إعـــــــلان

تقليص
لا يوجد إعلان حتى الآن.

بوت شمواه

تقليص
X
 
  • تصفية - فلترة
  • الوقت
  • عرض
إلغاء تحديد الكل
مشاركات جديدة

  • بوت شمواه

    -حبيبتي
    *ايوة يا احمد
    -العيال ناموا؟؟
    *أها.. ليه؟
    -طب تعالي
    *ليه؟!
    -عايزك لمدة ساعة تنسي انك مراتي و تيجي معايا.. ممكن؟
    *يالهوي يا احمد خنتني؟؟!!
    -ايه بالظبط ف اللي انا قلته اوحالك بالفكرة العظيمة دي؟؟؟
    *ماهو عايزني أنسى اني مراتك ليه؟؟.. اكيد خنتني و هتقولي عايزك تسمعيني كأنك واحد صاحبي و تكوني هادية و الهري بتاع الرجالة ده!
    -اهو انا عايزك تنسي انك واحده تحديدا عشان طريقة التفكير الحريمي دي!!..
    هتيجي ولا مش هتيجي؟؟!!
    *هاجي.. اما نشوف!
    -ألبسي طيب و هستناكي ف العربية
    *ألبس؟!.. و عربية؟!!.. اوباااا.. لا ده انت كده اتجوزت بقى مش خنتني بس!!..
    اتجوزت عليا يا احمد؟!!!
    -قسما بالله لو ما سكتي و دخلتي تلبسي و كنتي ف العربية كمان ١٠ دقايق، هتجوز ال ٣ اللي فاضلينلي ف خلال اسبوع!
    *ماشي يا احمد.. اما اشوف!
    --------------
    **ف العربية**
    *ها؟.. في ايه؟
    -انسي انك مراتي الاول..
    *ايوة يعني اعمل ايه؟؟.. اقلع الدبلة يعني و لا اعمل ايه؟!
    -لا، يعني تحرري عقلك من روتين الجواز و قوالب الزوجات و غباء المحشي و البيتزات و ميكانيكيات الجري ورا العيال بالشبشب ف الشقة..
    *انت لما بتطلب معاك فلسفة كدة بتبقى عملت مصيبة او ناوي تعمل مصيبة!..
    أنجز، عملت ايه؟!!
    (بيقف بالعربية)
    -انزلي
    *خلاص خلاص.. هسكت..
    اديني نسيت اني مراتك.. قول يا فيلسوف!..
    -فاكرة لما كنّا مخطوبين؟
    *ايوة فاكرة!.. ها؟
    -طب فاكرة احنا بقالنا اد ايه متجوزين؟
    *عشر سنين.. في ايه يا احمد؟!!
    -من وقت الخطوبة لحد دلوقتي، عشر سنين، احنا فين يا حبيبتي؟
    راحت فين لهفتي عليكي؟.. راح فين حبي ليكي و سعادتي لما كنت أبص ف وشك؟؟.. راح فين شغفك و اهتمامك لما كنت اقعد اكلمك عن حاجة و انتي بتسمعيلي بمنتهى الاهتمام؟؟
    راح فين اهتمامك بشعرك و جسمك و اكسسوراتك؟؟
    راح فين البووت الشمواه اللي كنت بتهبل لما اشوفك لابساه؟
    *عايز توصل ل ايه يا احمد؟!!
    -أرجوكي جاوبي على أسئلتي.. انا حاسس بملل رهيب.. حاسس اني مش متجوز.. روتين حياتنا خانقني!..
    و مش عارف اعمل ايه!.. و مش عارف اكلمك!..
    كل مافتح الموضوع معاكي تهربي!
    *عايز تعرف يا احمد؟؟؟
    -ايوة عايز اعرف!
    *مبدئيا البووت الشمواه رميته من خمس سنين بعد ما خلفت ملك
    لانه داب و مكانش ينفع البسه.. و ماشتريتش تاني عشان الفلوس احنا أولى بيها ف مصروف البيت!..
    اكسسواراتي مرمية ف درج الشوفينيرة ماليش نفس البسها عشان عينك مابقتش تشوفهم خلاص!..
    شعري محتاج وقت و روقان بال عشان اهتم بيه زي الاول..
    و الوقت اللي ههتم فيه بشعري ده، البيت و عيالنا أولى بيه عشان مش هنقدر نجيب شغالة!
    جسمي باظ بعد ٣ ولادات قيصري!.. اللي هما عيالنا يا احمد!..
    و محتاج عمليات شفط دهون و اشتراك نادي و Spa و دكتورة تغذية و..... و......و ......
    -يا حبيبتي بس ال.........
    *اما بالنسبة للملل اللي حضرتك حاسس بيه، انا حاسة اضعافه!..
    ما بين شغلي و شغل البيت و الطبيخ و الغسيل و المواعين و المذاكرة للعيال و تدبير مصروف البيت و الجمعيات بتاعت مصاريف المدارس و الاجتماعيات اللي حضرتك راميها عليا كلها، انا نسيت أساسا اني متجوزة..
    -ماشي انا عارف كل ده بس بر...........
    *اللي انت و كل الرجالة مش فاهمينه ان الست بتتغذى حرفيا على الاهتمام الصادق من جوزها و راجلها!..
    اخر مرة قلتلي تسلم ايديك على اكلة قطمت ضهري ف المطبخ عشان اعملهالك امتى؟؟
    اخر مرة قلتلي انا بحبك يا مراتي يا ام عيالي ياللي جسمك باظ و سنانك اتسحب منها الكالسيوم بسببهم كانت امتى؟؟
    اخر مرة لاحظت اني حوشت و اشتريت البرفيوم اللي انت بتحبه و حطيته و استنيتك كانت امتى؟
    و انت جيت فضلت تتفرج على ماتش برشلونة!
    -لأ بقى كله الا برشلونة!!
    *هي برشلونة بس؟؟؟
    و الاهلي و ريال مدريد و الإنتر و ماتشات اليد و الأخبار و القعاد على النت و أصحابك عالقهوة و الجرايد و الشغل و ...... و...... و......و......!!
    -انتي عرفتي اسماء النوادي دي منين؟؟!
    * لأَنِّي مهتمة!!
    مهتمة اعرف جوزي بيحب ايه!
    -و كاتمة ف قلبك كل ده!!
    *كاتمة عشان مابقاش الزوجه النكدية الرغاية اللي مش مقدرة تعب جوزها و مزاجه!!
    -(نظرة صامتة).. بس انا........
    *بس انت ايه؟
    اقولك انا؟
    بس انت راجل..
    مش مستوعب ان الاهتمام بمراتك هيفرز ف جسمها هرمونات سعادة تخليها اجمل من كل الموديلز!
    انت راجل و طبعك اناني مش هتشوف ولا هتحس غير باللي يروق مزاجك انت و بس!!
    انت راجل و اختصرت حياتك الزوجية ف كارت البنك بتاع المرتب
    انت راجل و التصميم بتاعك متعارض مع مجرد الفهم ل ازاي تاخد بالك من مراتك الا ف اول ٦ شهور جواز و هي لِسَّه بخيرها قبل ما الزمن و الخلفة و المواعين و المطبخ يعلموا عليها!!
    -كل ده!!!.. ده انتي معبية و شايلة مني اوي!!
    *لا يا حبيبي مش شايلة.. انا تصالحت مع كونك راجل من زمان!!..
    -طب غمضي عينك!
    *.. احنا ف الشارع!
    -غمضي بس!
    و ماتفتحتيش غير لما اقولك!
    *ماشي*
    كل ده؟؟
    -فتحي بقى!
    *ايه ده؟.. احنا فين؟؟
    -فاكرة بتاع العصير ده؟؟
    *ايوة فاكراه!
    ده اول مكان خرجنا فيه بعد كتب كتابنا!
    -و جينا هنا اول مرة زي انهاردة من ١١ سنة بالظبط!
    *و انت لِسَّه فاكر؟ ههههههه
    -ايوة فاكر!..
    و عارفة فاكر ايه كمان؟؟
    *ايه؟
    -انك يوميها كنتي لابسة البووت الشمواه!
    (احمد بيمد إيده للكنبة اللي ورا و يجيب شنطة)
    *ايه ده؟؟
    -افتحيها!
    (بتفتح الشنطة اللي جواها بووت شمواه جديد و كان على مقاسها بالظبط!)
    --------------
    الاهتمام بالزوجة ممكن يكون احسن من كل أدوات التجميل الفرنسية و السوسرية اللي ف العالم!
    الاهتمام بالزوجة اللي طفحانة مرار معاك و مع عيالك ممكن مايكلفكش غير مفاجأة بسيطة كل فترة!
    الاهتمام بالزوجة ممكن مايكلفكش غير فكرة بسيطة انت عارف انها هتفرحها!!
    الاهتمام بالزوجة ممكن مايكلفكش غير نص ساعة ف العربية او الميكروباص......... و تمن بووت شمواه!



    منقوووول
    التعديل الأخير تم بواسطة الراغبة في لقاء الله; الساعة 24-07-2018, 10:12 PM.

  • #2
    كلام سليم
    بارك الله فيكم

    تعليق


    • #3
      جزاكم الله كل خير ابنتنا الفاضلة
      الموضوع مهم جدا
      بارك الله فيكم ونفع بكم

      قال الحسن البصري - رحمه الله :
      استكثروا في الأصدقاء المؤمنين فإن لهم شفاعةً يوم القيامة".
      [حصري] زاد المربين فى تربية البنات والبنين


      تعليق


      • #4
        ياالله
        جزاكِ الله خيرا


        اللهم بارك لى فى اولادى وارزقنى برهم وأحسن لنا الختام وارزقنا الفردوس الأعلى

        تعليق

        يعمل...
        X