الغش..رجاء تردوا عليا بسرعة..جزاكم الله خيرا

[غير مسجل]

السلام عليكم ورحمة الله وبركاته


أولا جزاكم الله خيرا على الخير اللي بتبذلوه هنا..ربنا يجعله ثقيلا في موازين حسناتكم

ثانيا بقى بالنسبة للمشكلة..أنا الترم الأول في الامتحانات كالعادة لقيت مجموعة من الدفعة عندنا بيغشوا
وده بيبقى كل يوم وفي حاجات كتير
يعني مش مثلا اللي مش عارفينه بس..لا دول بيبقوا جايين ناويين يغشوا
واللي بيبقى مصور المنهج على الموبايل..واللي بيبدلوا الورق مع بعض وحاجات كده كتير
المهم أن المراقبين أغلبهم بيبقوا في عالم تاني
مع أن المفروض دي أمانة هيتحاسب عليها بس بيبصوا كده بس على اللجنة من بعيد وخلاص مش بيروحوا كده يمشوا في وسط اللجنة ويبصوا كل واحد بيعمل ايه ومعاه ايه وكده
المهم الترم الأول اتضايقت جدا من اللي بيعملوه ده لأنهم كمان بيطلعوا من الامتحان مبسوطين أوي وهيموتوا من الفرحة في الوقت اللي احنا بنبقى مضايقين جدا من الامتحان
فكنت بضايق وفكرت مرة أقول للمراقبة اللي علينا علشان تخلي بالها منهم
وقبلها قلت لاتنين اصحابي اني هقول وكده بس كنت بفضفض عادي..واحدة منهم قالتلي ايوة جدعة وكده والتانية والله أعلم مش عايزة أسيء الظن بس تقريبا قالت لبنت من اللي بيغشوا أن في واحدة (مش عارفة بقى قالت عليا ولا لا) عايزة تقول للمراقبين أنكم بتغشوا فخلوا بالكم وكده
فالمراقبة فعلا كانت حاسمة أوي وخلت الناس يقعدوا في أماكن مختلفة وكده بس للأسف مفيش خمس دقايق ومشيت وجه اتنين مراقبين تانيين مالهمش دعوة بحاجة وقاعدين بعيد كده وماخدوش بالهم
فشفت بردو ناس بتغش تاني
وبعدين البنت اللي كانت قاعدة ادامي دي من ضمن الناس اللي بيغشوا وهي شكلها عارفة أني ممكن آخد موقف يعني وأعمل حاجة فكانت مش عارفة تغش أدامي خااالص
والمفروض أن أنا بخلص بسرعة وأطلع مش بكمل لآخر اللجنة خالص..بس المرة دي بقى لقيتها عمالة تبص عليا عايزاني أمشي تقريبا وأنا مش راضية خالص
المهم فضلت كده كانت هيجرالها حاجة وكانت متوترة أوي وبعدين كان خلاص فاضل باين 5 أو 10 دقايق على اللجنة وهي بقى فقدت الأمل وقامت تمشي.. رحت قايمة وراها فبصتلي كده وقالتلي والله؟؟؟
وبعد ماطلعت من اللجنة قالت لصاحبتي اللي أنا شاكة أنها قالتلها دي قالتلها في ناس كده واطية أوي ومش عارفة ايه وكده
المهم ده كان آخر امتحان وأنا مارضيتش في اليوم ده أقول للمراقبة علشان كانت نصرانية وماكنتش عايزاها تشمت فينا وتقول أن المسلمين بيغشوا

واحدة بقى من المجموعة اللي بيغشوا دول كلمت صاحبتي اللي قالت دي وقالتلها مين اللي قالت وكده وخليها ماتقولش تاني الترم ده لأن احنا كده كده هنغش ومش عارفة ايه وهنغش الترم ده والسنة الجاية وفي كل سنة فبلاش تقول
صاحبتي فضلت تتكلم معاها كتير ان ربنا هيحاسبك قبلها ومش عارفة ايه وهي بردو مفيش فايدة خااالص

أنا بقى دلوقتي مش عارفة أتصرف ازاي..أنا كده أبقى عملت اللي عليا وأسكت وخلاص؟ ولا أعمل إيه؟

وبعتذر جدا جدا على الإطالة..جزاكم الله خيراااا

[فريق استشارات سرك فى بير(الأخوات)]

رد: الغش..رجاء تردوا عليا بسرعة..جزاكم الله خيرا

وعليكم السلام ورحمة الله وبركاته
أهلا ومرحبا بك أختنا الكريمة في بيتك الثاني الطريق إلي الله
وبخصوص سؤالك اختي الكريمة نقول
أن الغش خلق مذموم لا ينبغي أن يتصف به المؤمن الذي يخاف ربه
فلقد ثبت عن النبي صلي الله عليه وسلم أنه قال "من غشنا فليس منا"
أخرجه مسلم
فالغش في الامتحانات خلق ذميم ومحرم سواء كانت المادة التي يختبر فيها دينية أو دنيوية فالغش سواء سمحت به الجهة التعليمية أو لم تسمح به محرم ، وهو خداع وتغرير يستوي بسببه المجتهد والمهمل، والبليد والذكي، والنشيط والكسول، فضلاً عن أثر ذلك فيما بعد عند تولي المناصب كالتدريس، والإدارة، فكم من مدير لا يعرف شيئاً عن الإدارة! وكم من فني لا يعرف طريقة التشغيل الصحيحة، لأنه ما تعلم حقاً، واعتمد على الغش في حياته، وكم من أستاذ مادة ليس عنده ما يعطيه. والحاصل أن الغش في الامتحانات ممنوع في جميع الأحوال.
كما أننا نتععجب من تبلد بعض الفطر عند بعض الطلاب فيرمي من لم يغش بأنه مقعد ومتخلف وجامد و لربما تمادى أحدهم فاتهم الطالب الذي لا يساعده على الغش بأنه لا يعرف معنى الأخوة ولا التعاون
فكم من طالب لو وقف المراقب بجواره لأصبح قلبه يرتجف، وأوصاله تضطرب، والعرق يتحدر من جبينه. ولكن إذا ابتعد المراقب جاءت النظرات، وجاءت المحاولات للغش والخداع,, والله عزوجل يقول((يَعْلَمُ خَآئِنَةَ الأَعْيُنِ وَمَا تُخْفِي الصُّدُورُ))

أو ليس حاله يقول:
يا رب أنت عندي أهون من هذا المراقب.
يا رب أنا أخشي المراقب أعظم وأكثر منك.

لذلك من الوا جب عليك أختي الكريمة
الإنكار على كل من سمح بذلك أو تعاطاه حسب الاستطاعة، لقوله صلى الله عليه وسلم: " من رأى منكم منكراً فليغيره بيده، فإن لم يستطع فبلسانه، فإن لم يستطع فبقلبه وذلك أضعف الإيمان" رواه مسلم.
فعليك أن تنصحي هؤلاء الطالبات برفق ولين
فإن استمروا في الغش ولم يستمعوا لنصيحتك
أبلغي المراقب علي اللجنة
والله أعلم ..
حكم الغش في الامتحانات
http://www.youtube.com/watch?v=D1OFqsFzEE4
حكم الغش فى الإمتحان و الراتب من الشهادة الحاصلة
http://www.youtube.com/watch?v=UAaRHl_WJuE
الغش فى الامتحانات والعمل .......
http://www.youtube.com/watch?v=xSNzylED48k
أسأل الله لك ولجميع طلاب المسلمين التوفيق والنجاح
وأن يحميكم من الغش والخيانة، وأن يأخذ بنواصيكم لما يحبه ويرضاه .