Tweet
((*_- حــوار مـــــع مـــاضــــى -_*))
حوار مع ماضى ( حوار مع منتكس )
فى عربية ... شبابية جديدة ... ماشية بسرعه كبيرة ... على الطريق السريع ... داخل العربية شابين ... و النقاش جوه العربية واضح كده إنه نقاش فى شئ مهم ... كل شئ واضح من تعبيرات وجههم ... قربنا شوية ... بدأنا نسمع الصوت ...
** مش ناوى بقى تطفى الأناشيد اللى بمعازف دي
* إيه ياعم بطل بقى تشدد ... مش الشيخ .......... قال المعازف عادى والمهم الكلمات
** ومن إمتى وإنت بتسمع كلام العالم ده وإنت عارف إن ليه هفوات كتير ... ياعم دنتا ياما حذرتنى منه فى أول التزامى ...
* لا ... ده كان زمان ... لكن انا مقتنع بكلامه دلوقتى ...
** طيب ياترى الاناشيد دي أحسن ولا شريط القرآن ده .... ده بتاع القارئ مشاري راشد ... وانا عارف إنت بتحب تسمعله أد إيه ...
* ماشى ياعم ...
و بدأ الشريط يشتغل ... وصاحبنا انهمك فى القيادة ... وصاحبنا التانى ريح ظهره على الكرسي وركز فى الآيات ... وبدأت سورة الحديد ... ياااااااه ... كل دى ذكريات .... صاحبنا بيفتكر لما كان بيقوموا الليل وصاحبنا اللى بيسوق العربية دلوقتى كان بيأمهم ... وبيقرأ السورة ... أد إيه بكوا لما سمعوها منه ... وبالذات الآية اللى الشيخ هيقرأها دلوقتى ....
أَلَمْ يَأْنِ لِلَّذِينَ آمَنُوا أَن تَخْشَعَ قُلُوبُهُمْ لِذِكْرِ اللَّهِ وَمَا نَزَلَ مِنَ الْحَقِّ وَلَا يَكُونُوا كَالَّذِينَ أُوتُوا الْكِتَابَ مِن قَبْلُ فَطَالَ عَلَيْهِمُ الْأَمَدُ فَقَسَتْ قُلُوبُهُمْ وَكَثِيرٌ مِّنْهُمْ فَاسِقُونَ{16}
بص صاحبنا على عبد الرحمن .... مكانش متصور إنه يشوف المشهد اللى شافه ... الدموع ماليه عينيه .... وأول ما محمود بص ليه حاول يمسح الدموع علشان ميشفهوش ...
** إنت فاكر ياعبد الرحمن ؟؟
* فاكر إيه بالظبط ؟؟؟
** عمرك شفت ياعبد الرحمن واحد يكون لابس ثوب أبيض جميل ونضيف ... ويستبدله بثوب متسخ ومقطع ؟؟؟
* آه ... فهمت ... إنت شكلك ناوى تقلب فى القديم وتقلب المواجع ....
** لا والله مش قصدى اقلب عليك مواجع ولا حاجة ... ولا قصدى ازعلك ... أنا بس نفسي أفكرك ... وأسألك ...
ياترى إيه اللى علشانه رضيت تتنازل عن صحبة إخوانك فى الله اللى كل اللى كان بيجمعك بيهم طاعة ربنا ورجعت لشلتك القديمة تانى اللى مبتجتمعوش إلا على المعاصى ؟؟؟
ياترى علشان إيه رضيت تسيب جلسات العلم ودروس المشايخ التى تحفها الملائكة ويذكر الله فيها الحاضرين فيمن عنده ؟؟؟
ياترى ليه اتنازلت بسهوله كده عن شغلك فى الدعوة وكلامك اللى ياما ناس التزموا بيه ... ومنهم انا لو تفتكر ... وأسلوبك اللى كنا كلنا بنتعلم منه ؟؟؟
ياترى بإيه رضيت تسيب ركعات جوف الليل اللى ياما كنت بتصلى بينا بصوتك اللى كنا بنبكى لما بنسمعه ؟؟؟
ياترى بإيه رضيت تبيع بيه اتباعك لسنة النبي صلى الله عليه وسلم وسمتك الظاهر ولحيتك ؟؟؟
إزاى هان عليك كل ده ... وإزاى رضيت تتنازل عنه بسهوله كده ...
* إنت أصلك مش عارف ولا حاسس باللي حوايا ... أنا بتقطع كل يوم من جوايا ألف مرة ...كل ما أشوفكم داخليين المسجد لصلاة أو لحضور مجلس علم أو حلقة قرآن ... وأنا متكتف مش قادر ادخل معاكوا ... بيبقى نفسي اجرى عليكوا واقلكوا شدونى .. متسيبونيش ... انا بغرق وبضيع لوحدى ... لكن مش قادر ... كل شئ حوليا بيقولوا ابعد عن طريق الالتزام .... أهلى , أصحابى , شغلى , كل شئ ... معنتش قادر أقاوم .... بص إنت مش حاسس بحاجه فمتكلمش فى الموضوع ده ...
**إزاى تقول إنى مش حاسس بحاجة ... إنت مش فاكر زمان من سنتين لما كنت على وشك إنى انتكس وكنت حلقت لحيتى بالفعل ... لكن وقفتك جنبى إنت والإخوة ... رجعتونى تانى على الطريق وبقى لايمكن أضعف تانى وقدرت بفضل ثم مساعدتكم ليا إنى أحل كل مشاكلى ... وبقيت زى ما إنت شايفنى النهاردة .... ياعبد الرحمن إنت مش متخيل أنا قلبى بيتحرق إزاى لما بشوفك ... إنت كنت فى نظرى فى يوم ما النموذج للملتزم الصح .. كنا لكنا بتسند عليك لما نضعف أو نحس بفتور ... انا حاسس طول ما إنت بعيد كإن جزء من قلبي مفقود ... حته منى ضايعة ...
جرب إنت بس ومد إيدك لأى حد من الإخوة وشوف مدى السعادة اللى هيستقبلك بيها ... ياعبد الرحمن ... اللى بينا من مشاعر أكبر من أن لغة البشر توصفه ... اجتماعنا على طاعة ربنا خلى علاقتنا مع بعض قوية ... لايمكن تقل أبدًا .... مهما بعدنا ... أكيد فى يوم هنجمع ... إن مكنش فى الدنيا فمعادنا فى الجنة مع حبيبنا – صلى الله عليه وسلم – وبعدين الظروف اللى بتقول إنها مانعاك من الرجوع ... مهى الظروف دى طول عمرها موجودة ولا كانت بتأثر فيك ... إنت بس اللى اتغيرت وبعدت عن الطاعة فقلت قدرتك على مواجهتها .. وإنت عارف من الأول إن طريق الطاعة فى زماننا ده مش سهل وفى كتير عقبات ... لكن بعون الله ولما بنكون روح واحدة بنعين بعض على تحطيم كل الحواجز فى طريقنا لله ..
* ياااااااه .... لو تعرف أد إيه نفسى ارجع ؟؟؟
** وإيه اللى مانعك ... قرر حالا من دلوقتى ... وبعدين هو مش إنت بعت ؟؟؟
* بعت إيه ؟؟؟؟
** وكمان ناسى اللي انت بعته (( إن الله اشترى من المؤمنين أنفسهم وأموالهم بأن لهم الجنة ..)) يلا بقى جدد البيعة مع الله ... وابعد كل الحواجز عن قلبك وأوعى ترجع تواجه مشاكلك لواحدك تانى .. أى مشكلة حلها سهل ... لو واجهتها ومعاك حد يعينك ويثبتك ... محدش فينا يقدر يكمل لوحده كلنا محتاجين نكون مع بعض ... يلا ياحبيبى فى الله ... وقف على أقرب مسجد ننزل نصلى ركعتين وندعى ربنا ييسر لينا الطريق ويثبتنا عليه ويعينا على مواجهة كل عقبات حياتنا حتى نصل إلى جنته برفقة نبيه صلى الله عليه وسلم .
****************************
دي نهاية الموضوع
بقى أن اذكر سبب كتابتى الموضوع بعد فتور همتى فى اكمال مواضيع الانتكاس من موضوع القلب الذي قصدته ... لكن من أسبوع تقريبا سمعت بخبر انتكاس 2 من كبار الإخوة فى منطقة قريبا مننا ... ممن لم يكن يتصور أبدأ انهم ينتكسوا ... نسأل الله أن يهديهم وييسر لهم طريق الهداية ... وأن يثبتنا على دينه حتى نلقاه إنه على كل شئ قدير ...
وإن شاء الله نحاول فى الأيام القادمة - من غير أن أعد - إننا نكمل سلسلة الانتكاس باحثين فى الأسباب وسبل العلاج وطريقة التشخيص لمن يخاف على نفسه الانتكاس ... ولكن انصح اخوتى بأهم سلاح ... الدعاء ... واغتنموا اوقات الإجابة ولا تنسى اخوانك بدعواتك
---------------------------
مواضيعنا السابقة ذات الصلة :
تعليق