إعـــــــلان

**خديجة أحمد** · 28-12-2019, 12:01 AM

مقدمة
"إذا أراد الواحد فينا أن يَبْنِيَ بيتا من الحجارة بيختار أفضل المواقع، بيجيب أفضل المهندسين، بيختار أفضل الأدوات للبناء، وذلك لأن هذا البيت يريد أن يُجمِّلهُ وأن يسكنهُ وأن يطمئنّ فيه. حياتنا الأسرية أخطر من هذا البناء بكثير فيجب ألا تنخدع بالمظاهر وأن تدقِّق تدقيقًا شديدًا عند الاختيار."

الحمد لله والصلاة والسلام على محمد رسول الله وعلى آله وصحبة ومن والاه،
أيها الأحبة السلام عليكم ورحمة الله وبركاته،

أشياء مخادعة يقع فيها من يُقدم على الزواج
حماده خلص الجيش قعد مع أمه قالت له يا ابني أنا عاوزة أفرح بيك، عاوزة أشيلك حتة عيل، أنا معايا بنت في المسجد أو عارفاها في المدرسة، أو عارفاها واحدة من جيراننا عاوزين نجوزك، يا أمه مفيش جواز دلوقتيمعييش فلوس، لا إن شاء الله تعالى أبوك يخلص يطلع معاش مبكر ياخد الفلوس نجوزك أحسن جوازة، على بركة الله خلاص استعد الراجل للجواز، فبنقول له أن في حاجة اسمها أبجديات الاختيار.

قبل ما أقول لك على الصفات التي لابد أن تختار، خلي بالك من أشياء مخادعة بيقع فيها الناس، ممكن تيجي والدتك تقول لك ده البنت جميلة وأمورةوعسولة، وبنت متدينة وصاحبة أخلاق وكله يطلع في الهوا، عشان أمك بترتب ترتيب إن عاوزة واحدة تخدمها تبقى شغَّالة خدامةمعاها في البيت هو دي اللي عاوزاها، وعاوزةواحدةتاخد بالها من إخواتك الصغيرين، وعاوزة واحدة تعرف تدلل وتدلع عليها.
إنت ممكن تسأل الخاطبة اللي جاية تقول لك أنا عندي عروسة كده، هي مش كده، هي كده، فتضحك عليك وتقول لك البنت ممتازة أخلاقيًّا، ممتازة دينيًّا، ما شاء الله عليها لابسة نقاب، أو لابسة حجاب، ده جزء من التدين ده مش كل التدين، فإياك إن حد يخدعك، إياك إن حد يخدعك.

ميزان الحكم على الناس
سيدنا عمر بن الخطاب –رضي الله عنه وأرضاه-، واحد بيقول له: والله عيِّنِي في عمل، قال له أنا عاوز أبقى مثلًا والي على مكان معين، أو أبقى محافظ في المكان المعين، فسيدنا عمر –رضي الله عنه وأرضاه- قال له: معاك حد يشهد على إيمانك؟،إنت راجل يعني ماشاء الله من أهل الديانة، قال لهمعايا، طب اتني به، فأتى الرجل، فسيدنا عمر بن الخطاب –رضي الله عنه وأرضاه- بيقول له أَتعرِفُه؟، أنت عارف الراجل ده، قال له نعم أنا عارفه كويس، قال طب إنت عارفه منين، هل أنت جارُه الذي يعلم مدخله ومخرجه؟، إنت جاره اللي عارف عنه، لالا أنا مش جاره لا، طب إنت هل تعاملت معه على الدينار والدرهم؟، في فلوس يعني، لا ما تعاملتش في فلوس، طب هل سافرت معه في سفر، لا ماسافرتشمعاه في سفر، هل رأيته في المسجد يركع ويسجد، قال له أه أنا شوفته في المسجد بيركع ويسجد.

طب ما الناس بتركع وتسجد، قد يكون حرامي وبيركعوبيسجد، شارب مخدرات وبيركعوبيسجد، وبعدين بينقر الصلاة سريعًا سريعًا ولم تؤثر في قلبه، ففي الوقت ده سيدنا عمر –رضي الله عنه وأرضاه- إدانا ميزان للحكم على الناس، إياك إن حد يخدعك.

أمور تجعلك لا تنخدع في الاختيار
إلا أن عندك ثلاث أمور تخلِّي الناس مفيش حد يخدعك عند الاختيار:
1-الاستشارة وجمع المعلومات عن البنت وعن الأسرة.
2- اللقاء المباشر معاها في أسئلة طويلة عريضة هنتكلم عنها.
3- الاستخارة.
بهذه الأمور الثلاثة تتعرف على الشخصية اللي قدامك فلا تنخدع، يقول لك كنت شايفها لابسه نقاب، ولابسه حجاب، ولبسها فضفاض وواسع، بعد الجواز مفيش صلاة، بعد الجواز ميكبولنسس، بعد الجواز في سماع موسيقى وأغاني وكليبات، بعد الجواز صوتها عالى أد كده في البيت وبتزعق وفضحانا بين الجيران، إنت حضرتك لم تُحسن الاختيار، عشان كده بقول لك في حاجة اسمها أبجديات الاختيار.

لا تنخدع بالمظاهر وإيّاك أنت تحكم على دين المخطوبة بسبب أهلها، فيقول لي طالما أمها صالحة يبقى البنت صالحة، لا يلزم كان سيدنا نوح –عليه السلام- كان نبيَّا كريمًا وكان ابنه كافر "يَا بُنَيَّ ارْكَب مَّعَنَا وَلَا تَكُن مَّعَ الْكَافِرِينَ * قَالَ سَآوِي إِلَىٰ جَبَلٍ يَعْصِمُنِي مِنَ الْمَاءِ ۚقَالَلَاعَاصِمَالْيَوْمَمِنْأَمْرِاللَّهِإِلَّامَن رَّحِمَۚوَحَالَبَيْنَهُمَاالْمَوْجُفَكَانَ مِنَ الْمُغْرَقِينَ" هود 43:42، يا بنتى لا تنخدعي إن هو صاحب لحية بس، اللحية من الدين بس مش كل الدين، ينبغي التعامل، وينبغي تسألوا عنه حد تعامل معه على الدينار والدرهم؛ في فلوس يعني، أو سافر معه في سفر، أو جاره الذي يعلم مدخله ومخرجه، قال النبي –صلَّى الله عليه وسلم-: " تخيروا لنطفكم وأنكحوا الأكفاء، وأنكحوا إليهم"[1]، قال في رواية تانية: "تخيروا لنطفكم ولا تضعوها إلا في الأكفاء"[2].

أمور تتضح بها حقيقة كل شخص
أبو الأسود الدؤلي قاعد مع أولاده، فبيقول لهم: "لقد أحسنت إليكم صغارًا وكبارًا، وقبل أن تولدوا، قالوا: وكيف قبل أن نولد.."،إزاي يعني أحسنت إلينا قبل أن نولد، قال: ".. تخيرت لكم من النساء من لا تُعيَّرون بها"،محدش خدعه فاختار امرأة صالحة ديِّنة، تقيّة، من بيئة صالحة دينِّة تقيّة، وبلا شك لأن هذه البيئة نور على نور.
ولذلك نقولالخلاصة في هذه النقطة في أبجديات الاختيار؛لاتنخدع بالمظاهر، وأنا بقول لكل بنت إيّاك أن تعتقدي إن الشاب اللي عرفتيه عن طريق الفيس، أو عن طريق الانستجرام، أو عن طريق مش عارف الدورات الموجودة المختلطة في بعض الأماكن في المجموعات الخاصة على الفيس، إيّاك أن تنخدعي ده مبيحكمش على شخص، إنما الحكم عليه بالتعامل، الحكم عليه بالسؤال عنه، الحكم عليه باللقاء المباشر، الحكم عليه بالاستخارة وبهذه الأمور تتضح لنا الرؤية.

وبقول لكل شاب سيبك من صورة البنت اللي لابسه لنسس، سيبك من صورة البنت اللي على النت اللي حاطه ميكب، وأنت معجب بجمالها وبذوقها، لالا، لما تنزل لأرض الواقع هتعرف بأن النت ده لقيط؛ لا يُعرف له أب ولا أم ولا نسب، ومن وراء حجاب، وكثيرًا جدًّا من البنات قد خُدعت، إن الشاب يقعد يتكلم معاها ويخوض معاها في تجارب، وقد تتنازل البنت عن بعض الأخلاقيات وعن عِفَّتِها وتبعتله بعض الصور، وبعدين يمسكها بيده ويُذِلُّها، وقد تقع في الرذيلة وتقع في الحرام وسَمِعتُ هذا بأُذُني كثيرًا ورأيته بعيني في الاستشارات، ولذا أقول من أبجديات الاختيار لا تنخدع بالمظاهر الكذَّابة، وإياك وقصة المعرفة عن طريق الانترنت.

نصائح هامة لكل أخت لها علاقة بشاب
وأنا بقول لكل بنت لها علاقة بشاب بقالها سنة واتنين، ويقول لك لسه هدخل الجيش، ولسه هتوظف، أنا بقول لك كلام صريح وواضح والله لو أرادكِ زوجة يجيلك من الباب مش من الشباك، الأمر الآخر احذري من المظاهر الكذابة؛ شكله شياكة، عنده عربية، مامي وبابي والكلام الجميل الحلو ده اللي بيخدع أكثر البنات لما تنزل لأرض الواقع بترى بأن هذا الكلام غير واقعي بالمرة، ولذلك بقول لحضرتك يا بنيتي، يا بنتي، يا أختي، لو لكي علاقة بحد عن طريق الانترنت وبيتكلم معاكي افتحي الباب قولي له هخلي محرمي يكلمك، أبويا، أخويا، عمي، خالي، حد من الأسرة، وبعدين اتفضل تعالى للبيت.

أقسم بالله قبل أمس بنت بتقول لي أنا ليا علاقة مع شاب متدين، متدين طب شكله إيه التدين ده، طب العلاقة دي إزاي، أنا عارفاه عن طريق الانترنت بقالنا ثلاث سنوات، بنتكلم من ثلاث سنين، وبنتكلم كلام في الحدود، دايمًا بيحاولوا يثبتوا اللي بيستشيروه في الكلام فبيقولوا له كلام يسكته يعني، فبتقول لي احنا بقالنا ثلاث سنين بنتكلم كلام محترم جدَّا، وكلام أخوي وكلام ملوش علاقة بأي حاجة وحشة، عشان هي مش عاوزاني أقول لها إن هذا حرام، عشان اتباع الهوى وقلبها ميَّال، طب ثلاث سنوات وبعدين؟ قالت لي لسه هيخش الجيش، اللهم صلِّ على النبي، قلت لها طيب ببساطة جدَّا إنت ممكن تخلي حد من محارمك يقول له اتفضل الباب مفتوح، وتعالى والله وبالله وتالله أرسلت إليّ رسالة اليوم بعد صلاة الفجر بتقول لي وأنا بقرأ الأذكار بتقول لي على الواتس كده الشاب طلع مخااادع، ما هو عاوز منها حاجة؛ عاوز جسدك، عاوز نفسيتك، عاوز عفّتك، عاوز حيائك.

لماذا لا نكاح إلا بولي؟
فإياك أن تنخدعي بالمظاهر اللي عاوزك يطرق عليكِ الباب ويأتي إلى البيت ليطلبكِ زوجة وأنتِ إنسانة عفيفة طاهرة لكِ ولي، قال النبي –صلَّى الله عليه وعلى آله وسلم-: "لانكاح إلا بولي"[3]، مفيش زواج منغير وليّ حتى المرأة الثيِّب وده كلام جمهور الفقهاء حتى المرأة الثيِّب لابد أن يكون لها وليّ، طب والأمر ده ليه؟ حِكَم عظيمة جدًّا، لأن المرأة بطبيعتها بتنخدع بالكلام المعسول، يعني لو قال لها أغار عليك مني ومنكِ ومن نفسي ومن مكانكِ والزمان، ولو أني خبئتك في عيوني إلى يوم القيامة ما كفاني هيُغْمَ عليها بالوضع ده، طبيعة البنت كده، تميل إلى الأنوثة، تميل للمشاعر إلى العواطف، فأنا بقول لك يا بنتيلاتنخدعي من مظاهر من وراء حجاب ابتاع النت دي، إنما لابد أن يأتي أو قبل ما يدخل للبيت الوالد يسأل كوليّ عنه الأول،ارتحتوا للموضوع يدخل البيت، نسأل 60 سؤال يتعلق بالعقيدة والإيمانيات والتربية، والتعامل مع الزوجة، وفهم الأزمات والمشكلات، وإزاي نحلها ونتعامل معاها، وبعد كده نصلي صلاة الاستخارة، وبهذه الطريقة لا ننخدع أبدًا.

الخلاصة يا ابنتي،الخلاصة يا ابنتي لا تنخدعي بالمظاهر، وبقول لكل شاب أيها الشاب لا تنخدع بالمظاهر، لنا لقاء آخر إن شاء الله وصلَّى الله على نبينا محمد وعلى آله وصحبه أجمعين والحمد لله رب العالمين، والسلام عليكم ورحمة الله وبركاته.

تم بحمد الله
شاهدوا الدرس للنشر على النت في قسم تفريغ الدروس في منتديات الطريق إلى الله وتفضلوا هنا:
https://forums.way2allah.com/forumdisplay.php?f=36

[1]" تخيَّروا لنطفِكم وانْكحوا الأَكْفاءَ وأنْكحوا إليْهم" حسنه الألباني

[2]خلاصة حكم المحدث(محمد ابن عبد الهادي): لا أصل له،التخريج: أخرجه ابن عدي في ((الكامل في الضعفاء)) (2/195)، والدارقطني (3/299)، والخطيب في ((تاريخ بغداد)) (1/264).
"تَخيَّروا لنُطَفِكم، فانكِحوا الأكْفاءَ، وأنكِحوا إليهم. وفي لفظٍ: اطلُبوا مَواضِعَ الأكْفاءِ لنُطَفِكم؛ فإنَّما الرَّجلُ رُبَّما أشبهَ أخوالَه" حسنه الهيتمي المكي.

[3]" لا نكاحَ إلَّا بوليٍّ" صحيح ابن حبان

**يسرا بنت الصالحين** · 28-12-2019, 12:38 AM

وعليكم السلام ورحمة الله وبركاته،

أحسنتم جزاكم الله عنا خيرا

إعـــــــلان

أبجديات أسرية: الحلقة الثالثة | لا تنخدع بالمظاهر | الشيخ عبد الرحمن منصور

أبجديات أسرية: الحلقة الثالثة | لا تنخدع بالمظاهر | الشيخ عبد الرحمن منصور

تعليق

تعليق