عايز تهرب من المذاكرة ؟؟ نقدم لكم ذكريات هربان من المذاكرة

[أبو عبدالله إبراهيم]

- يا جمال السقف .. يجنن السقف
أول مرة أحس ان الحيطة بتاعتنا حلوة كدة
لا والدهان ... شغل فنادق يعنى

- شعرى بقى ..!
أسيب شعرى واقف كدة و لا عامل زي القنفذ ..
أهم حاجة شعرى أهتم بيه .. و هو أنا ليا غيره ..
بغض النظر إنى سايباه واقف فى اتجاه السما يسبح طول السنة

- أوضتى ...!!
بفكر أبدل السرير .. و أحط الدولاب جمب الباب ..
و لو سد الباب .. مش مشكلة أبقى أغيرها
أهم حاجة التغيير مطلوب للمذاكرة

- ماماااا ..
أغسلك المواعين .. أنشرلك الغسيل ..
حد عايزني أنزل اشتريله حاجة .. أجبلكم التموين ؟؟

طلبة كتييييير كدة ..
بتكتشف اكتشافات خارقة ..
إن فىه عيلة حواليها ..و أم و أب و إخوات
و إن أوضتها و لا دهاليز الأهرامات و سوق التلات فى نفس ذات الوقت ...
و إنها لازم تهتم بنفسها حالا دلوقتى ..
كل ده هروووب من المذاكرة ..
لأنك عايز تهرب ..
مش مركز .. أو مش عايز تركز

أقولك ..
عايز حِجّة ..

و بعدين ..ليلة الامتحان بتبقى عايز تكسر ساعات البيت اللى بتجرى بالوقت ...
و البنات مبيّتوصّوش هما و مناديلهم ..

مبقولش تقعد بدهاليزك ..
و لا يبقى ناقصلك المقشة و تبقي موديل للساحرة الشريرة
لكن اعمل ده فى الفواصل ..

مش بعد ما استقرينا و قعدنا و ادعوولى يا جمااعة و يارب تنجح يا تتح
تطلع بحاجات تخليك تهرب من المذاكرة

من الآخر
الامتحانات اختبار لتحمل المسؤولية
واجه اللى خايف منه ..
شد على نفسك وحط ع اللى مضايقك
اثبت لنفسك إنك هتقدر لأنك عايز تجيب تقدير لنفسك قبل أى حد ..
لأنك مش فاشل و لا غبي .. مهما أقنعت نفسك بكده ..

شوف أصعب جزء خايف منه ... و ابدأ بيه و خلّص عليه و متسيبوش للآخر عشان متتوترش
و اوعى تيأس لآخر لحظة هتفرق بجد
عن تجربة مش كلمتين فى بوست ...
حتى لو كان عالامتحان دقايق...
مين فيكم كدة ؟
و مين هيتغير ؟