تنمية بشرية ...قولي خريطك إيه ...يلا قووول

[يمامة المسجد]

:LLL:




كتابة : د.شريف عرفة

هاحكي ليك قصة صغيرة:

مرة واحد كان مسافر (شرم الشيخ) بالسيارة.. وعشان الطريق طويل أخد معاه خريطة... الراجل فضل ماشي ماشي ماشي.. وكل مرة بيضل طريقه ومش عارف يوصل..

عارف طلع السبب إيه؟
طلع ماسك خريطة (الإسكندرية) مش (شرم الشيخ)!!
الراجل وقف وطلع خريطة تانية واتأكد إنها خريطة (شرم الشيخ).. وفضل ماشي ماشي ماشي.. وبرضه تاه..


عارف طلع السبب إيه؟
طلعت خريطة قديمة, والطريق حصل فيه تغييرات وتجديدات كتير!!
الراجل وقف وأخرج خريطة جديدة اتأكد إنها خريطة (شرم الشيخ) وبتاريخ السنة دي.. وفضل ماشي ماشي ماشي.. تخيلوا حصل إيه؟؟ برضه تاه...


طلع السبب إيه؟؟
كان ماسك الخريطة بالمقلوب!!!
عايز أقول إيه؟؟
عايز أقول إن عشان ماتضلش طريقك, لازم تكون معاك الخريطة الصحيحة..


لكن.. إيه هي الخريطة دي؟؟
الخريطة دي عبارة عن مجموعة الخبرات اللي الواحد خدها في حياته كلها.. واللي بتخليه شايف العالم بطريقة مختلفة عن غيره..

هاسألك سؤالين هيوضحوا ليك الموضوع:

سؤال: دكتور الأسنان.. بيمثل لك إيه؟؟
في حالة زي دي إجابتك محكومة بالخريطة اللي عندك.. اللي هي خبراتك وتجاربك..

وإجابته:
لو في طفولتك دكتور الأسنان كان لطيف, أو حد بتحبه دكتور أسنان, هيمثل لك: الطمأنينة والارتياح..
لو مريت بتجربة سيئة أو والديك كانوا بيهددوك بدكتور الأسنان, هيمثل لك: الألم والخوف...
نفهم من كده إن تجربتك الشخصية (خريطتك) حكمت نظرتك للعالم وللأشياء... وكل واحد أكيد عنده تجارب (خريطة) غير التاني... فالإجابة مش هتكون واحدة عندنا كلنا.... يبقى ببساطة: الخريطة بتاعتك مش شرط تكون صح.

قاعدة مهمة
الخريطة ليست صحيحة دائما!!

يعني لا تثق إطلاقا في الخريطة اللي عندك.. واسأل نفسك دايما: هل هي خريطة صحيحة فعلا؟؟ هل تصلح للزمن ده؟؟ هل تأكدت إنك قمت بتحديثها؟؟ هل بتتوافق مع خرائط الناس التانية؟؟

الخرائط دي اتكونت عن طريق تجاربنا والمعلومات اللي حصلنا عليها طول سنين حياتنا... عن طريق:
الوالدين والأسرة
المدرسة والجامعة
المجتمع المحيط
وسائل الإعلام
لكن للأسف لا يجب الثقة في هذه الخرائط لمجرد إنها الخرائط بتاعتنا ولمجرد إننا اتعودنا عليها.. مش كده؟
يعني لو الواحد كبر لقى أبوه وأمه بيدخنوا... غالبا هيكون مدخن...
لو اتربى على عادات غذائية سيئة....... غالبا هيفضل يمارسها...
لو اتضرب في المدرسة بقسوة.... ممكن يمارس نفس الأسلوب مع أولاده...

فدايما اسأل نفسك.. هل الخرائط دي صحيحة؟؟؟
هل عشان اتعودنا عليها والناس حوالينا برضه.. تبقى صح؟؟

مافيش حد بيعتبر نفسه غلط.. لكن الخريطة بتاعته هي اللي غلط وهو ماشي عليها..
القاتل.. خريطته: أنا ريحت العالم منه.. أنا عملت خير!!
الحرامي.. خريطته: أنا باسرق عشان أحوش قرشين ينفعوني!!
وطبعا واضح إن كل الخرائط اللي فاتت غلط تماما ومش صحيحة خالص.. مش هتلاقي حد بيقول: "أنا عملت الجريمة عشان أنا شرير..".. هو ماشي بخريطته وفاكر إنها صح, لكن هي غلط زي ما شفنا..

عرفت بقى إن مهم قوي نراجع خرائطنا؟؟
راجع خريطتك أول بأول.. وقارنها بخرائط الناس اللي إنت شايف إنهم أحكم وأكبر منك.. قارنها بخريطة قدوتك..
راجعها من وقت للتاني عشان تتأكد إنك مش ماسك الخريطة بالمقلوب....
إتأكد دايما إنك ماسك الخريطة الصح بالتاريخ الصح وبالوضع الصح..
ورحلة حياة سعيدة.

[يمامة المسجد]

:LLL:


المقصود بهذا الكلام .......هو ايه الي بتعتقدة جواك .......... يعني بمعنى أصح حاجه متعمقه جواك بتعمل على أثرها و ممكن تكون مش واخد بالك منها لكن أثرها بيكون واضح في أفعالك والي بيلاحظها الي حواليك .........يعني ايه نظرتك للحياه ........ممكن الكلام يكون فيه خطأ .......لأن فيه علماء كتير طلعوا الأخطاء للعلم ده .......


أما حكاية الدبلة فانا فعلا خدت بالي منها ...... بس قلت ده على سبيل المثال بس ان شاء الله هغيرها......


أما بانسبة ان احنا المفروض ناخد كلامنا ومعتقدتنا من القرآن والسنة ففعلا صواب ....... بس هل ده معناه اني معدتش أقرأ للعلم ده ....... ان شاء الله هسئل على الحكاية دي