ايه رأيك تكوني منتقبة؟, لا للجدال ..ولكن ..ممكن اعرف آرائكم ؟؟

[يمامة المسجد]

بسم الله الرحمن الرحيم

السلام عليكم ورحمه الله وبركاته

كما ترون موضوع النقاب تكرر مرارا وتكرار على شاشات الفضائيات ويثير الجدال اينما طرح
وطالما اتهم مؤيدوه بالتشدد والتعصب واتباع هوى النفس , وانهم يفرضون في الاسلام فروضا ويحرمون على غير المنتقبات لبسهن لهذا الحجاب وانهم يزكون انفسهم بلبسهن النقاب واتهامات كثيرة

اعدكم ان نتحدث هذه المرة بلسان اخراكثر تحبيبا في النقاب بلا جدال ولا نزاع
ويشهد الله ان مادفعنى لكتابة هذا الموضوع الا حبي لكن في الله
وفى رغبتى ان يجمعنا الله جميعا في جنة الفردوس
وان يحشرنا مع زوجات النبي صلى الله عليه وسلم ..

ويبقي فقط ان انوه اننا لن نتحدث عن فرضية النقاب فهو مفتوح لكم ان تقتنعوا بالفرضية ام السنية مما تستشفوه من قراءاتكم لكتب التفاسير واراء العلماء

فالكلمات هنا تحمل معنى الدعوة بدون التطرق للجدال في الامور الخلافية.....

ويشهد الله على صدق النوايا في الدعوة الى النقاب....

اخواتى في الله منتقبات وغير منتقبات

لن ابدأ حديثى بالبداية التى تفزع الكثير منكن وتجرى الدم في العروق وما كنت اعلم انها مثيرة او مستفزة لهذه الدرجة
وهى عبارة (النقاب فرض)

واحب ان ارفع شعارى عندما قررت كتابة هذه الكلمات وهى.... لا للجدال ولكن الدعوة بهدوء

كتير من الناس بيرددوا عبارة (النقاب فضل او فضيلة) ..

طب تعرفوا معناها اية؟

ساستعين برأى الشيخ الجليل الالبانى في شرح افضلية النقاب على الحجاب العادى (غطاء الرأس) فيما يفيد موضوعى...

قال الشيخ الجليل ..
السنة: ما يثاب فاعله، ولا يعاقب تاركه، والمستحب كذلك

إذن الشيخ يرى أن التغطية سنة مستحبة، لم يقل:
مباح، جائز

بل قال:
سنة، مستحب

وهذا ألفاظ شرعية تدل على الأفضلية...

والمشروع هنا هو تغطية الوجه،ومعلوم المشروع وهو ما شرعه الله تعالى أفضل من الجائز، وهو ما أباحه الله تعالى ..
وفي بعض الناس بتفهمها خطأ تقول دى زيادة تقوى منى وزيادة تستر منى..... لى انى اعملها او معملهاش لانها فضل!!

سبحاااااان الله !!!!

ده في اية كريمة بتقول :
(يمنون عليك ان أسلمو قل لاتمنو على اسلامكم بل الله يمن عليكم ان هداكم للايمان ان كنتم صادقين )
الناس فاهمينها بالمقلوب يعنى حتى لو عايزين يصححوا رؤيتهم شوية يقولوا طيب ده فضل من ربنا على انه يرزقنى حاجة زى دى ويهدينى انى اتستر مش انه فضل منى؟؟؟!!!

سبحاااان الله!!

حجاب هذه الايام الوانه تجنن بتدعو لاطلاق البصر

انا نفسي كفتاة انظر اليها والى تناسق الالوان والشياكة والخرز والترتر اللى بيلمع فيها
وانظر الى طريقة الـ cross في لف الايشارب التى طالما جننتنى (ايام الجاهلية) قبل الالتزام لأتعلمها

و الى الـ band او اللى بيسموها (باندانا)
وليها لون وتلبس تحت ايشارب لون مختلف عشان تعمل contrast شياكة يعنى

وايضا الي لفات الايشارب التى تخنق الرقبة لانها ملفوفة حولها مباشرة ولاتغطى الصدر كأنه لم تنزل اية تقول :
(وقل للمؤمنات يغضضن من ابصارهن ويحفظن فروجهن ولا يبدين زينتهن الا ماظهر منها وليضربن بخمرهن على جيوبهن)

اتعمل بقى حجاب جديد غريب من نوعه يغطى الشعر والرقبة ثم يمر ليظهر الاذن!!!

لاحول ولاقوة الا بالله هل هذا نوع جديد من الحجاب نزلت به اية؟؟

.دى فتنة الى جانب ان شكلها مش ظريف بفرض خلاص لبسنا عباية (عباااااية مش بنطلون وعليها بلوزة قصيرة او بودى اوشيميز اوحاجة من الحاجات الوحشة دى) مع الايشاربات دى
طب ما كده الحجاب مش مستوفي كل شروطه...
ويااارب العباية ماتكونش زينة في نفسها...
تخيلى الاية بتقول (ولايبدين زينتهن) واحنا بنخالف ونبدى الزينة

وصور الزينة معروفة :
تناسق الالوان ولا اعنى اننا نبقي مبهدلين لكن مايلفتش النظر ..
والتطريز والايشاربات المشجرة القصيرة ولبس الخواتم والذهب اعنى إظهارهم ..

يعنى ربنا سبحانه وتعالى بعث لنا رسولنا الكريم صلى الله عليه وسلم ليكون لنا قدوة واسوة ونموذج نسير على دربه هو واوزواجه ثم صحابته ثم التابعين

وادينا دلوقتى عايشين في هاوية المنحدر ونرى مظاهر العرى قد تفشت.. فهذا يعنى ان ما كان قبلنا كان اكثر مننا تسترا فاكثر حتى زمن النبي صلى الله عليه وسلم اللى كانت فيه النساء يرتدين السواد حجابا لا حدادا

وهناك احاديث كثيرة عن عائشة رضي الله عنها تصف فيها لباس النساء(متلفعات بمروطهن مايعرفن من الغلس) والغلس هو الظلام الدامس وقول اخر(عليهن اكسية سود كأن على رؤسهن الغربان من السكينة) مش ده برضه قول امنا عائشة رضي الله عنها وكانت صغيرة لما اتحجبت هو الحجاب ده مش لينا احنا المسلمين ..

سؤال

ليه دايما بنفهم ان المؤيدين للنقاب(اللى الناس بتعتبرهم متعصبين متشددين) بينادوا بالنقاب اللى هو عبارة عن قطعة قماش سوداء تغطى الوجه؟؟

الجواب :

لا ابدا هم مش بينادوا بكده ..
هم بينادوا بالرجوووووع للحجاب اللى كانت بترتديه نساء النبي صلى الله عليه وسلم في حرصهم على حجابهم وهم مثلا بينفذوا سنة من السنن او فرض من الفروض نفسهم برضه ان اخواتهم ينفذوه زيهم ..

اخواااتى الا تشتاقون للقاء رسول الله صلى الله عليه وسلم؟؟
الا تحبون ان تكونوا اهلا لان تحشروا معه ومع زوجاته(فمن احب قوما حشر معهم)؟

وبالنسبة للاخوات اللى نفسهم يلبسوا النقاب نصييييحة اختى ساااااااااااارعي اليه والله والله هتحسي بحلاوة محدش هيحسها غيرك وهتلاقي نفسك فرحاااانة جدا ماتعرفيش ليه
ولو الاهل مش موافقين ماتيأسيش ادعى لنفسك بالثبات وادعى لهم بالهداية وابتدى ادعيهم بالحسنى انهم يقتنعو وسوقي لهم الادلة وافتحى معاهم كتب التفاسير القرآن دستورنا والسنة
ماهو احنا نرجع لمين غيرهم؟؟

ولو زاد الامر سوءا معاهم واصروا على الرفض
فما تركنيش الموضوع
خليكى لسه سخنة فيه
وحطيه في دماغك كاى اولوية بتدى لها اهتمام

ناس كتير خدتهم الحمية في الاول وبعد كده بردوا وكأن شيئا لم يكن
وللاسف ده بيسوء الصورة عند الاهل وبيعتبروا النقاب مجرد حاجة بنتهم شبطت فيها لفترة وبعد كده زهقت
وبيزود التأكيد والاقتناع عندهم ان حجاب الايام دى يمشي مع اننا في عصر الفتن
خلاص المنتقبة والغير منتقبة بتتعاكس ماعدتش تفرق مع الشباب
فاولى باولى اننا نزيد التستر ..

كما ترون انى حتى الان لم اناقش فرضية النقاب ولكنى ادعو لتفتيح المسام المنغلقة تجاه هذا الموضوع والله اعلم بنيتى واسأل الله ان يجعل كل اعمالى خالصة لوجهه الكريم

يا جماعة معلش سؤال صغير

مش اللى عايز يعمل حاجة لازما ولابدا يعرف ايه فوايدها ؟؟

دلوقتى هقول الفوائد الظاهرية للنقاب والفوائد الباطنية طبعا عارفينها انه افضل وانه قربى لله تعالى ..

وسبحان الله تستر المرأة الكامل له فوائد جميلة جدا مايحسهاش الا اللى لبسوه(وعلى لسانهم) ..

هى فوائد عجبانى شخصيا

مثلا

في الميكروباص لما تيجى تركبي كأن في حالة لبس حصلت فيه كله بيوسع للمنتقبة احتراما لها(وانا لا ازكيهم على الله في انهم مثيرين للاحترام) بس ده اللى بيحصل فعلا....
ولو قدر الله ان قعد جنبها رجل برضه يوسع لها وبيبقي كأنه قاعد مش على بعضه زى مابيقولوا عندنا في مصر خايف انه يمسها....

سبحان الله!!انتى كده بنقابك خدتى عليه كذا ثواب ..

اولا
اعنتيه على غض بصره
(ومن دعا الى هدى كان له من الاجر مثل اجور من تبعه لا ينقص من اجورهم شيئا) ..

ثانيا
اعنتيه انه لايمس بدنك
(لأن يطعن في رأس احدكم بمخيط من حديد خير له من ان يمس امرأة لاتحل له) ..

ثالثا
خارج الميكروباص في الكلية بيخلصك من آفة الاختلاط

سبحان الله

مثلا كنتى بتكلمى ولد وانتقبتى مرة واحدة سيبك من انه مش هيعرفك بس مش هيجرؤ انه يجى يكلمك هيحس بهيبة تانية ..
ده غير طبعا وانتى لابسة القفازين محدش هيسلم عليكى بالايد ..

رابعا
تستر وعفة وطهارة من جوة ..

خامسا
بييعينك انتى نفسك على غض البصر وبيعين غيرك معاكى ..

سادسا
بيقرب منك صحبة صالحة ماتعرفيش ازاى لانهم هيتوسموا فيكى الخير وهتلاقيهم هم نفسهم بيدعوا لك بالثبات ..

سابعا
هتحسي بقرب شديد من ربنا سبحانه وتعالى هو اللى انعمه عليكى واختصك به ..

ثامنا
بيحميكى من اسمرار البشرة في الصيف بالذااااات لو خدتى بالك وانتى محجبة بتلاقي في فرق في اللون بين برة وجوة
لكن في النقاب بيبقي في homogenity فى اللون

,وصلنا بقى لحاجة دايما بتخاف منها البنات قبل ما تلبس النقاب الا وهى......

كلكم طبعا عارفينها

( الزواج )

امممم طب هسألكم سؤال

انتم مش مؤمنين بالله سبحانه وتعالى ومؤمنين انه مقسم الارزاق وعلام الغيوب؟؟

الزواج ده رزق من ربنا سبحانه وتعالى يؤتيه من يشاء وينزع الفضل ممن يشاء...
يعنى ماتخافيش هيجيلك هيجيلك ده مكتوب لك فوق ومقدر ليكى يتقدم لك في اليوم الفلانى في السنة الفلانية.....
وعايزة اطمنك ان رزق المنتقبات(ولا احسدهم وازكيهم) ماشاء الله بيبقي اوسع اوسع اوسع بكتييييييييييييييييير من غير المنتقبات ...

لا ومش كدة وبس

مش اى حد بيتقدم لهم

مابيجيلهمش الا الملتزمين

وده مش كلامى ده كلام اخوانا ..قرأت لهم ردود كتيرة على مواقع كتير بيقولوا انهم لن يتزوجوا الا منتقبة
يعنى واحد عارف ربنا...واحد عايز بدايته تبقي كده

اية رأيك مش دة برضه احسن ولا لأ؟؟

وكل واحدة على اد نيتها في الزواج وفي ارتداء النقاب قاصدة به وجه الله تعالى والتقرب منه بتنفيذ احكامه ولا عشان يجيلها واحد كويس

(انما الاعمال بالنيات ولكل امرئ مانوى ومن كانت هجرته الى الله ورسوله فهجرته الى الله ورسوله ومن كانت هجرته الى دنيا يصيبها او امرأة ينكحها فهجرته الى ماهاجر اليه)

يعنى النقاب(قطعة القماش السوداء هذه) مش هى اللى بتفرق...
تضمنى منين انه حتى يجى لك وانتى غير منتقبة اهو واحد شافك وشاف اد ايه انتى جميلة يكون كويس او ملتزم؟

الله اعلم....ربنا هو عالم الغيب

وعلى فكرة دى تعتبر فايدة جميلة احب اضيفها لفوائد التستر الكامل...انه بيغرس فيكى وازع التوكل على الله واليقين بالله والثقة في الله ..
سايبة نفسك لربنا سبحانه وتعالى ومتوكلة عليه وهو عزوجل لما يشوف منك كده هيرزقك.....

وكمان لما ترددى بينك وبين نفسك بتسترك وعفتك(ومن ترك شيئا لله عوضه الله خيرا منه)
وتقتنعى وتثقي وتجزمى بيقين ربنا هيعوضنى انا بعمل كده وواثقة ان ربنا هيدينى احسن ماكنت اتمنى وزيااادة!!

سؤال تانى بقى

ليه دايما لو لاقيتى واحدة صاحبتك لبست النقاب بتلاقي نفسك تلقائيا بتقولى لها مبروووك؟؟؟؟؟
وممكن لو قالت لك عقبالك تقولى يارب

انا بقول الكلام ده للاخوات اللى بتروح لاختها المنتقبة تبارك لها مش تقولها ايه اللى انتى عملتيه في نفسك ده؟ ليه عملتى كده؟ انتى لسه صغيرة!!

فتشي بينك وبين نفسك اختى
هتلاقى سبحان الله ميل غريزى انك تبقي متسترة تبقي غالية مكنونة في حجابك والا ماكنتيش قلتى لها مبروك او قلتى يارب يرزقنى زيها

نقطة كمان

بعض الاخوات بتبقي نفسها جدا تلبس النقاب ومقتنعة به وكل حاجة بس تيجى تلبسه تقول لا بعد مااتزوج.....واحنا اتفقنا انه رزق
يعنى هى مقتنعة وعايزة تلبسه بس الشيطان مانعها مقيدها مسلسل ايديها ورجليها انها تنزل تشترى الحجاب اللى تستر به نفسها
والقرآن الكريم بيحكى لنا خطة عمل الشيطان في افساد الشعوب (ليريهما ما وورى عنهما من سوءاتهما)

تخيلوا اللعين عايز العرى ينتشر

وكانت هى دى خطته من زمان المحجبة يقول لها ده انتى بنت كده .. خلاص انتى عملتى اللى عليكى كفاية عليكى كده خليكى كده

فيفتنها ويصرف تفكيرها انها تعدل في حجابها او تطور نفسها فيه
يعني ان كان قصير تطوله
و ان كان في زينة تبعد عنها
وان كان بنطلون ماتلبسوش لكن الغبي دة يقولها ده عملى وكمان لما تيجى تركبي الميكروباص محدش يقدر يشوف منك حاجة!!!

والغير محجبة ينسيها ( بالرغم من انها بتشوف نفسها في المراية كل يوم وبتسرح شعرها الصبح) ينسيها فرض الله الا وهو الحجاب وتسأل عنه يوم القيامة تلاقي نفسها مش عارفة تقول ايه

وتخيلى اختى من اللى بيسألك....الجبااار....سبحانه وتعالى

انا مش بخوفك اختى لكن بالله عليكى ماتضيعيش فرض الله انتى مسئولة طول ما انتى بالغة ورشيدة

وفوايد الحجاب جمييييلة وكتيييييرة بس انتى انوى والبسيه

طب بعض الاخوات تقول ادعى لى ان ربنا يهدينى الاول وبعد كده البسه

طب انتى وانتى لابسة حجابك (غطاء الرأس) لما كبرتى قعدتى تقولى لما ربنا يهدينى

انا بقولك ده على اساس انك لسه مقتنعة ان هو ده الحجاب الشرعى....
لا مقلتيش كده بالرغم من انك في قرارة نفسك لابسة غطاء الرأس على انه فرض

اذن تنفيذك لفروض ربنا ومنها حجابك وتسترك مالوش علاقة بدرجة الالتزام والهداية (والله يهدى من يشاء)

البسي الاول وهتلاقي النقاب نفسه بيضفي عليكى مشاعر وموجبات الالتزام
منها غض البصر ليكى وبتعينى غيرك بيه وخفض الصوت وطبعا مفيش اختلاط مفيش سلام باليد مفيش تبرج في حجابك ولا زينة في نفسه ولا لباس شهرة

طب في اخوات بيقولو اخاف البسه وبعدين اخلعه تانى؟؟؟

شوفي يا اختى المفروض انك لابساه ابتغاء لوجه الله تعالى وامتثالا لاوامره يبقي تبقي مسلمة بيه وتدعى لنفسك بالثبات عليه
وهتلاقي سبحان الله الصحبة الصالحة انجذبت ليكى وهتدعى لك بالثبات ان شاء الله

وان كان على هدعيلك بس انتى خطى الخطوة الاولى في الطريق ده وربنا هياخد بايدك صدقينى

اخوات تانيين ممكن يقولوا طب والشغل؟؟؟؟؟

اااه جينا لنقطة جميلة جدا...
في اية كريمة جميلة بتقول(وقرن في بيوتكن ولاتبرجن تبرج الجاهلية الاولى)
شوفي معايا كلمة( وقرن في بيوتكن) اد ايه جميلة تحسى ان ربنا خايف عليكى وعايز يحفظك وبيأمرك بالقرار في بيتك معززة مكرمة

تفتكرى لو زوجك قالك اقعدى في البيت ماتشتغليش هتطيعيه ولا لا؟؟

طب ده ربنا عز وجل هو اللى بيأمرك ليه ماتطيعيهوش!!!

وتدبرى معايا اختى ان ربنا قال (ولاتبرجن تبرج الجاهلية الاولى)

انا مش بقولك خليكى في البيت محبوسة لحد مايجيلك كبت...لا ابدا....

اسلامنا عمره ماكان دين شدة وعنف بينا وماكان الله سبحانه وتعالى ليكلفنا مالا نطيق

انتى مأمورة انك تتعلمى(طلب العلم فريضة) ولكن تلتزمى في خروجك بالضوابط الشرعية كغض البصر وعدم الخضوع بالقول وعدم الاختلاط

والنقطة الاخيرة (عدم الاختلاط) كلنا للاسف مش عارفين نحققها لانها موجودة في كل حتة في الكلية... في الاسواق.... في الشغل....

انا دلوقتى مش بناقش فرضية النقاب بس بفكر معاكو بصوت عالى

لذا كيف السبيييييييل؟؟؟

واقولك يا اختى عليكى انك تنفذى الاية بشكل متحور شوية بانك تبقي برة بيتك زيك كأنك جوة بيتك
لا استني اوعى تكوني فهمتي اني بقولك تبرجي

استني بسسسسسس

مش انتى لما بتكونى في بيتك حد بيبقي شايفك؟؟

لا...

الجدران والستائر والاغطية مغطياكى....

طيب نفذى الاية بقي اخرجى وانتى متغطية

فعليكى بالحجاب الكامل...اللى ينفذ لك الاية ويحفظك....

في الشغل عموما انتى مش مأمورة بالشغل لانك ملزومة من زوجك واهلك بانهم يصرفوا عليكى
فان كان ولابد اوى فاشتغلى واحفظى نفسك بنقابك وان شاء الله ربنا هيحفظك

اسألكم الدعاء لي

[3alia2]

جزاكى الله يخراااا كثيرااااااااااا يا يمامة
وربنا يجعله فى ميزان حسناتك ياااااااااارب

بجد موضوع جميل جدا وتحسى ان هو طالع من القلب للقلب بجد
ربنا يثبتك ياااااااااارب

[يمامة المسجد]

السلام عليكم ورحمة الله وبركاته

جزانا واياكم اختى علياء

آمين يارب ياعلياء

[يمامة المسجد]

يلا ياجماعة هنبد أ السياق كام واحدة هتنتقب ووالله والله والله هدعيلها بالاسم ، هدعيلها بكل الي هي عيزاها

يلا ياحبايبي

مين هيقولي انا لبست نقاب عشان ربنا وادعيلي

[mero]

أنا أنا يا أبله ....... لبست النقاب عشان ربنا ..... أدعيلى إنى ربنا يهدينىىىىىىىىىىىىىىىىىىى ويطهرلى قلبى ، بس الله يكرمك بلاش دعوات النت اللى على الماشى دى ، عاوزه دعوه كده فى صلاه وتر وانتى بتعيطى لربنا ... يلا بقى مش هوصيكى

[آلاء الله]

:lll:

جزاااااااااااااااااااكى اله خيرا يا يمامه ربنا يرزقك الاخلاص ويتقبل منك ويجعل ذلك كله فى ميزان حسناتكم.


اولا فى حاجتين هعلق عليهم وبعدين هاقولك قصتى مع النقاب.

أولا:
يقول الله تعالى:
« الذين يستمعون القول فيتبعون أحسنه أولئك هم الذين هداهم الله وأولئك هم أولي الألباب » .
سورة الزمر : الآية (18) .
يعني لم يجعلوا هناك قيدا على ذهنهم ، لم يجعلوا أطارا محدودا لا يمكنهم ان يتجاوزوه بل جعلوا الحقيقة مدار همهم وهدفهم وانما يتبعون فقط ما يراد لهم ان يتبعوه .

يعنى ربنا أمرنى بحاجة أعمل أعلى حاجة فيه. مش أكتفى وبس ......
وهوا ده اللى يميز المؤمن القوى عن المؤمن الضعيف.

وبعدين إحنا لسه بنكلم فى إرادتك واقتناعك عن الحجاب... آمال فين الارادة اللى هتنقذ الامة .
ياجماعة عايزين نبقى أقوى من كده ربنا قال وأمر نقول سمعنا وأطعنا.

وبعدين شوفى ربنا عملنا ايه ونعمه وفضله علينا لو الواحد استرجع نعم ربنا عليع والله هيكسف منه.،،وكان فضل الله عليك عظيما،،


وبعدين يبقى شكر نعمة أنه رزقك جمال ..... يبقى تغطيه ولا تكشفيه ؟؟؟؟

مش ربنا هو القادر أن يسلب منك هذه النعمة ......

ثانيا :
ما عند الله لا يؤخذ بمعصيته
بمعنى أنه لما تتبرجى وفاكرة أنك هتتجوزى هيبقى الجزاء من جنس العمل ولا ترزقى.

ولو رزقها يبقى ما فيش بركة..

أذكر لكم قصتى مع النقاب وايه كان أحساسى وقتها وياريت من كل أخت تقول أحساسها عسى أن ننفع به غيرنا من أخواتنا المسلمات



كان لبسى طول الوقت محتشما عمرى ما لبست بنطلون أو أى شئ مما شابه ذلك.

وبعدين سبحان الله بدون مقدمات فكرت فى النقاب .
وعملت استخارة حتى جالى إحساس عجيب وأنا بصلى أنتى بستخيرى فى أيه؟؟؟؟

يعنى هوا الواحد قبل ما يصلى يستخير يصلى ولا لأ..وبعدين

صحيت من النوم و كان أول يوم فى امتحانات النظرى بعد ما انتهينا من امتحانات العملى.
ونزلت الكلية والشيطان قبل ما انزل يوسوس مش هتستحمليه على وشك فى اللجنة دا الجو حر وممكن ما تحليش كويس. ممكن حد يضايقك .

المهم عزمت وتوكلت على الله ونزلت
وكنت نازلة وخايفة اوى من ردود الافعال او انى اتهز من الكلام الى هيتقاللى وخلافه.
سبحان الله ودخلت اللجنة الصبح .
والحمد لله جاوبت كويس جدا الحمد لله مع انها كانت مادة صعبة.
ولا تتخيلوا ردود الافعال كانت اكتر من رائعة من اللى اعرفهم واللى ما عرفهمش والكل شجعنى وباركلى ودعوا ليا بالثبات.

وفى واحدة كانت اصغر منى بسنة بتقولى انا ان شاء الله هاعمل زيك كده .

وبعدها فى امتحان الشفوى وكنت خايفة جدا
وسبحان الله دخلت للدكتور وكان من جامعة تانية واللى امتحنوا قبلى قالوا دكتور شديد وصعب وجاوبتى ما جاوبتيش مبيديش درجات. ودخلت للدكتور
وقالى انتى ايه اللى لابسه ده؟
قلت اه ..........ربنا يستر.
دا حجاب ولا خمار بنفس اللفظ
قلتله دا نقاب .قالى يعنى ايه؟
فشرحت الموضوع ببساطة وسبحان الله ربنا وفقنى يومها وادانى الدرجة النهائية فى الشفوى وكنت اول مرة من يوم ما دخلت الكلية اخد الدرجة النهائية فى الشفوى والوحيدة فى لجنته اللى اداها الدرجة كاملة.
وقالى احنا مالناش بركة الا انتى.وادعيلنا.
سبحان الله ورجعت البيت وانا مش مصدقة اللى حصل ومستغربة جد لاانى مش اول واحدة تلبس نقاب وماكنتش متوقعة رد الفعل ده سبحان الله .
ربنا بعت لى اللى حصل تثبيت ليا والحمد لله.

والله ياأخواتى بمجرد ما وضعت النقاب على وجهى ونزلت من البيت كان أحساس رائع بالامان والستر والطمانينة وكأنى أول مرة أرتدى ملابس ..سبحان الله إحساس عجيب.
وبالرغم من أن فى ناس كتير شجعتنى على النقيض تماما كان فى ناس قعدوا يقولولى أخلعيه مش هتتجوزى وكل الكلام اللى ممكن تسمعيه


وطبعا أنا أنسانة بشر كانت جوايا أحسايس كتيرة بس كان دايما جوايا،، أن ربنا مش هيسيبك،،
سبحان الله وكان بعد لبسى للنقاب رمضان على طول وكان سبحان الله أحلى رمضان مر عليا فى حياتى.


و عرفت صحبة صالحة أعاننونى على الخير ربنا يبارك لهم ولكم أجمعين.


والله أخوانى ذقت حلاوة الايمان والاطمئنان والانس بالله .

أرجوألا أكون قد أطلت عليكم ولكن يعلم الله أن لكم ناصح أمين
وجزاكم الله خيرا

[3alia2]

جزاكم الله خيرا اخواتى فى الله
والله انى بحبكم فى الله



اقلكوا بقى قصتى مع النقاب
انا فى الاول ايام الجامعة وكده كنت لابسة اسدال وكل حاجة الحمد لله بس كنت عادية يعنى وكنت بقول ان انا مش عاوزة اتجوز واحد ملتحى كفاية ان يكون كويس ومتدين وخلاص ومش لازم الدقن دى

يعنى من الاخر كده كنت متبعة نظام ( انا كده كويس ) انا احسن من غيرى كتير وكده يعنى
بس تعرفوا ده ليه لان دايما الواحد بيبص للى اقل منه فى حكاية الدين ويقول انا احسن من كذا وكذا انما فى الدنيا لأ طبعا ازاى انا لازم البس احسن لبس واسكن فى اشيك منطقة وكده يعنى

وبصراحة كنت ولازلت مقتنعة ان النقاب مش فرض
بس لما فكر( يا ليتنى قدمت لحت صح وخصوصا بعد درس (ياتى )) بتاع د/ حازم ربنا يرجعهولنا بالسلامة ياااااااااااااارب
بدأت اقول ايه الغباء ده اشمعنى يعنى فى الدين مش عاوزين نبقى فوق زى الدنيا

وقررت ان انا البس النقاب والحمد لله رب العالمين ربنا وفقنى ووقفلى صحبة الخيييييير اللى هما انتو طبعا
ووالله كان احسن يوم فى حياتى بجد وبعدها والله العظيم ربنا اكرمنى كرم انا ما استحقه والله خالص
ولكن ((((((( ومن يتق الله يجعل له مخرجا ويرزقه من حيث لا يحتسب )))))))) بموووووووت فى الاية دى
وبحب اعيش بيها اوى فى اى موقف

واسال الله الثبات لى ولكم اجمعين
آآآآآآآآآآآآآآآآآآآمين يا رب العالمين
آآآآآآآآسفة جدا للاطالة بس انا حبيت اقل كلوا وجهة نظرى ومشاعرى


بس انا يا جماعة فى حاجة نفسى اعرفها
هو المفروض ان انا انزل طبقة على عينى ولا لأ
بصراحة بحس ان انا ماشية مكسووووفة لما اشوف واحدة مغطية عنيها وانا لأ
بجد نفسى اخد الخطوة دى بس حاسة ان هى خطوة جامدة اوى

ادعولى يا يجماعة ربنا يثبتنى ويهدينى وقولولى اعمل ايه فى الحكاية دى

والسلام عليكم ورحمة الله وبركاته
ومستنية ردكوا

[يمامة المسجد]

السلام عليكم ورحمة الله وبركاته

جزاكم الله خيرا آلاء الله وعلياءوووووووووو آآآآآآآمين ياااااااااااارب

قصة لبس انا باه للنقاب

انا لابسة النقاب من 3 سنين والحمد لله

طبعا اني البس نقاب دي مكنتش في بالي خالص

وبعدين انا لما دخلت الجامعة ارتديت خمار

وتعرفوا أبي اساسا كان معتض على الخمار وقال هيلخبطني ويضايقني خاصة اني في كلية عملية

بس اعتراض أبي هنا مش اعتراض يعني مافيش لأ

انا كل حاجة بعملها ابي اعطاني فيها الحرية بدل اني لا اعص الله فقط هو يقول تعليقه

وبعدين

امي مرتدية النقاب من حولي 11 عام

يعني انا فكرة النقاب في دماغي بس طبعا بقول بعدين يمكن لما اتزوج

طبعا كان من رابع المستحيلات اني البسه وانا صغيرة

وعلى راي صحابي كانوا بيقولوا عليه عايقة

الحمد لله الذي عافانا

المهم كان من عادتي انا وبعض اصدقائي في الاجازة نقول لبعض عملنا ايه في الأجازة وانجزنا فيها ولا لأ

يعني القرآن والدروس وووووو

فبتصل بصاحبتي ربنا يجازيها خير بقولها انتي لغاية الوقتي انجزتي ايه وعملتي ايه ؟؟؟؟؟؟؟؟

وكان الجواب غريب جا بالنسبة لي انها لبسة النقاب

طبعا انا اتصدمت

نقاب

يعني مش لما تكبر شوية

سبحان الله وبعدها انا فكرت في النقاب فعلا بجدية

طبعا انا كنت عارفة فرضيته

وكنت مأجلة مادة في اولى دخلت الامتحان بالنقاب وكان حاجة جديدة جدا عليه

بس صراحة انا سعيدة جدا بالنقاب والله والله والله بحس اني ملكة متوجة

ولو حد يعرف ايه احساس المنتقبات لكل البنات بادرت بارتداء بالنقاب

ياااااااااااااااااااه في نقابي طاعة لربي

في نقابي عزتي

بجد بجد كل السعادة في النقاب


---------------------------------------------------

اما باه

حكاية البيشة ياعلياء

فدي ياستي فعلا صعبة جدااااااااااااااااااااااااااااااااااا

انا لما نزلتها كانت اكبر قرار في حياتي

يمكن هي اصعب من النقاب خاصة للي مش نزلنها من الأول

يمكن فعلا لو نزلتيها ياعلياء هتحسي بفرحة اكبر كما لو انك لبستي النقاب من جديد

بجد ياعلياء لازم تنزليها



والله ياعلياء راحة ليس بعدها راحة

تحسي خلصتي من الاختلاط والهم

وتحسي انك ماشية في عالم وحدك

محدش شايفك خالص ، وهما بيعتقدوا انك مش شايفة احد

افضل برده

وكمان بتعينك على غض البصر

يعني هترتاحي فيها جداااااااااااااا

بس خليكي قوية وانزلي بيها مرة بس

وبعدها هتحسي براااااااااااااااااااحة مابعدها راحة

الا طبعا في الجنة


عموما علياء جربي وبس واخرجي بيها هتفرحي جداااااااااااااااااااااااا

يلا باه عايزين نعرف قصص الباقييييين







على فكرة ياعلياء

انا مش عدلت في موضوعك انا كنت بعمل رد سريع وبعدين اتكيت على تعديل

[3alia2]

جزااااااااااااااااكى الله خيرااااااااااااا يا يمامة

انا بجد بحاول والله وان شاء الله هاتيجى قريب

ادعولى بالله عليكم
_____________________
يالا يا جماعة فين الباقى

[حفيدة عائشة]

والله يا يمامة مش عارفة اقولك ايه انتى جيتى على الجرح اللى عندى وانا للاسف مش عارفة اقول قصة نقابى لانى للاسف حتى الان مش منتقبة لانهم مش راضين خالص فى البيت كل لما اكلم بابا فى النقاب ميردش على ولما اجى اقوله طيب نتكلم واما تقنعنى او اقنعك مش بيرضى تماما مش عارفة اعمل ايه والله العظيم انا بيجيلى وقت وافكر انى البسه من وراهم بس انا عارفة انه مش هينفع خالص خالص
المشكلة الكبيرة عندى ان كل مكان بروحه كل اصحابى منتقبات ولما بمشى معاهم بحس انى مكسوفة جدا مش عارفة اعمل ايه حتى انى وصلت لدرجة ان اى واحدة من صحباتى كل اما اتكلم معاها بتكلم على النقاب وعلياء عارفة الموضوع ده...
فيه نقطة تانية محيرانى جدا هى انى انا مقتنعة بالنقاب جدا فى قلبى وهجنن كده والبسه النهاردة قبل بكرة بس المشكلة كل اما احاول ادعى فى السجود او اى وقت ان ربنا يرزقنى بالنقاب مش بحس انها طالعة من قلبى وطبعا لازم اصدق الله فى كل عملى.بس والله مش عارفة فيه ايه...لو حتى يقولى ده ايه بس
ادعوا لى يا جماعة ان ربنا يهدينى ويرزقنى الحجاب الحق ويهدى اسرتى ويوافقوا على النقاب قريب بقى

[يمامة المسجد]

الصدق ياأروى

صدقيني اختى الصدق والدعاء

أقلك فكرة

اسهري يوم طول اليل ، أو الجزء الاخير من الليل واستمري في الدعاء وابكي ابكي بجد بدموع طيب

خلي عندك يقين ان شاء الله هيردوا

وانتي بتقوليلهم خليكي قوية ومش متنازله

وان شاء الله هيوافقوا حلوتي

المهم ان شاء الله هتلبسيه

هدعيلك ان شاء الله بالاسم يا أروى

الواحد مش عارف هيدعي لمين ولا لمين

[رحمته أرجى لى]

موضوع رائع

وجزاكى الله خيرا يا يمامة ,ذكرتينى بيوم لبست فيه النقاب
انا لبسته من سنتين تقريبا بحمد الله
ووالله انا بحب ربنا جدا وفضله عليه كبير لايوصف
ياجماعة ربنا هوه اللى لبسنى النقاب مش انا اللى لبسته ,ربنا اكرمنى آخر كرم لا اعرف كيف احمده عليه
كنت مخطوبة وكان عايزنى اتنقب وكنت بكره النقاب للاسف
بعد فسخ الخطوبة ربنا انقذنى منه لانه ماكنش كويس
حسيت ان انا عايزة اقرب منه واشكره
وسبحان الله واحدة صحبتى دخلتنى مسجد السلاب لاول مرة فى درس الشيخ حازم وسبحان الله صحبتى دى بعد كده انتكست وبقت اسوا من الاول بس ربنا جعلها سبب مش بقولكوا كريم
ربنا جعل الشيخ حازم سبب ,كان بيتكلم على النار وبيقول انت تعبت عشان ربنا فى ايه
الكلمة دى هزتنى ولاقتنى بفكر فى النقاب رغم ان انا كنت لسه بسمع اغانى وبلبس تونيكات على بنطلون
ربنا اللى اراد انى افكر فى النقاب كده مرة واحدة
محدش شجعنى فى البيت ولا لاقيت صحبة بس اللى خلانى البسه الوساوس الكتيرة من ابليس اللعين حسيت ان النقاب ده مهم اوى والا ماكنش حصلتلى الوساوس دى,ماكنتش بنام من التفكير
وبعد كده واحده اعرفها لبسته وربنا اراد انى اقابلها رغم ان ماليش بيها صلة وسالتها عاملة ايه بالنقاب وحسيت انه مش تعيبها
ويارب لك الحمد لبسته ومن اول مرة نزلت البيشة وبقول لعلياء :فرق كبير انك تنزلى البيشه,انا مرة حاولت ارفعها بعد شوية شغل من الشيطان و سبحان الله يومها دخل فى عينى حاجة غريبة وعينية ورمت
حسيت انها رسالة من الله اللى لولاه ماكنتش وصلت للى انا فيه
انا بعد مالبسته على فكرة فكرت اقلعه00ليه مش عارفة لولا ان ربنا ثبتنى وشوفت رؤيا بعدها مافكرتش اقلعه تانى
والحمد لله انا دلوقتى فى معهد الدعاة والقراءات وربنا اكرمنى اخر كرم
ياجماعة ياللى لبستوا النقاب وانتوا لسه فى الجامعة000احمدوا الله على النعمة دى
انا نفسى كنت البسه بدرى كده زيكوا
هوه انا مش كبيرة اوى يعنى00هاها
واللى مالبستوش الحقى البسيه حتبقى اسعد واحده فى الدنيا
ادعوا لى ربنا يهدى اخواتى 00يارب

[يمامة المسجد]

الحمد لله على نعمته

[يمامة المسجد]

عايزين نسمع ميرو

[mero]

كل اللى حصل يا ستى انى من وانا صغيره وانا بموت فى حاجه اسمها نقاب ولما خلصت الثانويه العامه لبست الاسدال و النقاب بفضل الله وبعدها الشيخ حازم ادى الدرس بتاع مستنيه ايه ؟ انا كنت فرحانه وفخوره اوى انى لابسه نقاب حتى انا من اوائل البنات اللى لبسو نقاب صح من اول مره بفضل الله ومنه وكرمه وبعد الدرس لقيت اللى بخمار لبست نقاب واللى بحجاب لبست اسدال بفضل المولى عز وجل انا قولت اشمعنا هما بيعملو حاجه .. ساعتها نزلت البيشه على عينى واحتسبت الاجر انى كنت عاوزه اعملك يارب اكتر من كده بكتير بس ما بيدى .. بس يا ستى ده المختصر المفيد