع ... صبر نفسك بذكر الجنة واعلم أنه من تلمح العافية (( نعيم الجنة )) هانت عليه مرارة الصبر (( على مصاعب الدنيا )) و استعن بالله دوما ... ولا تستسلم أبدا مهما طالت معاناتك فنصر الله قريب ولا بد
(((( والذين جاهدوا فينا لنهدينهم سبلنا وإن الله لمع المحسنين ))))

اللهم إنا نعوذ بك من الحور بعد الكور ... اللهم يامقلب القلوب والأبصار ثبت قلوبنا على دينك ... اللهم اهد شباب المسلمين لما تحبه وترضاه واحفظهم بحفظ من الفتن ما ظهر منها وما بطن ... اللهم احينا مادامت الحياة خير لنا وأمتنا ما دام الموت خير لنا ...وإن أردت بقوم فتنة فأقبضنا إليك غير مفتونين ....


=================

مواضيعنا السابقة ذات الصلة :

القلب الذي قصدته غير متاح حاليا....(( هام جدا ))

((*_- حــوار مـــــع مـــاضــــى -_*))

فضيحـة داعيـة


** _ وهي دي لحية دي ؟؟؟؟ _ **

-/- ( ياعم قلتلك مبحبش اعمل كده ) -\-

-------------------------------

مواضيع أخرى :

رسـالـة إلـى مـنـتـكـس -- الكاتب --DR_KARMEN

تشبث بيدي ... إني أهوى 1 منقول --- عائدة

تشبث بيدي .. إني أهوى!! 2 ---- منقول

[dr_karmen]

جزاك الله خيرا يااخى على هذه السلسلة


جعلها الله فى ميزانك وبارك الله فيك واكرمك

[أم الشهيد]

بجد بجد موضوع جميل واكيد ليا تعليق بس بعدين ؟؟؟؟؟؟؟؟

[أم الشهيد]

طيب انا قريت لغايه الانصهار التدريجي

ومعلش انا هتكلم بصراحه شويتين معظم اللي معايا في الكليه وشكلهم ملتزم_شكلهم_مش ملتزمين ولا حاجه ويمكن اللي مش شكله ملتزم احسن منهم,ليه؟سؤال مهم:فيه منهم بيخدوا اللبس شماعه ؟؟؟ اعرف كتير منتقبات مفيش جونتي وعيونهم باينه وكمان........ بيكلموا شباب وعادي جداااااااااااا؟؟؟؟؟؟

طيب فيه بنات لا بسه اسدالات والتعامل معاهم؟؟؟؟بيتكلموا بتعصب وحاجات غريبه؟؟؟؟؟

مش عارفه دايما الملتزم شايف اللي اقل منه داخل النار وكان هو اللي بيحاسب؟؟؟ سبحانك ربي من سنتين وانا في اولي واحده منتقبه قالت لي وانا وواحده صحبتي انتوا لابسين كده؟علشان مش زيها؟انتوا بتصلوا ازاي؟معلش في الكلمه اسلوبها في الدعوه يكرهك في الاسلام اه والله تحس ان الدنيا اسودت في عينيك سبحانك ربي؟؟؟

في نقطه عايزه اتكلم عنها وهي ان اصلا معظم الناس مش مطبقه حديث رسول الله صلي الله عليه وسلم(لا يكتمل ايمان احدكم حتي يحب لاخيه ما يحب لنفسك)فيما معناه يعني؟؟؟

يعني الكل مش بيهمه الا مصلحته اللي بيشوف منتكس عادي بيسيبه وبيقول وانا مالي المهم ان انا كويس؟

ليا عوده ان شاء الله مع باقي الموضوع


اه كنت هنسي
جزاكم الله خيراااااااااااااااااااااااااااااااااااا مواضيع قيمه.

[امة الودود]

بجد ربنا يكرمك اخى جزاك الله كل خير
مشكلة خطيرة و الخوف باة فعلا ان ممكن يكون حد بينتكس و هوة مش حاسس و مش مقرر انه ينكس لكن الدنيا بتاخده ربنا يعافينا و يعفو عنا و حلوة اوى فكرة الخطوط الحمراء
اللهم يا مقلب القلوب و الابصار ثبت قلوبنا على دينك

[أم الشهيد]

طيب يعني ايه لبس نينجا؟ده ليه علاقه بسلاحف النينجا؟؟؟؟؟؟؟

لكن انا بعارض في نقطه وهي الاهالي يعني انا اهلي مش موافقين اني اروح الجمعيه الشرعيه؟وعيطت وبهدلت الدنيا والنتيجه ان والدي حلف عليا اني مرحش؟؟؟؟؟؟؟
طيب جميل المفروض اعمل ايه اروح من وراهم كنتي فين كنتي في الكليه؟؟؟

بالله عليكم لازم تردوااااااااااااااااااااااااا

[أبويحيى]

dr_karmenجزاك الله خيرا يااخى على هذه السلسلة


جعلها الله فى ميزانك وبارك اللهف يك واكرمك

أمين
جزاكم الله خيرا مثله

أم الشهيدطيب انا قريت لغايه الانصهار التدريجي

ومعلش انا هتكلم بصراحه شويتين معظم اللي معايا في الكليه وشكلهم ملتزم_شكلهم_مش ملتزمين ولا حاجه ويمكن اللي مش شكله ملتزم احسن منهم,ليه؟سؤال مهم:فيه منهم بيخدوا اللبس شماعه ؟؟؟ اعرف كتير منتقبات مفيش جونتي وعيونهم باينه وكمان........ بيكلموا شباب وعادي جداااااااااااا؟؟؟؟؟؟

طيب فيه بنات لا بسه اسدالات والتعامل معاهم؟؟؟؟بيتكلموا بتعصب وحاجات غريبه؟؟؟؟؟

مش عارفه دايما الملتزم شايف اللي اقل منه داخل النار وكان هو اللي بيحاسب؟؟؟ سبحانك ربي من سنتين وانا في اولي واحده منتقبه قالت لي وانا وواحده صحبتي انتوا لابسين كده؟علشان مش زيها؟انتوا بتصلوا ازاي؟معلش في الكلمه اسلوبها في الدعوه يكرهك في الاسلام اه والله تحس ان الدنيا اسودت في عينيك سبحانك ربي؟؟؟

في نقطه عايزه اتكلم عنها وهي ان اصلا معظم الناس مش مطبقه حديث رسول الله صلي الله عليه وسلم(لا يكتمل ايمان احدكم حتي يحب لاخيه ما يحب لنفسك)فيما معناه يعني؟؟؟

يعني الكل مش بيهمه الا مصلحته اللي بيشوف منتكس عادي بيسيبه وبيقول وانا مالي المهم ان انا كويس؟

ليا عوده ان شاء الله مع باقي الموضوع


اه كنت هنسي
جزاكم الله خيراااااااااااااااااااااااااااااااااااا مواضيع قيمه.

أولا فى الكلام مبالغة غير صحيحة ... فبالتأكيد في الأخوات وكثيرات جدا من لبسن النقاب على دين واقتناع ... وأصبحن منارات للدعوة بسمتهن قبل كلماتهن أو فعلهن ...

وانا لا أنكر وجود الجزء الأخر ولكنه قليل وهو ما ناقشناه هنا فى الموضوع ... وأغلبما يكون هو سوء فهم وجهل بأن المنقبة ليس كغيرها وانها اصبحت صورة للدين

ويجب أن هذا لا يثبط غير الملتزمين عن الالتزام .. فنحن وإن كنا نعرض هذه النماذج فهى نماذج حادت عن الطريق ولو قليلا ... والنماذج المميزة حولنا كثيرا فلماذا نقول ليه نلتزم وممكن ابقى كده فى يوم من الأيام

طيب ليه متلتزمش وتبقى إنت نموذج للالتزام ...والكلمة دى كانت من اسباب التزامى لما سمعتها من شيخنا مسعد أنور حفظه الله لما قال ليه متبقاش إنت النموذج للمتلحى أو الملتحى المثالى لا أذكر نص العبارة ...

-----------

بالنسبة لنقطة نظرة الملتزم لغيره ففى موضوع فى المنتدى على القسم العام للأخت يمامة المسجد يناقش هذه القضية وبه نقاط نافعه لعلكم ترجعون لها

-------------

جزاكم الله خيرا مثله

------------

طيب يعني ايه لبس نينجا؟ده ليه علاقه بسلاحف النينجا؟؟؟؟؟؟؟

لكن انا بعارض في نقطه وهي الاهالي يعني انا اهلي مش موافقين اني اروح الجمعيه الشرعيه؟وعيطت وبهدلت الدنيا والنتيجه ان والدي حلف عليا اني مرحش؟؟؟؟؟؟؟
طيب جميل المفروض اعمل ايه اروح من وراهم كنتي فين كنتي في الكليه؟؟؟

بالله عليكم لازم تردوااااااااااااااااااااااااا

نينجا زي غطاء العين اللى بيلبسوه النينجا ويطلق كنية على النقاب الذى تكون فتحة العينين فيهما واسعه ليظهر منها جزء كبير من الوجه ...

-------------

طبعا لا يصح الكذب ... ولو فى هذا الأمر ... ولكن بالتأكيد هناك عدة مخارج يطبقها بعض الإخوة ممن يجدون تضيقا فى البيت ... منها مثلا استبدال الذهاب بأن يسجل أحد الدرس ويسمع أو سماع دروس على النت كما ذكرنا من قبل .... والثانى أنه يقول مثلا كنت فى الكلية وهو بالفعل كان فى الكلية قبل الدرس بحيث إنه لا يكذب وفى نفس الوقت لايغصب منه أهله ... إلا لو كان عاهدهم على عدم الذهاب فهذا أمر أخر

يعنى اللى عايز يعمل حاجه هيعملها ... يعنى ربنا سبحانه وتعالى أمرنا بعدم معصيته ومع ذلك بنستطيع أن نسول لنفسنا معصيته

ومش عارفين نبتكر طريقة نحضر بيه درس علم أو حفظ قرآن

ومن صدق الله صدقه الله ودي مش دعوة للتحايل ولكن دعوة للتغلب على الواقع دون الإخلال بأى شئ فى الدين

وفقكم الله لما يحبه و يرضاه

[أم الشهيد]

سبحانك ربي
من وجهه نظري الكلام مش بيلمس الواقع

[حامل المسك]

جزاكم الله كل خير اخى الحبيب ابو يحيي

[يمامة المسجد]

جزاكم الله خيرا ً

[أم المجاهدين]

كلنا عارفين إن فى أوائل التسعينات كان فى صحوة إسلامية كبيرة ... وعلى الرغم مما أخذ عليها من مآخذ إلا إن أكيد كان فى عدد كبير من الملتزمين ... طيب ... العدد ده راح فين ... ؟؟؟

صح العدد ده راح فين؟؟؟
اما اخ يشوف اخوه اللى هو مربيه يعنى بالنسبه ليه ابن وهو بيتاخد من وسط بيته واسرته ومحدش يعرف هو فين ننتظر منه هيعمل مع ولاده ايه لو فكروا انهم يعملوا زى عمهم ويلتحوا او يكونوا من رواد المساجد ؟؟؟
ياترى هيسيبهم ؟؟؟
لما بنت صغيره تشوف ابوها او عمها وهما ناس بتاخدهم من وسطهم وبعد كام يوم يرجعوا وكأنهم كانوا فى خناقه...واما تسأل عن السبب يقولوا ليها ده عشان ملتحى وبيقول للناس فكروا وارجعوا لربكوا

ياترى هتحب الالتزام ؟؟؟
ولا هتخاف لو عملت زى عمها او ابوها او اخوها اللى عشان الناس قالت عليهم كلمة(((ملتزمين))) كانوا وكانوا وكانوا
واعتقد انتوا عارفين كانوا ايه وبيحصل ليهم ايه؟؟؟
............
بس ما انكرش ان البنت دى اكيد لما بتكبر بتعرف انهم كانوا على الحق وانهم مش زى ما الناس قالت ومـــــــــــــــــــــازلت للنهارده بتقول عليهم((متطرفين)).
وبترجع وهترجع للى كان بيتها بيربيهم عليه
واما تشوف الناس اما بتفتكر اللى كان بيتعمل معاهم علشان بيقولو
((علشانك يارب))
هتفرح وهتقول علشانك يارب
.......
السؤال اللى حضرتك قلته راحوا فين؟؟؟؟؟؟؟؟
ممكن على حد علمى القليـــــــــــــــــــل جدا انى اقول
ان فى ناس بعدت خوف على بيوتها
وناس بعدت غصب عنها
وناس بعدت ورجعت تانى ومازالت موجوده وبنفس النشاط ((ودول ربنا يكون فى عونهم ))
وناس بعدت ورجعت بس فى بيتها بقت تخاف تخرج من بيتها
معرفش ان كان كلامى ده معقول ولا لأ بس ده اكيد من صور انا شفتها وعشت معاها
وبتهيألى اللى بعدوا انتوا عارفين مين اللى بعدهم وانه مش بايدهم
....................
جزاك ربى خيرا اخونا الكريم
ونفعنا بك
رزقنا الله واياكم الاخلاص وحسن الثبات

[راجية رحمة الله]

طيب يعني ايه لبس نينجا؟ده ليه علاقه بسلاحف النينجا؟؟؟؟؟؟؟

لكن انا بعارض في نقطه وهي الاهالي يعني انا اهلي مش موافقين اني اروح الجمعيه الشرعيه؟وعيطت وبهدلت الدنيا والنتيجه ان والدي حلف عليا اني مرحش؟؟؟؟؟؟؟
طيب جميل المفروض اعمل ايه اروح من وراهم كنتي فين كنتي في الكليه؟؟؟

بالله عليكم لازم تردوااااااااااااااااااااااااا

فعلا والله حكاية الاهالى دى مشكلة انا لحد دلوقتى مش منتقبة تصدقوا؟ لييييييييييييييييييييييييه بسبب اهلى وكل يوم نكد وعياط ونقاش فى الموضوع دة .......عاوزة البس النقاب.....يقولوا -(((السنة اللى جاية ))) وتفرق اية السنة دى عن اللى جاية انا تعبت والله بجد مش عارفة اعمل اية يارب ترحمنى برحمتك الواسعة بالله عليكم تدعوا ان ربنا يهديهم ويهدينى انا كمان ويوافقا انى البسة انا حاسة انى لو لبستة ممكن اموت من الفرح

[خطاب]

لكن انا بعارض في نقطه وهي الاهالي يعني انا اهلي مش موافقين اني اروح الجمعيه الشرعيه؟وعيطت وبهدلت الدنيا والنتيجه ان والدي حلف عليا اني مرحش؟؟؟؟؟؟؟
طيب جميل المفروض اعمل ايه اروح من وراهم كنتي فين كنتي في الكليه؟؟؟

بالله عليكم لازم تردوااااااااااااااااااااااااا

الحمد لله رب العالمين , بداية شكر الله للأخ المُثمر أبا يحيى و أعانه على الخير و أدام عليه هم الدين و السعى لدلالة الخلق عليه سبحانه .

الأخت " أم الشهيد " بر الوالدين مُقّدمٌ على الجهاد في سبيل الله , والعلم من الجهاد وبالتالي فيكون بر الوالدين مُقدّماً عليه إذا كانا في حاجة إليكِ أى إذا كان أهلُك فى البيت يحتاجونكِ أما إذا كان الداع لمنعك هو كراهيتهم للعلم الشرعى فهؤلاء لا طاعة لهما , ولا ينبغي لكِ أن تستأذنى منهما للخروج ؛ لأن الحامل لهما كراهة العلم الشرعي , عَصمهم الله من ذلك - من كتاب العلم للشيخ العثيمين رحمه الله بتصرف -

أعتذر للرد على الأخت فى سؤالها دون التعقيب على ما كتب الأخ الكريم , هو يكفينا المؤنة و الله حسيبه " إبتسامه " و الحمد لله رب العالمين .
ـــــــــــــــــــــــــــــــــــــــــــــ
عَنْ أُسَامَة بْن زَيْدٍ قَالَ : ( قُلْت : يَا رَسُول اللَّه ، لَمْ أَرَك تَصُومُ مِنْ شَهْر مِنْ الشُّهُور مَا تَصُوم مِنْ شَعْبَان , قَالَ : ذَلِكَ شَهْرٌ يَغْفُلُ النَّاس عَنْهُ بَيْنَ رَجَبٍ وَرَمَضَان , وَهُوَ شَهْر تُرْفَعُ فِيهِ الأَعْمَال إِلَى رَبّ الْعَالَمِينَ ، فَأُحِبُّ أَنْ يُرْفَعَ عَمَلِي وَأَنَا صَائِمٌ) اهـ حسنه الألباني في صحيح النسائي (2221) .

[خطاب]

فعلا والله حكاية الاهالى دى مشكلة انا لحد دلوقتى مش منتقبة تصدقوا؟ لييييييييييييييييييييييييه بسبب اهلى وكل يوم نكد وعياط ونقاش فى الموضوع دة .......عاوزة البس النقاب.....يقولوا -(((السنة اللى جاية ))) وتفرق اية السنة دى عن اللى جاية انا تعبت والله بجد مش عارفة اعمل اية يارب ترحمنى برحمتك الواسعة بالله عليكم تدعوا ان ربنا يهديهم ويهدينى انا كمان ويوافقا انى البسة انا حاسة انى لو لبستة ممكن اموت من الفرح

إنا لله
نسأل الله أن يمن علي الأمة بالدين والطاعة و الرضى و التسليم لشرعه .

الأخت الكريمة كُنت سألت الشيخ محمد صالح المنجد حفظه الله عن معارضة الوالد لإرتداء إبنته للنقاب , هل يجوز لها أن تلبسه دون عِلمه ؟ و هل لو خرجت معه يومًا لا تفعل ؟ " أى لا تلبسه " فأجاب بالجواز حفظه الله , فعليكِ بذلك إلى أن يرزقكِ الله الستر كل وقت, و لتحمد الله أخواتنا ممن رُزقنّ بآباء يعينون على مرضاة الله و يسعون فى تعبيد بناتهن له سبحانه و لله الأمر من قبل و من بعد .
ـــــــــــــــــــــــــــ
روى مسلم (1156) عَنْ أَبِي سَلَمَةَ قَالَ : سَأَلْتُ عَائِشَةَ رَضِيَ اللَّهُ عَنْهَا عَنْ صِيَامِ رَسُولِ اللَّهِ صَلَّى اللَّهُ عَلَيْهِ وَسَلَّمَ ، فَقَالَتْ : كَانَ يَصُومُ حَتَّى نَقُولَ قَدْ صَامَ ، وَيُفْطِرُ حَتَّى نَقُولَ قَدْ أَفْطَرَ ، وَلَمْ أَرَهُ صَائِمًا مِنْ شَهْرٍ قَطُّ أَكْثَرَ مِنْ صِيَامِهِ مِنْ شَعْبَانَ ، كَانَ يَصُومُ شَعْبَانَ كُلَّهُ ، كَانَ يَصُومُ شَعْبَانَ إِلا قَلِيلا .

[أم الشهيد]

اخي في الله(خطاب) مفيش حد بيكرهه دينه...