إعـــــــلان

تقليص
لا يوجد إعلان حتى الآن.

♥ دورة علاج الوسوسة و الإكتئاب ♥ للأستاذة سارة محمد حسن ♥

تقليص
X
 
  • تصفية - فلترة
  • الوقت
  • عرض
إلغاء تحديد الكل
مشاركات جديدة

  • #31
    رد: ♥ دورة علاج الوسوسة و الإكتئاب ♥ للأستاذة سارة محمد حسن ♥

    حلقة 20

    عودة لتصحيح المفاهيم

    طبعا أنا مش هقدر أصحح كل المفاهيم لكن أنا هختار شوية حاجات أتكلم فيها وإن قدر الله لنا دورة مخصوصة عن تصحيح المفاهيم يكون بالتفاصيل المملة
    ونصيحة عامة ومهمة

    ادرسي واتعلمي واسألي
    لا تكتفي بالصورة الي في ذهنك دايما ...لو انحبست مع عقلك في قمقم لضللت
    بجد اخرجي من دايرة نفسك الضيقة واسمعي وجهات نظر أخرى وناقشي ناس عاقلة واسمعي أكثر مما تتكلمي

    أول مفهوم محتاج تصحيح
    البلاء وده اتكلمنا عنه كثير فمش حابة أعيد راجعوا الحلقات
    الخلاصة أن أي شوكة تتشوكي بيها حتى لو أنت الي تسببتي في الأذية لنفسك
    حتى لو أنت اللي غلطانة
    ده بلاء احتسبيه واستبشري بفضل الله أنه رفع درجة أو محو سيئة

    من أهم تصحيح المفاهيم الي محتاجينها
    أن الدنيا كدر ودار ابتلاء لم تصف يوما لامرأة ولا لرجل
    وأن الآخرة خير وأبقى
    بس أحنا لنا حقوق ومحتاجين نعيش بوضع مريح
    والشرع ممعنكيش أبدا تغيري الي تقدري تغيريه في حدود الشرع
    احرصي أنك تتعلمي حقوقك الشرعية وتسألي عنها متتكسفيش من ده

    الدين مش خنقة
    محتاجين نفهم يعني إيه زهد سني ويعني إيه ورع سني ...وأن نظام الدروشة والزهد في كل شيء و أنك عشان تكوني متدينة ده مش هو الدين
    وأن التضييق على النفس فيما أحل الله من مداخل الشيطان


    محتاجين نفهم كويس ازاي أفكر تفكير منطقي وأن كثير حل 90 في المية من مشاكلنا أنننا مأزمين في حاجات أصلا مش أزمة

    يتبع

    التعديل الأخير تم بواسطة سلمى أم عمر; الساعة 13-02-2017, 12:17 AM.
    رب اغفر وارحم وأنت خير الراحمين

    تعليق


    • #32
      رد: ♥ دورة علاج الوسوسة و الإكتئاب ♥ للأستاذة سارة محمد حسن ♥

      حلقة 21
      تصحيح المفاهيم
      "كل واحد في نفسه ملك" !
      غلط يا فندم...أنت مش ملك ...أنت من عامة الشعب انزلي من فوق ...انزلي انزلي
      أنت ممكن تغلطي أه والله
      ممكن تغلطي وبعدين مطلوب تستغفري وتتوبي.

      ركزي معايا
      خرجت على أخواتها في الله تعظهم وتنصحهم بالتدرج في الطاعة وترك اليأس من رحمة الله والتوبة مع تكرارها وعدم اليأس إذا أحدثنا ذنوب لأن الله غفور رحيم يقبل التوب ويغفر الذنب ويعفو عن السيئات
      كررت كثيرا نحن نحتاج إلى جهاد طويل المدى وكلنا بنغلط وبنقع في الذنوب
      لكن في الحقيقة لا تطبق هذا الكلام وتعامل نفسها أنها مختلفة ويصبها الاحباط لو تفكرت أن أمامها جهاد طويل وأن الانجاز البسيط والطاعات الخفيفة والتدرج في الطاعة والأخلاق وأنه يمكنها أن تأخذ بالأقل وتبدأ بركعتي قيام فقط ...كل هذا فوق طاقتها!! هي تريد أن تكون في أعلى درجة ولا تقبل بالدونية

      خطأ
      بلاش تهويل واستمتاع بتعذيب النفس وتوبيخها واهانتها
      انت مش معصومة وكل ابن ادم خطاء
      وانت انسانة عادية ممكن تغلطي على فكرة وتستغفري وتتوبي
      وعادي كمان ممكن تضعفي تاني وتغلطي تاني وعاشر كمان ..وبعدين تتوبي
      وربنا خلقك في الدنيا عشان تجاهدي وتحاولي
      لم يخلقك ملاكا لا ينبغي لك الخطأ وهو الكريم العليم بخلقه وبضعفهم
      ومن كيدك للشيطان إذا أذنبتي تتوبي مش تيأسي من رحمة ربنا
      احنا بنبالغ في تقدير نفسنا فلما بنغلط بنقتلها ونعذبها عشان متوقعناش نغلط

      حاولي تفهمي اننا عيال بنغلط كثير ونكرر نفس الاخطاء واننا لسة في كي جي وان عادي ولسة هنبقى في اولى ابتدائي وهكذا
      ربنا جعلنا حل اسمه التوبة والانكسار لله وفتح للحل ده باب اسمه باب التوبة وجعل له عمل قلب اسمه الرجاء والمحبة والافتقار ويفرح بعبده اذا تاب

      قال النبي صلى الله عليه وسلم :
      إنَّ عبدًا أصاب ذنبًا ، وربما قال : أذنب ذنبًا ، فقال : ربِّ أذنبتُ ، وربما قال : أصبتُ ، فاغفِرْ لي ، فقال ربُّه : أَعَلِمَ عبدي أنَّ له ربًّا يغفر الذنبَ ويأخذ به ؟ غفرتُ لعبدي ، ثم مكث ما شاء اللهُ ثم أصاب ذنبًا ، أو أذنب ذنبًا ، فقال : ربِّ أذنبتُ - أو أصبتُ - آخر فاغفِرْه ؟ فقال : أَعَلِمَ عبدي أنَّ له ربًّا يغفر الذنبَ ويأخذ به ؟ غفرتُ لعبدي ، ثم مكث ما شاء اللهُ ، ثم أذنب ذنبًا ، وربما قال : أصاب ذنبًا ، قال : قال : ربِّ أصبتُ - أو قال : أذنبتُ - آخرَ فاغفِرْه لي ، فقال : أعَلِمَ عبدي أنَّ له ربًّا يغفر الذَّنبَ ويأخذُ به ؟ غفرتُ لعبدي ، ثلاثًا ، فليعملْ ما شاء
      الراوي : أبو هريرة | المحدث : البخاري | المصدر : صحيح البخاري
      الصفحة أو الرقم: 7507 | خلاصة حكم المحدث : [صحيح] | شرح الحديث

      يعني طالما العبد مقيم على تكرار التوبة فلا يضره انه يضعف ويكرر المعصية...ده مش تهوين للذنوب وجرأة عليها لكن تشجيع على التوبة مهما تكرر الذنب وتعليم رجاء رحمة الله

      اعرفي أختي الحبيبة
      أنت بشر من البشر الذي خلقه الله ...لم تولدي كاملة ولن تصيري كاملة في لحظة ولا ليلة
      الكمال البشري يأتي بالتدريج شئت أم أبيت ويأتي مع الوقت
      طريقة : هذا لا يليق بي: قبل الذنب حسنة جدا عشان تمنعك من الذنب ..وقتها الأنفة والعزة والكبرياء الي يمنعوك تذنبي
      لكن ضعفتي ووقعتي وكلنا بنقع ..والي ميحسش أنه بيذنب وبيغلط ده هو الي عنده مشكلة
      فبعد الذنب لا ينبغي أن تستخدميها مع نفسك

      استخدمي طريقة: قد أذنبت يارب فاغفر واعفو عني فأنا عبدك الضعيف المنكسر الفقير إليك الذي لا رب له ولا ملجأ إلا أنت ...طرقت بابك يارب فلا تطردني ولا تحرمني وتوفني مسلما وألحقني بالصالحين
      يتبع




      التعديل الأخير تم بواسطة سلمى أم عمر; الساعة 20-02-2017, 02:20 AM.
      رب اغفر وارحم وأنت خير الراحمين

      تعليق


      • #33
        رد: ♥ دورة علاج الوسوسة و الإكتئاب ♥ للأستاذة سارة محمد حسن ♥

        حلقة 22
        تصحيح مفاهيم :
        الشهوة! والتفكير في الشهوة
        دي رسالة كنت كتبتها ردا على عدة أسئلة بنفس المحتوى بصيغ مختلفة عن الشهوة والتفكير في الشهوة وممارسة العادة السرية
        عادة الي عندها وسواس جنسي بتقع في العادة السرية وده بيزيد الضغط العصبي والانطواء والتعب النفسي و..الوسواس طبعا
        والأسوأ إن البنات بتصوم ومتخيلين أن الصيام هيمنع عنها ضغط الشهوة و ده
        غير صحيح وراجعي شيخ إذا كان الحديث داخل فيه النساء ولا لا .
        راجعي طبيب إذا كان الصوم أصلا مناسب لصحتك ولا لا
        شكوى متكررة:
        البنات الي بتصوم وهي عندها وسواس جنسي الوسواس بيزيد ! ضغط الشهوة بيزيد
        ده له أسباب وتفسير مش حابة نخوض فيها

        أول شيء لازم تستوعبيه إن الشهوة زي الأكل والشرب فمينفعش تقاوميها بالشكل ده وإلا هتزيد
        ركزي معايا دي أهم نقطة في علاج الموضوع :
        متقاوميش - متحزنيش - متعتبريش نفسك مش طبيعية!
        المقاومة زي ماتكلمنا في عبقرية التجاهل هي نوع من الاهتمام والوسوسة بتزيد مع الاهتمام

        أمال إيه أستمر ؟
        لا
        تجاهلي الموضوع وانشغلي بشيء بتحبيه وقللي الضغوط
        1- ضغط المثالية...انت عادية نفضي فكر الرهبان والعامة ده من مخك...الرسول تزوج 9 وطاف عليهم بغسل واحد..سيدنا سليمان طاف على 99 امراة في ليلة...كمال البشر في الشهوة مش في كبتها
        2- ضغط الشغل والدراسة وووو "بدون استمتاع"
        اتبسطي بدراستك وبشغلك وغيري لحد ما توصلي لوضع مريح وممتع ولو جزئيا بحيث تقدري تزودي استمتاعك حتى لو هي دراسة بسيطة ..حبيها وصاحبي الكتب
        متخليش مشاعرك تبقى عملالك ضغط

        أنا عرفة إنك غالبًا بتفكري إنك عندك نعم "أكبرمنك" وإنه ساعات بتقولي أنا منافقة ..غلط...محتاجة تصحيح مفهوم النفاق
        واطلب علم شرعي لنفسك مش عشان تكوني مفتي ولا تساعدي الناس ولا تتصدري ...علم بسيط لنفسك لاستمتاعك واعرفي إن العلم الخشية...العلم عشان نقرب من ربنا ...نحبه...نتعرف عليه وعلى شرعه..حبي العلم ..خلي عندك فضول وتشويق...متذاكريش "واجب" استحضري فضل العلم واسمعي حاجات عن فضل العلم الشرعي واتبسطي واستمتعي بكل طاعة ومعلومة
        فكي نفسك شوية يا حبيبتي اتبسطي استمتعي بنعم الله عليك
        مهم جدًا إنك تستحضري حب الله ورجاء رحمته مش بس عقابه....متضيعيش سنين عمرك وتندمي...طاعة ربنا حب وسعادة وانطلاق وانجاز...انت خفيفة مش بتجرجري عيال استمتعي
        أختي المتزوجة أنت كمان أنت عندك زوجك عيشي معاه واتبسطي بلاش حياء كاذب مذموم استمتعي ده حقك
        ولو كبيرة في السن وضيعتي سنين عمرك كفاية الي ضاع عيشي الي متاح استمتعي

        من ضمن التجاهل إنك متفكريش في المشكلة...التجاهل يعني لما يجيلك خاطر الشهوة متتوتريش متحزنيش اضحكي وفكري في حاجة تانية لذيذة ..إن شالله توم وجيري :))
        لو تصرفتي مع نفسك بطريقة ألطف من كدة هتسمع كلامك
        نفسك زي الطفل الصغنن ترفقي بيه..وخديه بشويش ..مرة بحزم ومرة بحب ...لكن لا قسوة ولا اهانة

        انت متخيلة إنك بذلتي جهد ومفيش نتيجة الحقيقة انت بتقاومي حاجة طبيغية عندك زي الاكل والشرب فبتزيد...المقاومة مش شرط وقت التفكير لكن بعده
        متقاوميش لكن تجاهليها...

        ولو غلبتك شهوتك ووقعتي في شيء غلط ..عديها واستغفري ومتفكريش في الي حصل بل تجاهليه ..قولي ربنا غفور رحيم وأنل بستغفر وهعمل طاعات كثير بحبها .
        مش هي معصية...كاثريها بالطاعة واستبشري متقلقيش..إن الحسنات يذهبن السيئات

        أنا عرفة إنك بتقولي في نفسك طب ما أنا لجأت إلى قيام الليل والدعاء والاستغفار،وزمانك بتفكري بطريقة العجز وإن ربنا مش هيتقبل منك
        وأنا هقولك
        بل الجأي لله ...أن يشرح صدرك ويذهب عنك الحزن
        وصلي القيام لله واعملي الطاعة لله ...عشان تكاثري الذنوب مش عشان تبقي معصومة

        مين قال إن الذنوب سبب عدم القبول؟ إذا كان كل ابن آدم خطاء واحنا بنعمل الطاعة عشان يغفر ويرحم ويعفو ويتكرم
        يا بنتي...الله أكرم وأعظم وأرحم مما تظنين...
        بل قولك إنه لا يقبل منك لأنك على ذنب هو أعظم من الذنب!
        هو الشكور...غني عني وعنك ...يريد قلبك فاجعلي قلبك يسجد تحت العرش منكسرا...فيجبر عثرتك ويعفو عنك
        يا ابنتي
        أهل السنة يقولون مرتكب الكبيرة تحت المشيئة...ليس محبط العمل كافر ..فكيف بمرتكب الصغيرة واللمم..واعرفي انه كل ما دون الزنا فهو صغائر....إن مش بسهل لك المعصية لكن خففي على نفسك عشان تقدري تتقدمي

        يا ابنتي
        سقت بغي كلبا فغفر الله لها برحمتها اياه
        يا ابنتي
        رجل قبل امراة وفعل وفعل ولم يبلغ الزنا فنزل فيه قوله تعالى "
        وَأَقِمِ الصَّلَاةَ طَرَفَيِ النَّهَارِ وَزُلَفًا مِّنَ اللَّيْلِ ۚ إِنَّ الْحَسَنَاتِ يُذْهِبْنَ السَّيِّئَاتِ ۚ ذَٰلِكَ ذِكْرَىٰ لِلذَّاكِرِينَ (114) " سورة هود

        يا ابنتي
        دعي عنك هذا الفكر الخطأ واقبلي على رب غفور رحيم...
        شعور الانسان بعظم "كل" الذنوب باعتبار اننا عصينا "الله عز وجل" هو شعور حسن
        لكن التضخيم لذنب معين والمبالغة في الصدمة غلط انت بشر

        عادي بتغلطي ونتوب ونستغفر ونغلط تاني ونستغفر ونتوب وهكذا
        انت ممكن تكوني وقعتي قي العادة السرية
        من مشكلات العادة السرية إنها بتسبب شعور بالذنب شديد واكتئاب واحتقار للنفس
        والشعور بالاحباط ده بيزودها
        فبنكون في دايرة مقفولة

        عادة سرية - احباط - عادة سرية تاني - احباط اشد - عادة سرية ......الخ
        فشعورك بالإحباط واحتقار نفسك ووو مش شعور صحي ولا مطلوب شرعا
        المطلوب شرعا انك يكون عندك أمل في عفو الله ورجاء رحمته وخوف غضبه ..تكوني في ثقة برحمة الله تكوني مستشعرة الإفتقار إلى الله
        اقرأي كتاب الافتقار إلى الله لب العبودية للشيخ الصويان

        أنا عارفة إنك بتقولي في نفسك إن ربنا اداكي نعم وانت بتقابليها بمعصية
        التفكير ده غلط
        وقعتي في ذنب ما - ده عادي انت مش ملاك
        استغفارك وجهادك توفيق من الله - وهو ده الصح
        المؤمن يتقلب بين نعمة يشكرها
        وذنب يستغفر منه
        وبلاء يصبر عليه

        وهؤلاء الثلاثة هم عنوان السعادة
        فلا ينبغي ان ينظر الانسان للنعم باعتبار انه ميستحقش عشان هو بيعمل ذنب
        بالله عليك الله أعطانا البصر وفيه ناس محرومة
        يعني نستحق نعمة البصر؟؟ لا والله محض فضله وكرمه...بلاش ..احنا منستحقش نعمة الماء البارد أصلا ..لكنه يرزق لأنه الرزاق ويعفو لأنه العفو الغفور الكريم ..ويثيبك على الطاعات رغم نقصنا وأنها حاجات بسيطة جدا لأنه الشكور ويفرح بتوبتنا لأنه الرب العظيم الكريم الجواد

        اشكري واتبسطي وافرحي بفضل الله واسألي الله حفظ النعم
        احنا مش مستحقين لحاجة خالص لكن فضل الله واسع ..ربك كريم
        وكتب الله على بني ادم انهم بشر يخطئون فيستغفرون فيغفر..يجاهدوا ويصبروا فيحبهم الله
        لو كانت النعم مقابل الطاعة ...يبقى رحنا في داهية..


        كلنا على باب الله..مش مطلوب متغلطيش...مطلوب تعرفي قدرك وقدر مولاك وخالقك...تمشي في الطريق تحاولي

        وفقك الله يا ابنتي

        التعديل الأخير تم بواسطة سلمى أم عمر; الساعة 20-02-2017, 02:16 AM.
        رب اغفر وارحم وأنت خير الراحمين

        تعليق


        • #34
          رد: ♥ دورة علاج الوسوسة و الإكتئاب ♥ للأستاذة سارة محمد حسن ♥

          حلقة 23
          تصحيح المفاهيم
          فيه فرق بين أننا نكظم الغيظ ونصبر
          وبين أننا نكبت ونكتم فننفجر
          الكف عن الشكوى والصراخ والجزع والمعاصي بطريقة شرعية بيكون عمل قلبك حاضر فبيفرغ بطريقة سلسلة الضغوط دي
          مش هتيجي من أول مرة
          ولا تاني مرة
          ولا عاشر مرة
          هتجربي مرة وتنفجري
          وتجري التانية وتحسي بالكبت

          وتجربي التالتة وتستحضري عمل القلب شوية وبعدين ترجعي تاني
          عادي
          أهم شيء لما تفرغي متغلطيش ...بلاش غيبة ولا نميمة ولا توقيع
          فرغي على ورق
          الأعلى أنك تفرغي في سجدة وصلاة

          ده مش هيجي إلا بفهم معاني الشكوى والفرق بينها وبين الإخبار بالحال وكظم الغيظ والعفو والصبر والجزع ووو
          تعاملي مع الأمر ببساطة
          عندك هدف عاوزة توصلي له هتوصلي إن شاء الله وسجلي تطوراتك وافرحي بيها
          عادي لو نزلتي مرة
          أهم شيء كوني على الطريق
          رب اغفر وارحم وأنت خير الراحمين

          تعليق


          • #35
            رد: ♥ دورة علاج الوسوسة و الإكتئاب ♥ للأستاذة سارة محمد حسن ♥

            حلقة 24

            الفرق بين الحزن الي يخلينا نزيد الطاعة أو نجاهد المعصية وبين الإحباط والقنوط
            طبيعي لو الواحد عمل حاجة غلط لازم يتضايق بس مش لازم يقتل نفسه
            يتضايق الضيق الطبيعي الي يساعد على الخروج من المشكلة مش الضيق اللي يزيدها
            فرق بين الحزن الي يخلينا نزيد الطاعة او نجاهد المعصية
            والاحباط والقنوط الي يخلينا نضعف ونقتل نفسنا معنويا فنقع في الوحل

            المعصية بحر شهوة وقعنا فيه..كلما حركت ذراعيك بذعر ازددت غرقا وابتلعتي الماء..في حين الهدوء والنوم على الظهر بهدوء ..قوة الاعصاب وقبل كل دة الاستعانة بالله ...توصلك لبر الامان فيه حاجة مهمة جدا كمان اللي بيوصل لمرحلة أنه يقتل نفسه أحب أقولك انت محاولتيش تبطلي...انت بتوبخي نفسك وبتستمتعي بجلدها واشعارها بالعجز والهوان!
            بتحتقريها مش بتاخدي بايدها...بترميها بالوحل مش بتنظفيها...بتضربيها مش بتعلميها..بتمكني منها الشيطان مش بتبعديه عنها
            رفقا بنفسك عشان تقدري تساعديها..انت محاولتيش لسه اصلا ..كل ده كنت بتستمتعي وتجلدي نفسك مقابل المتعة مش أكثر ...المقاومة الصحيحة لسة جاية ان شاء الله
            تخيلي لو بنوتة قالتلك أنا بعرف شاب ...شتمتيها وهزأتيها واهنتيها....النتيجة هتكمل علاقتها بالشاب!
            انت بتعاملي نفسك كدة فهي بتضعف أكثر وبتستسلمي للغلط

            لاحظي أن المفهوم ده الخلل فيه بيدي للاكتئاب والوسوسة
            يتبع بآخر الدورة

            التعديل الأخير تم بواسطة سلمى أم عمر; الساعة 23-02-2017, 12:43 AM.
            رب اغفر وارحم وأنت خير الراحمين

            تعليق


            • #36
              رد: ♥ دورة علاج الوسوسة و الإكتئاب ♥ للأستاذة سارة محمد حسن ♥

              حلقة 25
              ختاما
              الكلام الي كتبناه ده محتاج في تطبيقه تغيير شامل للحياة
              الرقية هتاخد وقت وممكن تستغرق منك كثير

              العلاج النفسي عامة بيحتاج وقت وصبر وجهد وإرادة
              حاولي تكتبي لنفسك جدول من خلال الي قرأتيه وترتبي أنت هتعملي أيه
              لو مش قادرة خالص تاخدي خطوة اذهبي لطبيبة نفسية

              الي بتعاني من الوسواس والاكتئاب أظن الدورة والتعليقات حسسوك أنك مش لوحدك أنت مش غريبة ولا شيء متفرد ..كثير زيك ممكن نتعاون ونخرج من البحر المظلم بإذن الله
              الي مش بتعاني من الوسوسة والاكتئاب أظن الدورة دي وصفتلك كم المعاناة الي ممكن يكون غيرك بيعاني منه
              بعض التعليقات وضحتلك أكيد أن الموسوس كثير رافض الي هو فيه فمتأنبيهوش ومتشعريهوش أنه عبء عليك ...متكونيش عون للشيطان على أخواتك
              تجاهليها أنت

              لو تقدري تساعديها وده يحتاج أنها تكون واثقة فيك وتكرري عليها بهدوء طنشي وكبري دماغك وتلهيها عن الوسواس بمواضيع مثيرة لها
              محتاجين نقرأ الكلام ده أكثر من مرة ومحتاجين نحاول نقرأ ونسمع المواد المقترحة خلال الدورة
              عندنا شغل وورانا أعمال ...معانا وقت إن شاء الله ...احنا على الطريق بنحاول ...هدي أعصابك ورانا شغل بس مش مُضغطين ...شغل نستمتع بيه

              تمت الدورة بحمد الله ومنته وفضله
              جزاكم الله خيرا وبارك فيكم
              سبحانك اللهم وبحمدك أشهد أن لا إله إلا أنت أستغفرك وأتوب إليك
              التعديل الأخير تم بواسطة سلمى أم عمر; الساعة 23-02-2017, 12:43 AM.
              رب اغفر وارحم وأنت خير الراحمين

              تعليق

              يعمل...
              X