![](http://up.3dlat.com/uploads/128711096414.gif)
الحمد لله وكفى وصلاةً وسلامًا على عباده الذين اصطفى أما بعد:
إخواني وأحبابي في الله:
ماذا بعد العشر "عشر ذي الحجة"؟
ماذا بعد العشر؟ نقطة خطيرة جدًا ومهمة جدًا لازم نركز فيها.. ماذا بعد العشر؟!
عايزين نركز مع بعض لأن الموضوع فعلًا مهم يا إخواني، رمضان شهر معظّم في الأمة..
فـقبل رمضان ماذا قبل رمضان؟! إحنا بندي دروس رمضان من قبل رمضان بشهرين ونص،
ورجب لما يقرَّب تبدأ دروس الا ستعداد لرمضان،
وفي أول رمضان كيف نستقبل رمضان؟
وفي وسط رمضان كيف نستثمر رمضان؟
وفي آخر رمضان كيف نودع رمضان؟
وبعد رمضان الخطبة اللي الأمة كلها لازم تسمعها ماذا بعد رمضان؟!
العشر من ذي الحجة أعظم من رمضان، يعني عايز أقول إن الثلاثين يوم بتوع رمضان والعشر بتوع ذي الحجة،
الأربعين يوم دول ميقات الأمة "فَتَمَّ مِيقَاتُ رَبِّهِ أَرْبَعِينَ لَيْلَةً" الأعراف:142
ماذا بعد العشر؟ إخواني قضية زي دي لازم نتعامل معاها بغاية الخطورة وبغاية الأهمية
لحد ما الأمة كلها تستيقظ ويتم ميقات الأمة.
العشر غيروا فيك إيه؟ غيروا في إخلاصك إيه؟ غيروا في صدقك إيه؟ غيروا في أمراض قلبك إيه؟
غيروا في عزيمتك إيه؟ غيروا في وجهة حياتك إيه؟ غيروا في طريقة تفكيرك في الحياة إيه؟
![](http://sl.glitter-graphics.net/pub/926/926608xmti6n40k5.gif)
صحَّح نيتك
في المكان ده من حوالي عشرة أيام بالضبط كنا قاعدين بنقول كيف نستقبل العشر وكيف نستعد للعشر
واتكلمنا في سورة الزمر وقلنا صحَّح نيتك، اوعى تنوي إنك هتعبد ربنا في موسم، دي مش نيه يا جماعة،
العشر من ذي الحجة بداية مش نهاية، إنك تنوي إنها بداية، أنا هأعبدك عشر أيام يا رب!،
إنك تنوي إن دي ثورة تصحيح حياتك، تصحيح مسار، تظبيط زواية، تصحيح وجهة في حياتك،
يبقى دي النيه اللي تدخل بيها العشر، دي اللي تدخل بيها رمضان، اللي تروح بيها عمرة، اللي تدخل بيها أي موسم عبادة،
نية إن العبادة هنا بداية وليست نهاية، ياارب أنا هأبدأ صح،
اللي خد النية دي من الأول الأيام هتفرق معاه قوي لأنه من أول يوم فيها بيتدرّب على اللي بعدها هو اللي بدأ صح.
أنا حزين يا جماعة إني بأقول الكلام ده لأن المفروض إن الكلام ده يتقال قبل عشر ذي الحجة،
كلام خرجت من العشرة بإيه؟ أو هتخرج بإيه؟
عشان يبقى بنعبد ربنا مش بالفكر الموسمي مش بنعبد ربنا بفكر إن دي أيام وهتعدي!
بنعبد ربنا إن دي بداية وتصحيح مسار ومنطلق بعد كده زي الشلال كده اللي في الأول حاجة قوية
هتشق لنا مجرى عبادة طول حياتنا بعد كده زي الأنهار اللي بعد الشلالات..
![](http://sl.glitter-graphics.net/pub/926/926608xmti6n40k5.gif)
اتغير فيك إيه؟
حسيت والّا لسه؟ بكيت والّا لسه؟ فهمت والّ لسه؟ فصلت والّا لسه؟
"فَلَمَّا فَصَلَ طَالُوتُ بِالْجُنُودِ" البقرة:249 خرجت فاصل؟ خدت قرار إنك انت فصلت لطريق الآخرة؟
فصلت لطريق ربنا سبحانه وتعالى؟ الوقفات دي هي الوقفات اللي بتقف فيها مع نفسك،
هي دي الوقفات اللي انت لازم تاخد فيها القرارات الخطيرة في حياتك.
أنا أخطر قرار أريد إن احنا ناخده ولازم ناخده في هذه الأيام مش قرار وِرد العبادة هيزيد إيه في حياتك
رغم إن الكلام ده هنتكلم عنه دلوقت إيه العبادة اللي انت خرجت بيها؟ إيه العمل اللي انت خرجت بيه؟
إنماأخطر حاجة يا إخواني عايزين نخرج بيها حاجة جواك انت فصلت لطريق الآخرة والّا لأ؟
اللي جواك اتغير والّا لأ؟ انت هتتغير من برة لما هتتغير من جوه انت لما تفهم عظمة القضية قضية علاقتك بالله
بعد كده حياتك كلها هتبقى لله.
![](http://sl.glitter-graphics.net/pub/926/926608xmti6n40k5.gif)
ثمرات العشر:
عشان كده من عشر أيام قلت لكم إن
الثمرة الصغرى لعشر ذي الحجة هي الحسنـــــــات بتاعة عشر ذي الحجة
اللي هي صيام يوم بسنتين يكفر الذنوب وإن اليوم بغزوه، قلت لكم دي أقل ثمرة في عشرة ذي الحجة..
إنما الثمرة العظمى لعشر ذي الحجة
تعديل مسااار الحيـاة، تعديل وجهة الحياة، تصحيح خط سيرك في الحياة،
شحنة وعزيمة للانطلاق في علاقتك بالله
هي دي الثمرة العظمى للاعتكافات للمعسكرات للعمرات للأيام التربوية هي ديه الثمرة،
لطول القيام بين يدي الله -سبحانه وتعالى- إنك انت بتقف مع نفسك ايه الي اتغير فيك بقى؟
* ماذا بعد العشر
عايزين نقف يا جماعة ماذا بعد العشر؟ هتعمل إيه؟ إيه العمل اللي انت خرجت بيه؟
اخرج من كل موسم بعمل واحد تثبت عليه في حياتك، اخرج من كل درس بعمل واحد بس تثبت عليه في حياتك، هتلاقي بعدها بسنتين ثلاثة بقيت خلاص من أولياء الله الصالحين ركز درجة درجة وعلى الله الفرج، اطلع الطريق سلّمه سلّمه، اطلع الطريق خطوة خطوة.
![](http://sl.glitter-graphics.net/pub/926/926608xmti6n40k5.gif)
يبقى يا إخواني ما هي الغنائم العظمى في مواسم العبادة:
1-تعديل نية الحياة وتصحيح وجهة الحياة
واعتبار الموسم بداية ليس نهاية ومنطلق للعبادة يبقى صححت نيتك.
2- إنك طلعت بصاحب صالح تعبد ربنا معاه في عشرين عشر ذي الحجة بعد كده
ويشجعك على عشرين عشر ذي الحجة بعد كده.
3- ثواب الأعمال الصالحة بتاعة المواسم
فيه غنائم مستقبيلة، غنائم عمر وفيه غنائم تنتهي بانتهاء الموسم، الغنائم اللي بتنتهي بانتهاء الموسم هوه الثواب اللي انت عملته، الثواب اللي انت صمته، إنما الغنائم اللي هتفضل تؤتي أكلها كل حين بإذن ربها طول حياتك الصاحب اللي انت خرجت بيه والنية اللي انت خرجت بيها.
انت وجهتك إيه؟ انت رسالتك في الحياة إيه؟ انت عاوز إيه من الدنيا دي؟
أنا مش بتاع مواسم، المواسم بتاعتي منطلقات، شحن.
![](http://sl.glitter-graphics.net/pub/926/926608xmti6n40k5.gif)
ربنا بيقول "فَإِذَا أَفَضْتُمْ مِنْ عَرَفَاتٍ" منظر الأمة وهي خارجة جيوش مجيشة
ما شاء الله بنوصل مزدلفة والناس لسه بتخرج من عرفات
"فَإِذَا أَفَضْتُمْ مِنْ عَرَفَاتٍ فَاذْكُرُوا اللَّهَ عِنْدَ الْمَشْعَرِ الْحَرَامِ" اللي هو مزدلفة
" ثُمَّ أَفِيضُوا مِنْ حَيْثُ أَفَاضَ النَّاسُ وَاسْتَغْفِرُوا اللَّهَ" البقرة:199 يعني إيه أفيضوا من حيث أفاض الناس؟
جمهور المفسيرين قال إن "أفيضوا" أي أفيضوا من عرفات..
يا رب أستغفرك على إيه! ده عرفااات، ده أنا خارج من عرفات كيوم ولدتني أمي،
ده يوم عرفات يوم المغفرة إذا كان بعد يوم المغفرة الأعظم ربنا قال لك استغفر! فما بالك في باقي الأيام نعمل إيه؟!
واذا كان ده لأهل عرفات.. احنا نعمل إيه؟!ماذا بعد العشر؟
الاستغفار والانكسار يجب أن لا تزيدك الطاعة إلا انكسار ولا تزيدك الأسباب إلا افتقار،
تبقى مكسور لربنا
![](http://sl.glitter-graphics.net/pub/926/926608xmti6n40k5.gif)
أتوب من إيه؟!
عشان كده واحد يقول لي أتوب من إيه؟!
1- تتوب من الكبر اللي بيدخل قلوبنا بعد العبادة
أنا صمت وقمت واعتكفت، تتوب من الكبر اللي بييجي في القلب بعد العبادة،
العبادة لو صحيحة وعبادتك سليمة هتحس إنك منكسر،
عايز تعرف عبادتك سليمة والّا لأ، عبادة مثمرة والّا لأ؟
لو عبدت ربنا عبادة مثمرة بقلبك هتحس بعدها إنك انت يعني زي اللي طلع على السقالة من الدور العاشر للدور العشرين
فانت لما عليت في العبادة هتشوف ذنوبك أكتر فتخرج مكسور أكتر.
عشان كده "سَمِعْنَا وَأَطَعْنَا" إيه؟ "غُفْرَانَكَ رَبَّنَا" البقرة:285 الله ده أنا أطعت!
"فَاسْتَقِيمُوا إِلَيْهِ وَاسْتَغْفِرُوهُ" فصلت:6 الله ده أنا استقمت!
"وَأَطِيعُوا اللَّهَ وَأَطِيعُوا الرَّسُولَ وَاحْذَرُوا" المائدة:92 مش وأبشروا.. واحذروا!
احذر إنك تقع! احذر إنك تنزل! احذر إن الشيطان يضحك عليك تاني! احذر إنك ترجع للكسل والتوهان تاني!
احذر إنك ترجع للنوم تاني! احذر إنك ترجع للبعد عن الله تاني! احذر إنك ترجع لغفلة القلب عن الله تاني!
احذر إنك تموت بعد ما ربنا أحياك! احذر من البعد عن الطاعة! "وَأَطِيعُوا اللَّهَ وَأَطِيعُوا الرَّسُولَ وَاحْذَرُوا"
عشان كده بعد الصلاة استغفر الله، استغفر الله، استغفر الله.. ليه؟ لازم العبادة تزيدك انكسار.
![](http://sl.glitter-graphics.net/pub/926/926608xmti6n40k5.gif)
2- تتوب من معاصي السر
معاصي السر ازاي يعني؟ انت مش عارف يعني معاصي السر! اه لما الواحد يبقى لوحده في البيت وكده؟
وانت ماشي في الشارع كل نظرة حرام معصية سر، ده ربنا سماها خيانة "خَائِنَةَ الْأَعْيُنِ" غافر:19
![](http://sl.glitter-graphics.net/pub/926/926608xmti6n40k5.gif)
3- تتوب من معاصي القلوب
الأمراض اللي جوه قلبك وانت عارف.. قلبك مافيهوش رياء؟! قلبك مافيهوش نفاق؟!، قلبك مافيهوش أمراض؟!،
قلبك مافيهوش تعلق بغير الله؟!، قلبك مافيهوش سوء ظن بالله ساعة ما بتُبتلى والابتلاء يزيد عليك؟!.
إبليس بعد 70 ألف سنة عبادة انتكس.. ليه؟ قلبه فيه أمراض،
اللي في قلبه أمراض مش هيواجها في يوم من الأيام هتوقعه،
![](http://sl.glitter-graphics.net/pub/926/926608xmti6n40k5.gif)
4- تتوب إلى الله من معاصي النفوس، الحسد، الكبر، الغيرة، الغلّ، الحقد، تتوب إلى الله من الأنا،
ده النبي قال "لا يدخل الجنة مَن كان في قلبه مثقال ذرة من كبر", صحيح مسلم
مثقال ذرة من مرض واحد من أمراض النفوس يدخّل جهنم، مايدخلش الجنة، أمال اللي معبي.
![](http://sl.glitter-graphics.net/pub/926/926608xmti6n40k5.gif)
5- تتوب من معاصي قبل الالتزام
الله ما أنا سبت، سبت غير تبت،
ممكن واحد كان في ثانوية عامة بيمشي مع بنات دلوقت لأ لأن عيب إن يكلم بنات
عشان بقى راجل محترم في الحته بتاعته وماعادش واحد صغير، أهو ده واحد ساب مش تاب،
يبقى انت لازم تجدد التوبة من معاصي ما قبل التزامك.
![](http://sl.glitter-graphics.net/pub/926/926608xmti6n40k5.gif)
6- تتوب إلى الله من معاصي معاملات الأخلاق
من الغيبة، حد ضحكت عليه، الأمانة في شغلك، من تقصيرك في الدعوة، بيقى فكرك انت مش شايف كل المعاصي دي وشايف الطاعات لأ.. ده المؤمن بيبص على المعاصي أكتر من الطاعات أو حاطط الاتنين قدام عينيه ما بين الرجاء والخوف.
![](http://sl.glitter-graphics.net/pub/926/926608xmti6n40k5.gif)
يا إخواني كيف نودّع العشر؟!
ومن سنن الله في مواسم العبادة ومواسم الطاعة أن خواتيم المواسم هي أخطر ما في المواسم، دايمًا الغنائم العظمى بتبقى في الأواخر،
في عشر ذي الحجة يوم عرفة اللي هو يوم 9 ذي الحجة.. خدوا بالكم يا جماعة أعظم يوم في عشر ذي الحجة إيه؟ وفي الدنيا كلها؟
أول يوم العيد صح اللي هو العاشر، اللي يليه إيه؟ عرفه اللي هو التاسع، اللي يليه إيه؟ التروية اللي هو التامن،
يعني آخر 48 ساعة في العشر ذي الحجة هم دول أعظم ثواب وأعظم فضائل وأعظم قيمة فيهم.
يبقى اللي باقي ده بقى الغنائم العظمى، العدّاء بييجي في آخر السباق ويجيب آخره
لازم تجيب أخرك "الأعمال بالخواتيم" صحيح البخاري
اخواني احنا جايين هنا عشان نفوز بيوم عرفات ونتمحك في ثواب أهل عرفات، اوعوا تظنوا إن ثواب عرفه لأهل عرفات بس!
الدليل إن صيام يوم عرفه يكفر سنتين والسُّنة لأهل عرفه الفطر يبقى النبي بيكلم مين؟
بيكلم اللي مش في عرفه الذي لم يدرك عرفات،
إذن ثواب عرفات لأهل عرفات وللأمة كلها. كثر خير الله وطاب.
عايزين بقى اليوم الذي يباهي الله بعباده الملائكة، اليوم الذي يدنُ الله فيه، اليوم الذي يتجلى الله فيه..
أكتر يوم تُعتق فيه الرقاب من النار، عايزين يوم المغفرة الأعظم ده نقنصه ونفوز بيه.
يوم عرفة يكون الوقت الأطول في الدعاء، دعاء عرفة،
النبي -صلى الله عليه وسلم- دعا من الظهر رفع إيده من الظهر ما نزلهاش إلا المغرب أطول دعاء في السُّنة
فــ عرفة يوم الدعاااء.
عايزين نجدد العزم، عايزين نشحن الهمم.
![](http://i112.photobucket.com/albums/n197/monkeys4me2000/dividers/a1f1bae5.gif)
تابعوا معنا حلقة
ماذا بعد العشر
للدكتور: حازم شومان
التفريغ:
هنا
ولسماع المادة بجودات مختلفة:
هنا
![](http://www.ibtesama.com/vb/imgcache2/86566.gif)
للمزيد من تفريغات الفريق تفضلوا هنا:
إنجازات فريق التفريغ
كما يسعدنا انضمامكم لفريق العمل:
فرغ درسًا وانشر خيرًا ونل أجرًا
والسلام عليكم ورحمة الله وبركاته
![](http://up.3dlat.com/uploads/128711096415.gif)
تعليق