[عاجل] لو انت في الجنه هتعمل ايه ؟؟؟

[(محمود صلاح الدين)]

انا عايز اكلمكم النهارده عن موضوع قلبي موضوع روحي من اعظم الاشياء التي تغذي الروح

وتعلي الهمه

وللاسف كتير مننا نسي ان يتكلم حتي ولو مع نفسه في الموضوع دا

انا عايز اكلمكم عن حلم وهدف كل واحد مننا وكل مسلم ومسلمه بل وكل انسان علي وجه الارض

حتي وان كان غير مسلم .. فهو يحلم بهذا الحلم ويطمع بهذا الهدف

حلمنا وهدفنا اللي جايين نفتكره النهارده هو

((الجنه))

بس تعالي نبقي مختلفين النهارده في كلمنا عنها عشان نكسر حاجر الروتين اللي اصابنا

ممكن واحد يقولك طب وانا هتكلم في الموضوع دا ليه ما انا من كتر ما سمعته خلاص حفظته

فيها ما لا عين رأت ولا اذن سمعت ولا خطر علي قلب بشر

فيها الحور العين .. فيها انهار من عسل .. فيها .. فيها .. فيها

خلاص يا عم الشيخ حفظنا ... شوفلك حاجه جديده

دا ممكن يبقي رد بعض الناس

اقولهم تعالي نغير واديلك الجديد يا بتاع الجديد وأسالك سؤال ؟؟!!

(( لو انت في الجنه هتعمل ايه )) ؟؟؟؟

بصوا بقي اسمحولي اخد رحتي في القعده كده واطلق عنان الخيال وشوف انا هعمل ايه



بسم الله الرحمن الرحيم

{وَسِيقَ الَّذِينَ اتَّقَوْا رَبَّهُمْ إِلَى الْجَنَّةِ زُمَرًا حَتَّى إِذَا جَاءُوهَا وَفُتِحَتْ أَبْوَابُهَا وَقَالَ لَهُمْ خَزَنَتُهَا سَلَامٌ عَلَيْكُمْ طِبْتُمْ فَادْخُلُوهَا خَالِدِينَ * وَقَالُوا الْحَمْدُ لِلَّهِ الَّذِي صَدَقَنَا وَعْدَهُ وَأَوْرَثَنَا الْأَرْضَ نَتَبَوَّأُ مِنَ الْجَنَّةِ حَيْثُ نَشَاءُ فَنِعْمَ أَجْرُ الْعَامِلِينَ}

اول ما ربنا يكرمني كدا ان شاء الله واعدي من علي الصراط

هلاقي النبي صل الله عليه وسلم .. والصحابه والسلف واهلي وكل واحد ساعدني علي الخير

وكل واحد نصحني في الدنيا .. وكنا بنعين بعض علي طاعة الله

وتأتي الملائكه وتاخدنا علي الجنه وخزنة الجنه اول ما يسمعو سيدنا محمد عليه الصلاة والسلام

بيستأذن بفتح باب الجنه .. ويعرفو انه هو صل الله عليه وسلم هيروحو فاتحين الباب

مش عارف احساسي ايه ساعتها واانا سامع صوت الابواب بتاعتها بتتفتح والنور اللي هيخرج منها

ولا الريحه هتبقي عامله ازاي ؟؟؟ ولا خزنة الجنه هيبقي شكلهم ايه ؟؟؟

ولا صوتهم وهما بيسلموا علينا وبيقولولنا طيبتم فدخلوها خالدين

وماشي مع اقرب الناس ليا وماسكين ادينا ف ايد بعض

يا تري هيبقي احساسي ايه لما اول رجل هتدب علي ارض الجنه

لا تراب بقي ولا مسامير ولا ازاز يجرح رجلي

يا تري اول ما هدخل واشوف الانهار والاشجار والنخل والبيوت والقصور هقول ايه ؟؟؟

((دَعْوَاهُمْ فِيهَا سُبْحَانَكَ اللَّهُمَّ وَتَحِيَّتُهُمْ فِيهَا سَلَامٌ ۚ وَآخِرُ دَعْوَاهُمْ أَنِ الْحَمْدُ لِلَّهِ رَبِّ الْعَالَمِينَ))

يعنى هبقي ماشي اشوف نهر من عسل مثلا ومنظره اقول سبحانك اللهم .. سبحان الله

طب نهر العسل دا هاكل منه ازاي ؟؟ هدوق منه بصوباعي كده ولا اجيب معلقه

لا لا .. انا هاخد كام رغيف عيش كده وانط في النهر

دا عسل الجنه يا عم .. انت بتهزر ؟؟؟

وانا عمال اكل عسل بقي .. ناس تبقي معديه من قدامي وطبعا عمالين يضحكو

واقولهم (( السلام عليكم ورحمة الله ))

وفجأه افتكر اللي انا كنت فيه من شقاء الدنيا طبعا انا مش هبقي فاكر تعبه بس اكيد هبقي فاكر المواقف

وكل لحظه تعبت فيها من الدنيا وكل لحظه كنت بعيد عن ربنا فيها

اقول (( الحمد لله رب العالمين ))

((وَقَالُوا الْحَمْدُ لِلَّهِ الَّذِي صَدَقَنَا وَعْدَهُ وَأَوْرَثَنَا الْأَرْضَ نَتَبَوَّأُ مِنَ الْجَنَّةِ حَيْثُ نَشَاءُ))

وبعد يوم طويل بقي ارجع للبيت بتاعي .. انا مش متخيل لما ادخل بيتي دا هيبقي عامل ازاي ؟؟

طوبه من ذهب وطوبه من فضه .. يا الله دا انا بالبيت دا اغني من ااغني رجل بالعالم

دا اللي بيبقي معاه كام سبيكة دهب من اللي ف الدنيا دي بيبقي بيقول يا ارض اتهدي

اقوله اقعد ساكت .. انا عندي بيت الطوب بتاعه وحده دهب واحده فضه

والاسمنت بتاعهم من مسك .. يا نهااااااااار ابيض ريحة البيت هتبقي عامله ازاي يا جدعاااااااااان !!!

ولا ادخل علي السرير .. الالقي السرير مرفوع كده وانام عليه ولا اجدعها ملك من ملوك الدنيا

ويا اخي مفيش احلي من الملايكه في الجنه كل شويه يدخلو علينا ويقوللنا كلام

لو اتقالنا في الدنيا دا يبقي جنه لوحده

بص هيقولنا ايه ؟؟؟

((وَالْمَلَائِكَةُ يَدْخُلُونَ عَلَيْهِمْ مِنْ كُلِّ بَابٍ * سَلَامٌ عَلَيْكُمْ بِمَا صَبَرْتُمْ فَنِعْمَ عُقْبَى الدَّارِ))



انا عارف اني طولت ف الموضوع اوي بس قسم بالله من اجمل المواضيع اللي كتبتها

حتي الكلام والتخيل عن الجنه .. جنه

وسؤالي لكل واحد يشوف الموضوع دا ويا ريت يرد عليا

(( لو انت في الجنه هتعمل ايه )) ؟؟؟

يلا يا جماعه رمضان ع الابواب خلونا ناخد دفعه كده من اجمل حديث ممكن نتكلم فيه

نسال الله ان يجمعنا واياكم في جنت العدن

وان يمتعنا بالنظر الي وجهه الكريم .. وان يرزقنا صحبة نبيه صل الله عليه وسلم في الجنة الفيحاء