&& يوميـــــــــــــات في الصيدليـــــــــــــة &&

[خديجة أحمد]

رد: مرحباً بكم في " College of Pharmacy " صيادلة المنتدي .

منورة يا خديجه الساحه وان شاء الله تستفادي مننا حته لو حاجه بسيطه

بارك الله فيكي

الله ينور أيامك
نحاول إن شاء الله
مع العلم أن حتى شكل الأدوية مختلف عن ما يوجد عندنا
جزاك الله خيرا أختي أمة الله

[امه الله1]

رد: مرحباً بكم في " College of Pharmacy " صيادلة المنتدي .

Day5

قبل ما اتكلم عن الروشتات
في شوية حاجات استفدتها حبيت اقولكم عليها
احيانا... وليس دائما ... ممكن تعرف الدواء ده بيتكون من ايه و فايدته ايه بمجرد انك تقرأ اسمه
!! ازاي يعني؟؟
بصوا و احكموا انتم


دول " مكملات غذائية " ... يعني للي مش بيتغذي كويس ..غالبا توصف في حالات سوء التغذية و الانيميا
زي ما انتم شايفين كلهم بيبدأوا بالمقطع Ferro
اذن هما اكيد في الاصل لعلاج نقص الحديد و فعلا ده صح
شطارتنا بقي اننا نخمن الجزء التاني معناه ايه
يا ريت تطلع فوق و تفكر شوية.. و بعدين اقرأ الاجابة
اممممممممممم
خلاويص ؟؟

.
.
.

Answer
1- FerroCAL = calcium >>>فيه نسبة عالية من الـCalcium و بتكون في صورة CaCO3
2- لتقوية الدم Ferro-6 = 6 materials mixed together >>> و هم : Iorn - vitamin C - Copper - Folic cid - vitamin B12 - Manganese
(عدّهم هتلاقيهم ستة........يا سبحان الله)
3-"FerroZinc-c" >>ده بيشمل حاجتين بنسبة كبيرة الي جانب الحديد و هما الZinc و Vitamin C اللي بنسميه Ascorbic acid زي ما درسنا
4-FerroFOL >> ده فيه Folic acid بنسبة كبيرة




vitamens <==== Eye Vit مفيدة لتقوية النظر

.:: حاجة تانية بقي ::.
اثناء ترتيب الادوية انهاردة شفت "بالصدفة" الـــEnema
(Enema = حقنة شرجية)
و سبحان الله شكلها غير ما كنت متخيلاه خاااااالص

تستخدم لتفريغ الbowel (الامعاء) قبل العمليات و الاشعة و ممكن لعلاج الـ constipation
و يعرف هذا النوع بــevacuation Enema أي enema التفريغ
فيه نوع تاني اللي هو Retension enema اللي بنحتاج انها تفضل في الجسم فترة و ليها خواص علاجية باختلاف الدواء اللي فيها ..بس دي مش في الصيدلية .. بتكون موجودة في المستشفيات و تتعلق بطرق خاصة زي المحاليل كده..





فيه اقراص مشهورة اوي و بتتطلب كتير اسمها Cataflam
دي بتستخدم كــ مسكن و مضاد للالتهاب
(Analgesic and Anti inflammatory)
اللي علي يمينك في الصورة اسمه Catafast
ده نفس الCataflam بالظبط و نفس المواد و التركيز برده 50 mg
لكن معمول في صورة حبيبات بندوبها في مية و ناخدها ..بتكون اسرع في المفعول
لانها بتنتشر مباشرة مش محتاجة يحصلها disintegration ولا deaggregation زي الCataflam tablets
عشان كده لما واحد ييجي يقولك انا عاوز كيس cataflastمتستغربش...

نيجي بقي للروشتات... وما ادراك ما الروشتات .. و ما أروع خطوط الدكاترة .. و الحول الحول يا أختي

قراءة الروشته اللي غالبا بتتكتب بالعبري بدل العربي
مشكلتها ان الدكتور بيكتب اول 3 حروف و لو كريم اوي ممكن يوضح اخر حرف... و اقرأ بقي يا حلو !

عشان كده ممكن نقول ان قراءة الروشتة اللي مش ولابد تعتبر " فن " لا بد من اتقانه

ازاي؟؟
1-من اهم الحاجات ان اسم الدواء يكون عدي عليك قبل كده
مهم جدا جدا جدااا و انا حتي الان معظم الاسامي اللي شفتها و جت روشتات عرفت اقرأها اما لو مشفتش الاسم قبل كده صعب اوي
عارفين زي ايه ؟
لو قلتلك
تفــــــ~ـــــا ــة
هتحس انها تفــاحة
برتــــ~ـــالة
هتحس انها ... برتقالة
لان عقلك بيقدر يصورلك الحروف الناقصة من خبرتك السابقة بالفواكه
2-شوف اسم الدكتور...اغلب الروشتات بتكون من العيادات اللي جنب الصيدلية و دكاترتها انت بتكون عارفهم
د\ اشرف بتاع الاطفال
و د\ عادل بتاع العيون
و د\محمد بتاع الاسنان
مثلا يعني ..
فلو شكيت بين كذا دواء ..الاحتمال الاكبر بيكون للي بيخدم التخصص بتاع الطبيب .. دي مش قاعدة لكن غالبا يعني...
مش هتصدقوني لو قلت مرة روشتة طبيب اسنان لاقيت مكتوب فيها دواء للمغص
ولما سألت أ\"صاحب الروشتة"... قال انه اشتكي للدكتور ان بطنه بتوجعه فكتبله الدواء ده
3- لو شكيت بين دوائين ممكن تعرف الدوا الصح بالاستبعاد ..
مثلا لو مكتوب انه دواء شرب :syrup ممكن واحد بس من اللي انت شاكك فيهم يكون كده
نفس الكلام بالنسبة للتركيز و للdoasge form نفسها ..هل هو لبوس ولا مرهم ولا قطرة ..النقطة دي بتفيدك في بعض الحاجات بس مش كلها لان شركات كتير بتنتج الدواء بـdosage forms مختلفة

4- بعض الادوية ممكن تتعرف من خلال طريقة الاستخدام اللي الدكتور كاتبها .. لكن ده محتاج خبرة شوية عشان يتلاحظ و انا حسيت بالحكاية دي من مدرباتي لكن طبعا انا معنديش الخبرة دي بتاتا ...

بس عشان محدش يدايق
احيانا ... بتيجي روشتات خطها بس الله ما شاء الله جميل جدا و كل الحروف واضحة وضوح الشمس ...حتي لو دواء مشتفوش قبل كده سهل انك تتعرف عليه
و فـــــــــــــي بقي
روشتات مكتوبة بالكومبيوتر...تحفة طبعا و ربنا يكتر من امثالها ..قولوا آميييين

للأسف هي واحدة يتيمة بس اللي شفتها بالكومبيوتر...لكن الامل في ربنا كبير ..

ده بالنسبة للروشتات ... في ناس تانية (تمثل نسبة 40-30 % في بعض الايام و 60% اياما اخري) مش بيكون معاها روشتات
و دي هنقسمها ل4 أنواع
____الأول____
ناس بيكون معاها علبة قديمة للدواء اللي هما عاوزينه
____الثاني___
ناس بيكون معاهم ampoule أو شريط للدواء اللي هما عايزينه
بنعمل ايه؟؟
بنبص علي ظهر الشريط بنلاقي اسم الدواء مكتوب عليه
لو أمبول نقرأ اسم الدوا من عليه
____الثالث____
ناس بتكون معاها اسم الدواء مكتوب في ورقة او نوتة مش روشتة
غالبا الخط بيكون واضح و سهل انك تقرأه باذن الله
_____الرابع_____

ناس بتقولك اسم الدواء "شفاهيةً "
غالبا بتحتاج انك تكون عارف الدواء قبل كده
و الا هتعد تقول: هـــــــا ؟؟ نعم ؟؟ ايه؟ افندم ؟؟!!
و ساعات بيكون العيب مش منك و بيكون المريض هو اللي مش عارف ينطق اسم الدواء صح !!...و ده بيحصل غالبا لما يكون اللي جايلك ولد او بنت صغيرين و ساعات بنضطر نرجعه البيت تاني يتأكد من الاسم او يجيبه مكتوب في ورقة


طيب... لو حد بقي جالك و كان عاوز يرجع دواء مش يشتري...
قاعدة اساسية قبل اي حاجة :
"أدوية التلاجة مبرتجعش"
..مهما كان السبب ..لو حتي لسه متباعة من 5 دقائق طالما خرج برة الصيدلية خلاص No Way انها ترجع
أدوية التلاجة مبترجعش...احفظ الجملة دي لانك هتستخدمها كتير
طيب ليه مبترجعش؟؟ ما احنا لازم نفهم برده !
ايه هي أدوية التلاجة الاول؟؟
حتي الان انا اعرف : الهرمونات .. اشهر حاجة الانسولينطبعا
والhuman albumin بياخدوه مرضي الكبد ..عافانا الله و إياكم

المشكلة بقي ان الحاجات دي لازم تتحفظ جوه التلاجة لان الحرارة بتبوظها و انت مش ضامن ان الدواء تم التعامل معاه بشكل صحيح بعد بيعه ...فنظرا لحساسية الدواء الفائقة ..الدواء بيجي الصيدلية في تلاجة و يتحط في تلاجة الصيدلية و يخرج بعد كده مع المريض بلا عودة

لو الدواء مش بيتحفظ في التلاجة ..
ممكن تسمح برجوع الدواء خلال يوم او يومين
لان ممكن المريض يكتشف مثلا ان لسه عنده زيه في البيت
او يكشف عند طبيب تاني فيوصفله دوا مختلف فيبدل القديم بالجديد
لو كان عميل او شخص معرفة يعني احيانا بيُسمح بــ 4-5 ايام طالما انك واثق من الشخص ده

اذا الدواء مكنش اتلمس و متاخدش منه حاجة ...بنستبدله بالدواء التاني و بنحسب الفرق بين الدوائين سواء بالزيادة او النقصان
و علي هذا الاساس يتحدد اذا كنت هتدي للمريض فلوس ولا هو هيدفعلك الزيادة

لو المريض كان واخد قرص مثلا من احد شرايط العلبة
بيتحمل ثمن الشريط و بياخده معاه و بعدين نعمل نفس العملية الحسابية بس بنـكنسل الشريط ده

المرة الجاية ان شاء الله هتبقي في صورة "مواقف"
هتكلم فيها عن ما استفدته من صرف الروشتات
و الاخطاء اللي كنت بقع فيها و اتعلمت منها ايه

تابعونا,,,,,,

[طريقي لربي]

&amp;&amp; يوميـــــــــــــات في الصيدليـــــــــــــة &amp;&amp;

ما شاء الله
كويس اوووووى يا أمة
فكرتينى بالمواقف والرشتتات
بس اكتر حاجة بيخة
ان حد ييجى وعايز دواء معين بس مش عارف اسمه وممكن ميكنش عارف لعلاج ايه كمان
نقعد نقلب الصيدليه عشان الدواء
بعدين يقول .... العلبه لونها اصفر
نقعد ندور وفى الاخرررررررررررررررررر
يلمح المريض علبة على الرف لونها بينك ....ويقول
هوه ده .....
بس والله الشغل ده ممتع اوووى رغم اللى بيحصل
متابعة بإذن الله

[فاطمة سعد]

رد: مرحباً بكم في &quot; College of Pharmacy &quot; صيادلة المنتدي .

وعليكم السلام ورحمة الله وبركاته
معلومات جميلة فعلا وخاصة التى تتعلق بادوية التلاجة
ربنا يوفقك يارب للخير

[خديجة أحمد]

رد: مرحباً بكم في &quot; College of Pharmacy &quot; صيادلة المنتدي .

وعليكم السلام ورحمة الله وبركاته

روشتات مكتوبة بالكومبيوتر...تحفة طبعا و ربنا يكتر من امثالها ..قولوا آميييين

اللهم آآمين
حاليا شفت أكثر من وحدة هناك أمل أليس كذلك ؟
الكثير من المواقف التي ذكرت حصلت معنا رغم قصر الفترة التي بدأت فيها التدريب
جزاك الله خيرا أختي
شوقتيني للفقرة المقبلة أكيد مفيدة بإذن الله
في انتظارك وفقك الله

[*تائبة إلى الله*]

رد: مرحباً بكم في &quot; College of Pharmacy &quot; صيادلة المنتدي .

جزاكي الله خيرا اختي فيروز والله رفعتي من روحي المعنويه
وبارك الله في خديجه والهام

هو ده
يا رب تكون معنوياتك دايما مرتفعة
رزق الله الجنة غاليتي
جزاك الله خيرا و بارك فيك

[امه الله1]

رد: مرحباً بكم في &quot; College of Pharmacy &quot; صيادلة المنتدي .

Day6

بسم الله ...نبدأ

Scene 1

واحد دخل يطلب " مجموعة البرد "

فواحدة من مدرباتي قالتله ان احنا مش بنبيع مجموعات للبرد

و قالت انه هيكون افضل لو اخد دواء للبرد ..(Decongestant)

الراجل مقتنعش و مشي ....

لما سألت ايه مجموعة البرد دي؟؟

طلعت قرصين مضاد حيوي (2 بس) و شوية فيتامينات و مسكن و خافض للحرارة

طبعا الكلام ده مش هيشفي ده هيخفف الالم مؤقتا

حد في الدنيا ياخد مضاد حيوي يوم او اتنين و خلاص

؟؟!!؟؟

بس هي ثقافة عند بعض الناس .. و مرتاحين علي كده

Scene 2

بنوتة طلبت مني لبوس جلسرين ... لما رحت اجيب لاقيت نوعين
نوع للأطفال ...و نوع للكبار.... جبت علبة من الاتنين و رحت قلت لاحدي مدرباتي
جت معايا و سألت البنوتة ... الدواء ده لمين؟
قالت ليا ...
فادينالها بتاع الاطفال

Scene 3

واحد داخل من غير سلام عليكم حتي ... و معاه ورقة متبهدلة اخر بهدلة و مكتوب عليها بالعربي "تـرامال"(Tra === Tramal >>NARCOTIC)(مخدرات) و اسم دواء كمان لا اذكره و لكن كان مسكن عادي يعني
و كاتب تحت اسم دكتور و رقم موبايله (برده بالعربي)
اخدت منه الورقة و قالي.. انا عايز الحقنتين دول يا بنتي عشان انا هعمل عملية تفتيت حصوة و جنبي بيوجعني ..
انا اول ما شفت اسم ترامال ... تسارعت دقات قلبي
الراجل كان شكله مريب
بس .... ربنا بيثبتك في المواقف دي متعرفش ازاي
ابتسمت
قلتله طيب انا هسأل الدكتورة اذا كانت الادوية دي موجودة ولا لأ .. اصل انا تحت التدريب لسه ..
رحت لمدرباتي و وريتهم الورقة ..
واحدة قالتله : اتفضل هنا يا حج
سألته الدكتور كاتبلك الحقنة دي امتي
قال: من يومين و انا اخدتها بس عاوز واحدة كمان عشان الوجع
قالتله: للأسف مش متوفر عندي الدواء الاول ... الدواء التاني عندي و هو مسكن كويس جدا و هيريحك علي طول
قال لأ انا عاوز دي (علي الاولي)
قالتله معلش هي خالصة من فترة كمان اسبوعين ان شاء الله
نجيب لحضرتك المسكن؟
قال لأ خلاص شكرا
و اخد الورقة و مشي
بعد الراجل ده جالنا 2 تانيين بيطلبوا نفس الدواء
واحد زبون موثوق منه حسب كلام مدرباتي و معاه رروشة من دكتور جنبنا
التاني دخل يقول عايز برشام ترامال لو سمحتي ؟!!
ملحقتش ارد واحدة من مدرباتي قالتله مش موجوووود
فلف و خرج علي طول


Scene 4



واحدة جت بروشتة مطلوب فيها Human albumin
طلعت جبتهولها من فوووق (صنف تلاجة)
مدربتي قالتلها خلي بالك ده مبيرجعش
حركت دماغها موافقة (لفوق و تحت )
قالتلي ان ده عشان اختها .. و سألتني هو ده ينزل الماء الله في جسمها؟؟!
قلتلها معرفش بصراحة...انا لسه تحت التدريب
قالتلي ان اختها منتفخة و " ورمانة " و هي مش عارفها تعمل لها ايه
المدربة قالتلها : طالما الدكتور كاتب الدواء اكيد هيفيدها ... الدكتور عارف هو بيعمل ايه ..... بالشفاء ان شاء الله
(ملحوظة كل اللي واقفين في الshift معايا مش صيادلة)
قلتلها : حضرتك لازم تخلي بالك ان الدواء ده بيتأثر بالحرارة
قاطعتني و قالت : بجد ! .... طيب احطه في الفريزر بقي
قلتلها : لأ لأ لأ ..... يتحط في التلاجة عادي مينفعش يتحط في الفريزر !!
قالتلي : حاضر
....افرضوا مكنش حد قالها بقي... و ليه الطبيب مش مفهمها الدواء بيعمل ايه ولا معرفها اختها عندها ايه؟؟
ضايقني الموقف ده ... بس حسيت ساعتها بقيمة الصيدلي
لو كنت اكبر شوية يمكن كنت اقدر افيدها و اشرحلها الانتفاخ من ايه و اطمنها ...
يا تري حسيت بقيمتك....


Scene 5

في هذا الموقف ... احكي لكم اول دواء اقرأه في روشتة في حياتي
متتصوروش مدي سعادتي في هذه اللحظة
للاسف كان موقف محرج ..
مش بقوله عشان اعمل من نفسي اضحوكة او حاجة
لأ
عشان تستفيدوا من خطئي .... الشنيع
شوقتكم ؟؟
:
:
تمهيد الاول و تبرير للخطأ اللي عملته
كان قبل الروشته المشهودة 3 تانيين كلهم أقراص معرفتش أقرأ اساميها
فأول ما لاقت نفسي عارفة اقرأ الاسم ... بعد عناء طبعا
"Dolphin-k"
ماهذا؟
يا للهول
لا أصدق
قرأتها يا عالم ....
قرأتهااااااااا
زووووووووووووووووو ع الTABLETS
و جبتها في ثواني و رجعت و قد ظفرت بأول دواء اجيبه من روشتة قرأتها بنفسي
و لكن.....
قطع هذه النشوة و الفرحة الغامرة صوت مدربتي تهمس في اذني
مكتوب لبوس يا بونبونة .... مش أقراص
ذهبت الي قسم الsuppositories متثاقلة الخطوات
و جبت العلبة و قبل ان اعود الي مدربتي
اخذت نفسا عميقا و قلت لنفسي
لا تيأسي...... طالما تقدمتي,, لا بأس
و عدت اليها بسرعة و حاسبنا الراجل و انصرف

بعد كده بقيت باخد بالي كويس من الdosage form
بقرأها حتي احيانا قبل الدواء
لم يتكرر هذا الخطأ بفضل الله سوي مرة كمان اخبركم بها في الموقف التالي


Scene 6

روشتة مكتوب فيها دواء kenacomb cream
(الدواء ه بيتطلب كتير اوي ... حطه في دماغك)
رحت عند الtopicals و جبته .. بس كان فيه صفين جنب بعض
و مكنتش اعرف ان فيه منه (مرهم) و (كريم)
يعني افتكرت ان الصفين من نفس الدواء و ده وارد في أدوية كتير بتلاقيها صفين جنب بعض عادي
فاخدت من اليمين .. كما عودتنا السنة
و رحت للكاشير... مدربتي قالتلي بصي هنا .. ده مرهم اللي جنبه هو الكريم ....
رحت جبت التاني و حاسبت الراجل و مشي





Scene 7


خطأ يشبه اللي فات اللي حد كبير
روشتة مكتوب فيها Epifenac supp
كلام جميل خالص
بس لما رحت اجيب الدواء لاقيت عندي 3 تركيزات مختلفة


جبت علبة من كل واحدة من التلاتة و رحت بصيت ف الروشتة تاني لاقيت المطلوب 25 mg

.
.
مثال آخر



الE-Mox ده مضاد حيوي معروف
علي يمينك capsules 500 mg
و في نص شمالك 500 mg ايضا بس vial (حقن)
و حواليها حقن برده من نفس الدواء لكن بتركيزات مختلفة
.
.
.
~~.:: الخلاصة ::.~~
لا يكفي ان تتأكد من الdosage form بس
لأ كمان التركيز بتاع الدواء لازم تاخد بالك منه
اسم الدواء...هو نصف اللغز فقط


أكمل ان شاء الله بالليل ... عشان محدش يمل
هتكلم عن مــ & مــ ؟؟؟؟
حد يعرف يعني ايه
في أمان الله
تابعونا,,,,,,,

[امه الله1]

رد: مرحباً بكم في &quot; College of Pharmacy &quot; صيادلة المنتدي .

Friday

هنتكلم هن م&م إن شاء الله ...........
حد يعرف يعني إيه؟؟؟؟؟؟؟؟؟

المعني الذي قصدته هو مواقف انسانية مع المرضي

بعضها مضحك

بعضها مبكي
و بعضها يلهمك



Scene 1

بنوتة صغنونة معاها عروسة جاية.. مع مامتها ... الأم كانت عاوزة Cataflam tab
50mg
(بقيت باخد بالي من الdosage form و التركيز اهو )
بعد ما جبتلها الدواء..لاقيت البنت بتشد كم عباءة مامتها و بتقلها في ودنها ..صوتها كان عالي لكن مكنتش عارفة اني سامعاها
......
"ماما .. ماما ... انا عاوزة بامبرز للعروثة بتاعتي"
الام قالتلي معلش هو عندكم بامبرز مقاس صغير اصل بنتي اللعبة بتاعتها بتغرقلنا الدنيا في البيت...
انا مكنتش قادرة امسك نفسي من الضحك بس ضغط علي اعصابي و قلتلها حاضر ثواني
رحت جبت واحد و رجعت
حطيته في كيسة تانية و معاها لبانة
و اديته للبنوتة
و سألتها اسم عروستك ايه
قبلت العروسة في جبهتها و قالتلي : ياثمين
قلتلها تتربي في عزك و عقبال ما تشيلي ولادك بجد ان شاء الله
مامتها اعدت تضحك فلقيت ان الفرصة متاحة اني اضحك
فضحكت... و يا ريتني ما ضحكت
لاني
فضلت اضحك طول اليوم
يا الله
فين ايام الطفولة و راحة البال


Scene 2

دخلت امرأة عجوز الصيدلية... اخبروني بعد ذلك انها زبونة قيمة جدا من اول ما الصيدلية اتعملت
كانت روشتتها عبارة عن مسكنات و علاجات لآلام الاسنان لا اذكر اسمها
بعد ان احضرت الادوية وكتبت التعليمات علي ظهر العلب
سألتني هل الدواء الفلاني يعالج حقا ام هو مسكن مؤقت
طبعا ...تنحت !!
نظرت الي مدربتي التي كانت تقف وراء المرأة العجوز فاشارت لي بنعم ..فقلت لها نعم يعالج
لكن طبعا المرأة حكيمة فشعرت بارتباكي من السؤال
فقال لي : انتي دكتورة بجد ولا ايه ؟؟؟
انا قلتلها انا في سنة اولي صيدلة و تحت التدريب
اكتشفت بعد كده ان سؤالها ده مكنش بسبب ارتباكي ولا حاجة
دي كانت بتحاول تجر معايا في الكلام
لانها وقفت نصف ساعة كاملة تتكلم و انا انصت لها باهتمام
حكت لي تقريبا قصة حياتها كلها و قصة ابنها و بنتها
لا داعي لذكر التفاصيل
ولكن عندما تلخص لك امرأة سبعين عاما عاشتهم و تقصها عليك في نصف ساعة ....تتشرب من الحكم ما لا يحصي

و ستتيقن ان الصدف لا وجود لها .. بل كل شئ مدبر من لدن حكيم خبير
سبحان الله
ربنا يكرمك يا أم محمد


Scene 3

كل حين و اخر يأتي أشخاص لقياس السكر او الضغط في الصيدلية

كل واحدة من مدرباتي لها طريقتها الخاصة في التعامل مع هؤلاء الأشخاص
احداهن لا تنظر الي المريض اطلاقا تضع الجهاز و تقيس و تقوم بعملها دون اي تعبير علي وجهها ...كأنها لا تفعل شيئا حقا
ثم تقول للرجل الرقم ... فيضع النقود علي الزجاج امام مدربتي و ينصرف
و اخري ... تقوم بقياس ثم تخبره بالرقم ... و تقول له بوضوح ان كان قد تحسن أم لا ...و غالبا ما تنصحه بمراجعة الطبيب
و اخري ...تسأله متي كانت اخر مرة تناول فيها الطعام .. هل هو صائم ام لا ... كيف هي احواله النفسية
ثم تقوم بالكشف و تقول له ما شاء الله جيد جدا ...حتي و ان كان سيئا و مرتفعا (مرة وصل لحد 200\120) لا تفزعه بل تخبره بانه بانه جيد ولكن مرتفع بعض الشئ و تطيب خاطره و تطلب منه مراجعة الطبيب و ان يمر بعد يومين لتعيد القياس مرة اخري
لن تستغربوا ان قلت ان كل من قاست لهم مدربتي (الاخيرة)
يأتون دائما للقياس عندنا ...و يخرجون مطمئنين دائما
يا له من هدف سامي..ان تنشر الطمأنينة بين الناس
و ما اروع من يسعون لذلك
التقدير كل التقدير لهم

(طبعا انا مجربتش اقيس لا سكر ولا ضغط ... اكتفي بالمراقبة عن قرب فقط ..مؤقتا)

Scene 4



ما هذا؟؟؟
قلم الانسولين
لا يعرفه الكثيرون لانه لم ينتشر الا حديثا

جاءت سيدة بعد صلاة الظهر بقليل لا اذكر كم كان الوقت بالتحديد
هي سمينة بعض الشئ ... تبدوا لي في اواخر الاربعينات من عمرها و يبدوا عليها التعب و الارهاق...الجو كان حارا فكانت تتعرق بغزارة لم اشاهدها الا في ماتشات الكورة ... ولا ابالغ في ذلك ..
اخرجت قلم انسولين يشبه الذي في الصورة ولكنه رمادي اللون و زجاجة انسولين و سألت مدربتي عن طريقة استخدامه
فاستأذنت منها معلمتي ان تصعد للصيدلي فوق في مكتبه لتعرف منه الطريقة بالظبط ثم ستعود لتخبرها
و اخذت منها القلم و صعدت
طلبت مني المرأة كرسيا ...
فاحضرت لها الكرسي
دعت لي دعوات لم اسمعها من قبل حتي ظننت ان رحمات الله تتنزل علينا من اجلها
ثم قالت: معلش يا دكتورة هتعبك معايا ممكن تجيبيلي مية اصل انا عطشانة اوي
ولكن
انا من كانت عطشانة اشد العطش لمثل هذه الدعوات فانطلقت لاعلي (عند التلاجة) و احضرت لها ابرد ماء وجدته
فشربت و استرسلت في الدعاء
فطمعت في المزيد من الدعوات فذهبت لاحضر لها مناديل لتجفف بها وجهها الذي يتصبب عرقا
فدعت لي مجددا ... فابتسمت و سألتها اذا كانت محتاجة حاجة تانية
قالت لأ
فانقطعت هذه الدعوات الجميلة ...
ظللت واقفة الي جانبها الي ان عادت معلمتي و وقفت اتعلم معها طريقة عمل القلم
" يتم تركيب الانسولين داخل القلم ثم تقوم بلف العداد في قاعدته الي ان يصل الي رقم الجرعة اليومية المعتادة ..التي يصفها الطبيب ثم توجهه عموديا الي فخذك او علي ذراعك مثلا و تضغط علي قاعدته لتخرج الجرعة المناسبة التي حددتها..تماما كما تضغط علي قاعدة قلم الاسنان ليخرج السن "
طلبت المرأة بصوت يبدو عليه الاحراج ان تعيد عليها معلمتي الطريقة مرة اخري
فقامت بذلك ثم اعطتها القلم لتدور اسفل القلم و تجرب ان تحدد الجرعة بنفسها
كانت متوترة فلم تستطع ان تلفه بشكل صحيح
فقالت لها معلمتي: معندكيش حد في البيت يعملهولك
فعم سكون للحظة مرة طويلة ثقيلة علي تلك السيدة علي ما اعتقد
ثم انفجرت في البكاء
فابكت معلمتي و ابكتني انا ايضا
دون ان تنطق بكلمة واحدة
وحتي الان لا ادري ما خطبها
ولكن كان بودي ان اضمها الي صدري و لكن خشيت ان يزيدها ذلك الما ... فآثرت البقاء بجوارها دون ان انطق بكلمة
انحنت معلمتي الي تلك المرأة (التي كانت تجلس علي الكرسي)
و شرحت لها الطريقة مرة اخري ببطء الي ان تمكنت بفضل الله من التعامل مع الجهاز
فدعت لنا مرة اخري و لكنني لم اكن اركز مع كلماتها في ذلك الوقت
شغلني امر آخر
شعرت بالخجل من نفسي.... فكم انا مقصرة في حق الله كثيرا
كم يوم مر علي وانا في مكرمة منعمة و لم اشكره
و كم يوم مر وقد اصابني بعض الوجع او الهم و انزعجت و لم اصبر صبرا جميلا
جعلتني هذه المرأة ادرك و لأول مرة معني جملة :
"ابتسم...فهناك دائما من هو أشقي منك "

دول اكتر مواقف اثرت فيا...فيه ملايين المواقف الاخري و لكن سأترككم تكتشفونها بأنفسكم لما تنزلوا ان شاء الله الصيدلية
قريـبا
.
.

ادعو الله ان بحفظكم و يهدينا جميعا لما فيه الخير لبلدنا و مهنتنا و انفسنا و اهلنا و دنيانا و اخرتنا
جزيل الشكر لكل من دعمني
و كل من تابع
اكمل غدا بعد العمل ان شاء الله
في حفظ الرحمن ...

تابعونا,,,,,,,,,

[خديجة أحمد]

رد: مرحباً بكم في &quot; College of Pharmacy &quot; صيادلة المنتدي .

جزاك الله خيرا أختي أمة
ففعلا مثل هذه المواقف ما أكثرها
أذكر موقفا حدث الأسبوع الماضي جاءت امرئتان لعمل تحليل الحمل
فقمت بعمل التحليل وكانت المعنية بالأمر حاملا لكنها لم تحضر بنفسها
فور إخبارنا لهما عن نتيجة التحليل
بدأت إحداهما بالبكاء وطلبت منا التأكد من الأمر فأكدنا لها نتيجة التحليل وأن المرأة حامل
ضمتني أنا ومدربتي وهي تبكي فرحا
واكتشفنا بعد ذلك أن هذه التحليلة خاصة بزوجة ابنها التي لم تلد منذ 10 سنوات
يا الله لكم اقشعر بدني لهذا الموقف وسررت جدا
أسأل الله أن يتم حملها على خير ويرزقها الذرية الصالحة المعافاة وكل محرومة يا رب

[فاطمة سعد]

رد: مرحباً بكم في &quot; College of Pharmacy &quot; صيادلة المنتدي .

وعليكم السلام ورحمة الله وبركاته
يا الله ما لها من مواقف مؤثرة فعلا
بارك الله فيكِ ونفع بكِ وجزاكِ عنا خيراً وعن سائر من تكونن سببا فى إدخال السرور على قلبه
بوركتِ

[كونى قوية]

رد: مرحباً بكم في &quot; College of Pharmacy &quot; صيادلة المنتدي .

يا صيادله بالله عليكم عاوزه حد يقولى ازى اذاكر فايتو كويس ازااااااااااااى


اعملها ع هيئه جدول ولا اذاكرها عادى ولا اعمل ايه انا خلاص زهقانه ع اخرى وامتحانات mid teermمش حليت كويس


الله المستعاااااااااااااااااااااااااان

[طريقي لربي]

رد: مرحباً بكم في &quot; College of Pharmacy &quot; صيادلة المنتدي .

لا حول ولا قوة الا بالله
هوه مفيش حد مرتاح فى صيدلة !
أختى انا بذاكر فيتو بالورقة والقلم بس بصراحة
مش بعمل جداول فى كله
بس بذاكر جزء مثلا ولازم تانى يوم اراجعه كله فى صورة اسئلة
بحس انه ثبت شويه بفضل الله ..
بس طريقة المزاكرة تختلف لو كان عقاقير مش فيتو
عقاقير ....لاااااااااااااااااااااااازم جداول ومقارنات
اتمنى ان اكون ساعدتك
وانتظرى رد الاخرين ..ان شاء الله يساعدوكى اكتر منى
ووفقكِ الله ويسر لكِ

[امه الله1]

رد: مرحباً بكم في &quot; College of Pharmacy &quot; صيادلة المنتدي .

[QUOTE=صيدلانية مسلمة;1060187663]يا صيادله بالله عليكم عاوزه حد يقولى ازى اذاكر فايتو كويس ازااااااااااااى


اعملها ع هيئه جدول ولا اذاكرها عادى ولا اعمل ايه انا خلاص زهقانه ع اخرى وامتحانات mid teermمش حليت كويس


الله المستعاااااااااااااااااااااااااان[/QUOTE
اختي ياريت تقوليلي بتخدي إيه في الفيتو بس عشان أقدر اقولك؟
لوكان v.o والحجات دي لازم تجمعي الاسامي كلها في جدول
اما لو كانchromatography
دي مش ينفع تتجمع في جدول تتذاكر كده
وهستنا ردك عشان اوضحلك أكتر بس ياريت تقوليلي الاجزاء بالتفصيل بارك الله فيكي.

[رقية 2]

رد: مرحباً بكم في &quot; College of Pharmacy &quot; صيادلة المنتدي .

مباااااااااااااارك أمة على الوسام الجديد ربنا يجعل تعبك في ميزان حسناتك يااااااااااااارب

[امه الله1]

رد: مرحباً بكم في &quot; College of Pharmacy &quot; صيادلة المنتدي .

مباااااااااااااارك أمة على الوسام الجديد ربنا يجعل تعبك في ميزان حسناتك يااااااااااااارب

ربنا يبارك فيكي يارقيه ياااااااااااااااااااااااااااااااااااااااااارب يا رفيقتي الغالية