إعـــــــلان

تقليص
لا يوجد إعلان حتى الآن.

♥ دورة علاج الوسوسة و الإكتئاب ♥ للأستاذة سارة محمد حسن ♥

تقليص
X
 
  • تصفية - فلترة
  • الوقت
  • عرض
إلغاء تحديد الكل
مشاركات جديدة

  • #16
    رد: ♥ دورة علاج الوسوسة و الإكتئاب ♥ للأستاذة سارة محمد حسن ♥

    حلقة رقم 7

    أسئلة شائعة

    8- الإيمان والمرض النفسي = ايه هو الإيمان؟

    الإيمان قول وعمل
    قول قلب - عمل قلب - قول لسان- عمل جوارح
    قول القلب = التصديق

    بيجي الشيطان يشكك في قول قلبك
    يقولك أنت مش مصدقة أنت مش مؤمنة
    كلنا بنمر بالمرحلة دي في لحظة من اللحظات
    فيه ناس بتقع في الوسواس القهري ويزيد ويجننها
    وناس بيجيلها اكتئاب

    وناس بتكبر دماغها وتقولك أيه الهبل ده ...دول هم الي بيعدوا القنطرة
    الصحابة الي راحوا للنبي وشكوله أنهم يجدوا ما يتعاظم عليه قولهم
    قال لهم :"أوقد وجدتموه؟ هذا محض إيمان أو هذا صريح الإيمان"


    القنطرة الي بعدها
    يجيلك في عمل قلبك
    أنت مرائية أنت منافقة أنت حسودة أنت متكبرة أنت كل التهم الي تجيب اكتئاب ووسواس
    ناس يجيلها وسوسة لدرجة أنها تسيب العمل
    ناس يجيلها اكتئاب

    ناس تقولك لا أيه الهبل ده ...دول الي بيعدوا القنطرة دي
    لاحظي أنا لسة مش بشرح العلاج هيجي بإذن الله

    يجيلك الشيطان في قول اللسان وعمل الجوارج
    مغسلتيش رجلك كويس في الوضوء

    النجاسة
    أبواب الطهارة كلها بقى
    العمل ده باطل / غير صحيح ...عيدي !
    وهكذا

    ناس يجيلها اكتئاب وناس يجيلها وسوسة ويسيبوا العمل
    وناس تقولك أيه الهبل ده ...دول الي بيعدوا القنطرة
    يبقى أدي أول تعلق بين الإيمان والمرض النفسي

    ========


    علاقة ثانية
    عمرك في حياتك شفتي واحدة موسوسة عايشة مع ربنا بالحب والرجاااااء وعندها خشية وحياء يمنعوها من المعصية لكن مغلبة جانب الرجاء والمحبة؟؟
    الجواب لا

    الغالب الموسوسة بتكون من الي عندها خلل في الرجاء والمحبة
    بتكون مغلبة جانب الخوف لدرجة أنها ..بتوسوس أو تكتئب أو كلاهما

    فده علاقة تانية وهي هنسميها علاقة طبيعة إيمانك بالمرض النفسي
    يدخل فيها طبيعة الأعمال الصالحة الي بتعمليها
    الي طبيعة إيمانه في الأعمال أنه يساعد الناس ويجري على حوائجهم غير الي طبيعته بيصوم كثير غير الي طبيعته بيصلي كثير غير الي طبيعته بيطلب العلم كثير
    كل واحد فيهم أكثر عرضة لإصابة غير التاني وأكثر مقاومة لمرض معين أكثر من التاني
    يبقى المرض النفسي متعلق بالإيمان مش بالمفهوم الغلط أنه المؤمن لا يمرض أو أن الي بيمرض نفسيا ضعيف الإيمان

    لا خالص لكن من ناحية مداخل الشيطان من قول القلب وعمله وأعمال الجوارح
    ومن ناحية تأثير طبيعة الإيمان الي أنت بتختاريه في نفسيتك
    يعني طبيعي الي بيساعد الناس بيكون عنده مقاومة أكبر للاكتئاب
    وأن فيه ناس لما بتصوم ممكن يجيلها وسواس قهري بسبب تأثير الصوم في الجسم ونقص المعادن والموصلات العصبية بسبب الصوم ومتقوليليش صوموا تصحوا هو حديث ضعيف ..والصوم بيضعف البدن عادي يعني... وسيأتي في الوسواس الجنسي للنساء بالذات أنه الموضوع ده مشكل بخلاف الصوم للشباب الي عندهم شهوة زيادة

    ========

    كمان علاقة
    تأملي في الجملة دي كدة من فضلك
    الي بيكظم غيظه بعمل قلب صحيح مش هيجيله كبت ولا حالة نفسية ... لكن الي بيكتم غيظه بطريقة غير الي رسمها الشرع قلبا وقالبا هيجيله كبت وانفجار ومرض نفسي

    الي بيصبر على حزن معين بعمل قلب صخيح ومفهوم إبتلاء والدنيا والقدر عنده مظبوط مش هيجيله مرض نفسي ولا هيمر بحالة عدم اتزان إلا بمقدار الخلل عنده في المفاهيم الشرعية..وطبعا في الواقع احنا عندنا خلل كثير ..عادي طبيعي نهتم بتصحيح الخلل بس بدون يأس من رحمة ربنا

    والي هيجزع وينهار ويجيله انهيار عصبي او عدم اتزان او اي حاجة نتيجة حزن او ابنلاء مش معناه انه كافر لكن الدنيا مش ابيض واسود...مش كفر وايمان بس ....
    الايمان درجااااات ومفاهيم... الايمان الوان وانواع بعدد اعمال القلب والجوارح وحتى التصديق واليقين درجااات..وكل انسان له نصيب من الايمان وطبيعة ايمان بقدر الغالب عليه من العمل القلبي او عمل الجوارح وطبيعة ذلك وتاثيره
    التوبة والشعور بالندم وتأنيب الضمير لما يكون صح بيؤدي للعمل الصالح والحماسة ...لكن لما يكون جلد ذات وسوط الشيطان (سوط = كرباج) الي بيضربك بيه عشان يحطمك عن العمل تماما
    وهكذا كثير أعمال قلوب بنسيء فيها
    زي أعمال الجوارج كثير من فخ الشيطان أنه يفتح لك أبواب الخييييير فتعجزي عنها كلها

    وابن القيم له في آخر كتاب الروح شيء ولا الخيااااااااال أهم جزئية فيه أنه بين أن وسوسة الملك تزيد من عملك ويأنس قلبك لكن وسوسة الشيطان يقعدك عن العمل

    فنفهم أنه أحيانا بنظن أننا بنأتي بعمل القلب صح ...واحنا غلط فيتسبب في مرض نفسي واحنا فاكرين أننا محسنين وبنعمل العمل الصالح فإزاااي جالنا المرض؟
    العاقل يرمي الغلط على نفسه
    الي مش عاقل يقولك الدين بيجيب مرض نفسي

    =========

    علاقة كمان متعلقة بالسابقة
    القفز على مراتب الترقي في الإيمان ممكن يسبب مرض نفسي!
    يعني مثلا ...فيه حق لي عند حد ...حقي شرعا أني أخده ...فيه مرتبة أنه أعفو ...مرتبة أني أحسن للي ظلمني (طبعا الكلام على ظلم شخصي وحاجات دنيوية مثلا )

    يجي حد يلح عليك أو نفسك تلح عليك أنك تعملي الأعلى ...بس مستواك = أنك تاخدي حقك
    فلما تعملي الي أعلى منك ...يجي الاكتئاب والوسواس!
    مثال تاني
    مستواك تصلي ركعتين قيام
    تقومي أنت تدبي 20 ركعة!
    متقدريش تكملي
    فيجيلك اكتئاب أو وسواس (دي أمثلة تدل على طريقة حياتك أصلا ) ...أيه العلاقة؟ لأن حضرتك عرضتي نفسك لإحباط مستمر وتأنيب وجلد ذات
    النفس محتاجة تربية وللأسف الموضوع ده محدش بياخد باله منه ومنه بيحصل الانتكاس والاكتئاب والوسوسة للي ميلقيش حد يصلح له طريقه حقيقة

    يتبع بإذن الرحمن





    رب اغفر وارحم وأنت خير الراحمين

    تعليق


    • #17
      رد: ♥ دورة علاج الوسوسة و الإكتئاب ♥ للأستاذة سارة محمد حسن ♥

      حلقة رقم 8

      أسئلة شائعة


      = احنا قلنا أن المرض النفسي مش ناتج عن كفر ولا أن المؤمن لا يمرض نفسيا في مقابل أن الكافر هو الي بيمرض نفسيا ..وقلنا أن الإيمان متعلق كعامل مقاوم وكعامل معالج للمرض النفسي
      طب سؤال هل المرض النفسي ناتج عن "نقص إيمان" بمعنى أن المريض نفسيا أقل إيمانا جزما من الي مش مريض نفسيا؟؟
      وهل المرض النفسي بيسبب أن الإيمان ينقص؟


      جواب:
      * هو الي قرأ بعناية المفروض يكون عنده إجابة بس خلينا نعيد كنوع من المراجعة السريعة:
      1- قسمة كافر بيمرض ومؤمن لا يمرض = غلط
      وقسمة عالي الإيمان لا يمرض وناقص الإيمان لا يمرض = غلط
      ممكن يكون الإنسان عالي الإيمان ويمرض
      واحنا قلنا الصحابة مكنش متفشي فيهم المرض النفسي زينا للفرق الشاسع في طبيعة المجتمع وبيعة الإيمان والظروف وطريقة التعامل مع المرض النفسي
      لكن كان بعضهم عنده وسواس مثلا

      لأن طبيعة الإيمان بتفرق
      والمقصود بطبيعة الإيمان زي ما شرحنا في حلقة رقم 7 أن الإيمان أعمال كثير ظاهرة وباطنة واعتقادات كثير ظاهرة وباطنة ..فلو طبيعة إيمانك تميل للخوف مثلا أكثر من الرجاء ده ممكن يكون سبب من أسباب الوسواس القهري في الطهارة مثلا ...

      وقلنا أن الي إيمانه مثلا معتمد أكثر على التعاون مع الناس وخدمتهم (ماهو ده عمل صالح من الإيمان) بيكون نوعية عمله الإيماني ده نوع مقاومة عالية للوسواس والاكتئاب
      وأنه ممكن الصيام لبعض الناس يسبب وسوسة! رغم أن عمل إيماني
      وهكذا


      الأسباب كثير بس الي عاوزة أوصلهولك أن أنت ممكن تكوني بتعملي أعمال كثير من أعمال الإيمان وتصابي بالوسواس ...ومن العلاج (مش كل العلاج بس من العلاج ) في الحالات دي أنك تضبطي العمل الإيماني وده الي هنقوله في وسائل العلاج بإذن الله
      وده غير اللبس في مفاهيم شرعية كثير محتاجين نصححها

      ثم كون الشيطان له علاقة بالمرض النفسي فده يخليك تفهمي أن المرض النفسي مش للي عندهم نقص إيمان وبس
      لهذا قال النبي للموسوسين في إيمانهم لما اشتكوله إنا نجد في صدورنا ما يتعاظم علينا قوله ..فقال لهم : أوقد وجدتموه حقا هذا محض إيمان أو هذا صريح إيمان


      =طيب
      ننتقل للسؤال المهم :
      هل المرض النفسي بيقلل الإيمان؟
      طيب خلينا نقول : هل المرض العضوي بيقلل الإيمان؟

      الجواب
      بيقلله للناس وبيكون زيادة لناس
      بيقلله للي يتسخط ويبعد
      وبيزود الإيمان للي يحتسب ويصبر ويرضى وياخد بأسباب الشفاء ويدعي ويتأمل حكمة ربنا ويرجو ثواب الله ويحاول يعمل الي يقدر عليه من عبادات ويستغفر الله مما عجز عنه ..وهكذا


      يتبع بإذن الله بوسائل العلاج المقترحة
      رب اغفر وارحم وأنت خير الراحمين

      تعليق


      • #18
        رد: ♥ دورة علاج الوسوسة و الإكتئاب ♥ للأستاذة سارة محمد حسن ♥

        حلقة رقم 9
        وسائل مقترحة للعلاج
        بكرر الي قلته أول حلقة للتذكير:
        = الدورة أصلا للي مش قادرة تروح لطبيبة لأي سبب
        = الي بتروح لطبيبة وبتاخد دوا أو علاج سلوكي : متقطعيش ..استفيدي من الدورة
        = أزود على أول حلقة:
        أنا اختصرت في الي فات
        فالي عندها سؤال أو فيه شيء مش واضح أو ملتبس قوليه الله يكرمك
        أول خطوات العلاج :
        الإحتساب
        أنت متخيلة أن ده ابتلاء زي أي ابتلاء؟
        وأن أنت لك أجر!
        تخيلي
        أنت عارفة كويس حجم الألم الي أنت عايشة فيه ...جحيم !
        متخيلة لو احتسبتي ورجوت الأجر من صبرك واحتسابك وسعيتي للعلاج أنك كدة بتجمعي حسنات يمكن لو بتقيمي وتصومي مش هتجمعيها!
        أنا عاوزاك تقرأي كدة أحاديث الصبر وأجر أهل البلاء
        بس الله يكرمك متتمنيش البلاء بعدها
        والي مش مريض ميتمناش البلاء
        أنا عاوزاك تحتسبي
        يكون عندك الشعور الجميل ده الي بين العبد وربه أن ربنا كبير وأنه هو اللي خلقنا وأنه هو سبحانه إذا ابتلى العبد المؤمن فزيادة له في دينه وأجره
        عاوزاك تستحضري قول النبي:"حتى الشوكة يشاكها"
        يعني شكة الدبوس الي مش بناخد بالنا منها دي مأجورة عليها
        فما بالك بالألم الي أنت عايشة فيه؟
        احتسبي وابتهجي وأنت عيون قلبك على الآخرة
        أنت عارفة أن الشيطان بيحزنك وبيضايقك بأفكار غلط عشان يزود لك الاكتئاب والوسوسة ويخوفك ويقلقك
        احتسبي ولا تجعلي للشيطان وسوسته قيمة في نفسك
        يتبع بإذن الله
        رب اغفر وارحم وأنت خير الراحمين

        تعليق


        • #19
          رد: ♥ دورة علاج الوسوسة و الإكتئاب ♥ للأستاذة سارة محمد حسن ♥

          حلقة رقم 10

          تابع وسائل العلاج المقترحة

          2- تغيير نمط أكلك وحياتك
          رياضة خفيفة يوميا ..اتفقي مع أصحابك تتعاونوا على الموضوع ده
          متشقيش على نفسك وحاولي تلتزمي
          من فضلك مفيش عوائق زيحي أي عائق ..هم خمس عشر دقائق
          مش بتحبي تنزلي مارسي رياضة خفيفة في البيت ..إن شالله الرياضة بتاعت طوابير الصباح

          خليها من أولوياتك واكتبي أولوياتك دي واعملي صح ادامها لما تنجزيها ...بجد هيفرق معاك
          التمشية وسط خضرة أو على البحر يا أهل اسكندرية مفيدة جدا


          الأكل محتاجين أكل صحي بمعنى إيه
          مفيش حاجة اسمها ممنوع السمنة البلدي تماما إلا بقى لو طبيب ثقة قالك كدة لأن فيها فوايد مهمة
          زيت الزيتون مفيد
          السمك وخصوصا التونة مهم جدا خصوصا للوسواس
          الشعير اشربي منه واسألي العطار عن التلبينة أو عن طريقة عمل شايات الشعير
          الشعير مفيد جدا للإكتاب بجد مفيد
          بيض ولبن وفاكهة خصوصا تفاح
          أوصلي لحد المستشفى شوفي عندك أنميا ولا لا وعالجيها ...مش قادرة تروحي المستشفى؟؟ بصي على وشك في المرايا شاحب وشفايفك بيضا؟؟ يبقى كبدة وسبانخ وجرجير وأكلات فيها حديد
          ما هو نقص الحديد بيخليك تسرحي ومش مركزة وده أول باب وسوسة
          وزن حضرتك الصحي هو الوزن الي نفسيتك فيه بتكون مضبوطة ...أرجوك الريجيم مش عشان تبقي هيكل عظمي ويجيلك لين عظام


          الإختلاط بالناس
          الإختلاط الزيادة بالناس الي يخليك تفقدي شعورك بنفسك وتنسي رغباتك وتغرقي في الناس
          وعدم الإختلاط بالناس بحيث أنك تبقي معزولة تماما
          الوسط حلو
          أنت محتاجة ناس...بس ناس مريحة ...عيدي النظر في صداقاتك والي حواليك متختاريش أحسن الوحشين
          يا ستي كوني صداقات على الفيسبوك صداقات مريحة افضل ابحثي
          متحسيش بالذنب أنك بتغيري صديقاتك الي مش مريحين...عدم الشعور بالراحة مؤثر سلبي
          المرء على دين خليله ..والصاحب ساحب
          متصاحبيش حد بيعمل لك هرش نفسي
          حلو المصطلح ده
          حتى لو أنا مسببة لك هرش في نفسيتك ابعدي عني وادعيلي ياستي
          ابعدي عنهم وادعيلهم على الأقل فترة لحد ما تقفي على رجلك ...العلاقات السطحية مفيدة وخلي العلاقات العميقة تتكون صح مع ناس مريحة لك

          بصفة عامة خلي لنفسك مساحة مرونة لتغيير أي نمط متعب لك

          يا جماعة ده من ديننا والله
          كثير ابن القيم بيتكلم عن الحمية في الغذاء والعلاقات والأعمال
          وأن الواحد لازم يضبط نمط حياته
          لو تأملنا في الكلام ده هتلاقيه اصلا هو ألف باء أي علاج سلوكي

          يتبع بإذن الله



          رب اغفر وارحم وأنت خير الراحمين

          تعليق


          • #20
            رد: ♥ دورة علاج الوسوسة و الإكتئاب ♥ للأستاذة سارة محمد حسن ♥

            حلقة رقم 11

            استمتعي بحياتك
            شايفة صورة البروفايل بتاعي؟؟
            أيوة أهي هنزلها أول تعليق عشان تفضل مع البوست ده لو غيرت الصورة


            شايفة الراجل ده
            الواقع بتاعه شنيع جدا
            غيوم ...سمك قرش....مركب لا يسد ولا يغني أصلا


            ممكن يفضل قلقان وخايف ومرعوب ويقعد ياكل ضوافره
            فينقلب المركب بسبب القلق وحركة القلق
            أو يموت هو من القلق قبل ما يموت من القرش
            أو ينقلب لأن قدره ينقلب يكون عاشله لحظات عصيبة وبرضه مات


            الراجل ده نايم وبيستمتع بالي متاح عنده
            هدوءه ممكن يخلي المركب متوازن ..لحد ما حد ينقذه
            وحتى لو انقلبت المركب أهو عاشله حبة مبسوط وانبساطه وهدوءه هيخلوه على الأقل يفكر ياستي يسبح يستغفر في آخر عمره
            يدعي ..ويمكن ربنا ينقذه بدعائه


            كمان ممكن سمك القرش يزهق فيكمل تجديف ويوصل لبر الأمان
            التفكير المنطقي والاستمتاع بالمتاح أفضل بكثير من الغرق قبل الغرق والموت قبل الموت

            القلق والخوف والحزن ...مش هيغيروا الواقع
            القلق على ابنك مش هينقذه ...القلق من المستقبل مش هيغيره!
            الي هينقذ ابنك الدعاء والأسباب المشروعة
            والي هيغير مستقبلك اجتهادك مع استعانتك بالله
            إدارتك لطريقة تفكيرك مهمة جدا
            وأول خطوة لإدارة طريقة تفكيرك والحصول على الاسترخاء ...لا يا حاجة مش ممارسة اليوجا والعلاج بالطاقة
            في الحلقة الجاية ...بإذن الله


            التعديل الأخير تم بواسطة سلمى أم عمر; الساعة 27-01-2017, 03:27 AM.
            رب اغفر وارحم وأنت خير الراحمين

            تعليق


            • #21
              رد: ♥ دورة علاج الوسوسة و الإكتئاب ♥ للأستاذة سارة محمد حسن ♥

              حلقة رقم 12

              كيف أسترخي؟ كيف أدير حديث النفس


              1- الرقية

              مهم جدا جدا أنك ترقي نفسك بنفسك
              طالما أنت تعبانة
              حتى المرض العضوي ..الرقية من أسباب الشفاء وهي نوع من الدعاء
              أنا أقترح أنك ترقي نفسك يوميا بورد قرآن لا يقل عن جزء
              حطي يدك على رأسك وارقي نفسك
              وتدبري في الآيات الي بتقرأيها واستشعري الاستعانة بالله ورجاء رحمته
              بصي صعبة جدا الرقية في البداية هتتعبي
              ابدأي بيها يومك
              هتحسي بأنك مش قادرة خصوصا لو أنت مكتئبة
              هتحسي بتعب ويشتد الوسواس
              ابدأي بالمعوذات وقل هو الله أحد وسورة الفاتحة وآية الكرسي وخواتيم البقرة في يوم أكثر من مرة بحيث لما تبدأي الرقية بالجزء أو ما تصحي يبقى الموضوع أسهل بإذن الله

              أرجوك الخطوة الأولى الاحتساب...الثانية تغيير نمط الحياة ...الثالثة الرقية
              ده مش خطوات يعني أسبوع لا ...دي خطوات يعني في نفس اليوم أبدأ الثلاثة
              أمال الاستمتاع بالحياة دي تبع أيه؟
              لا دي لسة هنقول فيهها كلام كثير أنا بس نزلتها بمناسبة الصورة كفاصل إعلاني

              2- ذكر الله

              حركي لسانك بالذكر
              الذكر يا حبيبة قلبي بيساعدك تسيطي على الهاجس والخاطر
              الاستغفار والاستعاذة
              الصلاة على رسول الله بكميات ..واستحضري أنه يوم الجمعة تعرض صلاتنا عليه صلى الله عليه وسلم
              عندك وسواس قولي الله أكبر وكرريها كثير
              الاستغفار الكثير بيوقف الوسوسة
              التسبيح والتهليل
              عندك تسخط بيلح عليك ومضايقك ...كرري الحمد هيقف
              في البداية هيزيد ..وبعدين يخنس
              اتفلي على يسارك إذا اشتد واستعيذي بالله فقد ذهب بعض العلماء إلى جواز ذلك لجوازه في الصلاة
              الوسواس في اصطلاح الدورة دي هو أي خاطرة بتلح عليك ...القلق والخوف داخل فيها يعني...الغضب من موقف وقاعدة تفتكريه ودمك محروق ومش عارفة تطرديه داخل معانا برضه في اصطلاح الدورة
              يعني أي فكرة مش قادرة توقفيها هنعتبرها وسوسة وهنوقفها كدة عشان نسترخى


              3- ركعتين قيام والدعاء

              وياسلام لو بسورة البقرة أو بعضها
              وقبل النوم لو مش بتقدري تقومي بالليل
              وتدعي بالإلحاح ...كأنك غريق ملهوش حل غير أنه يدعي
              بلا يأس ولا استبطاء إجابة
              دعاء المفتقر المنكسر الي بيطرق باب الله وهو عارف أنه ربنا كريم وأنه ما منعك إلا ليعطيك ولا ابتلاك إلا ليعافيك ولا حرمك إلا ليمنحك



              4- فكري بطريقة منطقية ...تحاوري مع ناس بتفهم واستفيدي منهم أكثر ما تتكلمي

              اقرأي وثقفي نفسك بس اختاري كتب كويسة والشيخ أحمد سالم منزل قوائم ممتازة للقراءة والثقافة في كتاب السبل المرضية

              5- اقرأي المقال ده من فضلك هيفيدك كثير
              https://saaid.net/daeyat/sara/27.htm

              يتبع بإذن الله


              رب اغفر وارحم وأنت خير الراحمين

              تعليق


              • #22
                رد: ♥ دورة علاج الوسوسة و الإكتئاب ♥ للأستاذة سارة محمد حسن ♥

                حلقة 13

                أحسن شيء بنحتاجه مع الوسوسة :
                التجاهل
                لا مش بس تجاهل

                عبقرية التجاهل
                الأفكار بتنصرف زي البصر كدة

                المقاومة للفكرة والتفكير في رد عليها ده مش تجاهل
                ده عناية واهتمام بيزود الوسواس

                مثلا الي عندها وسواس جنسي وبيفضل يلح عليها صورة أو شعور أنها شاذة أو بتفكر في طفل
                وهي قاعدة تنفي عن نفسها التهمة وتكلم نفسها وتبكي أنا مش كدة
                وسواس الإلحاد وأفكار في ذات الله
                وأنت قاعدة تكلمي نفسك وتبكي وتقولي لا أنا مش كدة طب أنا كافرة؟؟ وأنت عارفة الردود على الشبهة وقرأتيها وأنت عارفة أنك مقتنعة أن الشبهة غلط وأن ده وسواس بيضايقك فقط

                أنت أصلا بتزودي الوسواس
                تخيلي لو حد ندل وجبان وبيقولك أنا هضربك
                تقومي أنت تقولي له لا بلاش تضربني وتبكي وتقولي أنا معملتش حاجة وتبكي

                وهو ندل وجبان
                فيفضل يستمتع بتعذيبك ويقولك هضربك هقطعك ويزيد في وصف طريقة الضرب
                أمال الندل ده نعمل معاه أيه؟؟

                تضحكي ..تبصي له من فوق لتحت...وتتجاهليه وتمشي وتسيبيه
                لا تقفي تكلميه ولا تتوسلي إليه يسكت ولا تاخدي وتدي معاه أصلا
                اهو ده عبقرية التجاهل

                حبيبتي
                الوسواس كلب
                والكلب لما يهوهو محدش يرد عليه...ولا يرمي عليه حجر فضلا عن مناقشته والكلام معاه
                ولا تقنعي نفسك أنك مش كدة ...أنت مقتنعة أنك مش كدة أصلا

                تجاهلي...طنشي....
                قومي اعملي حاجة مفيدة ...اتكلمي مع حد في أي حاجة ...فكري في شيء مبهج ...بدون توتر من فضلك بدون اضطراب...ببساطة بهدوء ..بثقة ..بابتسامة ...

                كمان أنت نفسك محتاجة تتعلمي شيء من الواقعية وعدم الإغراق في الخيال ...
                يتبع بإذن الله

                رب اغفر وارحم وأنت خير الراحمين

                تعليق


                • #23
                  رد: ♥ دورة علاج الوسوسة و الإكتئاب ♥ للأستاذة سارة محمد حسن ♥

                  الحلقة 14
                  شوية واقعية وبلاش إغراق في الصور الذهنية السلبية كثير
                  برضه ده تبع ابن القيم على فكرة
                  السرحان الكثير والإغراق في الخيال بحيث أن الواقع يتضرر غلط

                  الحل عشان منقعدش نكتب في كلام خيالي
                  لو حد انتقدك
                  لو أنت حاسة بتقصير مش عارفة فين الخلل فيه
                  ورقة وقلم واكتبي النقد وحلليه وشوفي تقدري تعملي إيه وإيه الي مش مهم وإيه اللي أولوياتك

                  نفس الكلام في الخلل
                  خلي اللي قدامك يعمل كدة

                  يعني لو كتبتي أنت عاوزة إيه من زوجك وهو بيعمل فعليا إيه وهو عمل كدة ...90 في المية من المشاكل هتتحل بإذن الله
                  كذلك إغراقك في التفكير وسوء الظن أو حتى الظنون الوحشة وبس
                  الأفكار الافتراضية
                  استرسالك في أيه الي هيحصل وهتعملي أيه لما مرات أخو بنت عمة أبوك تقابلك
                  كل الغرق ده عبارة عن (بمصطلح الدورة) وسواس

                  هيدي للقلق والمخاوف وممكن يعمل لك وسواس قهري باستمراريته وممكن يسبب لك اكتئاب
                  برضه حله أنك تسيطري عليه بالاقتراحات السابقة لإدارة حديث النفس
                  كمان لما يلح عليك خاطر كويس
                  ورقة وقلم واكتبيه خلي كراستك في جيبك
                  أي فكرة حلوة أي خاطرة طيبة أي اقتراحات بتلح وبتضياقك من الالحاح بس هي جلوة وأنت خايفة تطير
                  اكتبي

                  يتبع بإذن الله
                  رب اغفر وارحم وأنت خير الراحمين

                  تعليق


                  • #24
                    رد: ♥ دورة علاج الوسوسة و الإكتئاب ♥ للأستاذة سارة محمد حسن ♥

                    حلقة 15

                    خلينا نتكلم شوية عن الاستمتاع بالواقع .. !
                    من درر وفوائد كتبت يوما


                    ألا ترى عيناك جمال غيم السماء كما صفوها؟
                    وبديع برد السحاب كما حرها؟
                    ألا تستو لديك زرقة السماء كما ليلها؟
                    ولا يعكر صفو الزهور ألم أشواكها
                    ألا تعشق حبات الرمال في الفيافي كما واحاتها؟
                    ويتنسم قلبك جمال الجبال كما البحار وأمواجها؟


                    وفي كل شيء في الكون لله آيات يرى المتأمل رونقها وبديع صنعه

                    الإستمتاع بالواقع يحتاج إلى

                    1- تغيير ما يمكن تغييره
                    فكري وابتكري ! وغيري الي مكدرك طالما تقدري تغيريه


                    2- ليس معنى الإستمتاع أني أغرق نفسي في مباح بحيث أضر نفسي ...ولا معناه أني أرتكب محرم وأستمتع بيه
                    لكن معناه أني أستغل المتاح وأغير الي ينفع يتغير وأجتهد في التغيير واكتساب المهارات وإفادة الناس وتبديل الأنماط لحد ما أوصل لوضع مريح ممتع وأقدر من خلاله أستمتع بمجاهدة الباقي


                    3- استمتعي بالأشياء الصغيرة البسيطة ...استمتعي بالعاديات الي محدش بيستمتع بيها عادة لأنها متكررة..استمتعي بالنفس الي بتاخديه ...استمتعي بقدرتك على الإبتسام وقدرتك على الغضب .....وتأملي نعمة الله عليك فيها
                    واحمدي الله عليها و*اشعر بالامتنان أن الله وهبك


                    4- حتى لو كنا من أهل البلاء في جزئية معينة ..فاحمدي الله على العافية في الجزئيات الأخرى...احمدي الله على أنك قادرة تحمدي وتتأملي وغيرك حرم النعمة دي وقاعد يتسخط

                    5- تأملي في قدرة الله عز وجل واستممتعي
                    ورقة الشجر...النملة الي بتجاهد عشان تشيل حبة قمح وتطلع بيها وتقع منها وتكرر النزول والحمل والصعود
                    تأملي في السما...جمالها وقت الغيم ووقت الصفا
                    تأملي تأمل وفكر صحيح مستحضرة ربوبية الله عز وجل...دي عبادة


                    6- استمتعي بالنافع من الأعمال مهما كانت شاقة عليك
                    واحتسبيها ...شغل بيتك ...تعبك مع عيالك
                    الاستمتاع بيقلل الضغط ...الضغط بيزود الاكتئاب والوسوسة
                    حاولي في البداية تختاري أعمال تقدري تستمتعي بيها ...وحاولي أنك تستمتعي بالمتاح الي مضطرة تعمليه ...خلي الاستمتاع عادة عندك


                    7- استمتعي بالعبادات ...الصلاة حاولي تستمتعي بيها بتدبر الي بتقوليه وبالخشوع واستحضار حب الله عز وجل...اقرأي مقال صفاء الانبجانية للشيخ السكران جميل جميل
                    الصدقات ...أنك ترسمي بسمة على وجه شخص تعيس ...
                    استمتعي بصبرك على الوسواس والاكتئاب استمتعي باحتسابك لعصرة الألم ....استمتعي بقوتك وأنت بتتجاهليه مستعينة بالله
                    استمتعي بمناجاتك الحارة بالدعاء


                    استمتعي
                    برضه ده من ابن القيم
                    وأنا بكرر التنبيه
                    توظيف كلام ابن القيم بالشكل ده هو الي بعمله في الدورة دي
                    هو نوع من الربط مش بقول أن ابن القيم كان بيقول الي أنا بقوله بنصه
                    واصراري على تكرار أن ده من كتب ابن القيم هو نوع من العرفان

                    يتبع بإذن الله


                    https://soundcloud.com/sno-white-8/5mpxsfbnvmnh
                    رب اغفر وارحم وأنت خير الراحمين

                    تعليق


                    • #25
                      رد: ♥ دورة علاج الوسوسة و الإكتئاب ♥ للأستاذة سارة محمد حسن ♥

                      حلقة 16
                      تنبيهات مهمة لمريض الوسوسة
                      شعورك بعدم القدرة على التفريق هل هذا منك أم هو وسواس هو شعور وهمي أصلا داخل في الوسواس
                      أنت تفرقين والدليل ببساطة : حزنك من هذه الوسوسة
                      حزنك وتعبك دليل رفضك وردك واعتراضك
                      حتى في برودك تجاه الوسوسة وشعورك بالتبلد هذا يعتبر انعكاس لرفضك وبلوغك من الرفض حدا كبيرا جدا كذلك
                      كل منكم يوقن أن هذا الوسواس ليس منه وأنه غير مقبول عنده وأن ده مش أنا ... وعندكم دلائل ..فقط انتن توسوسن هل هذا منكن أو ليس منكن هل هذه الدلائل كافية أم لا ...أنا أقول لك : كافية وشرعا هي كافية جدا ....اجزمي أنه ليس منك وأنك ترفضينه ثم تجاهليه ..ينتهي الأمر بإذن الله.
                      عندما يشتد الوسواس ويعتصر قلبك مرارة عدم التفريق
                      أنصحك بهذا الدعاء :
                      أعوذ بكلمات الله التامات التي لا يجاوزهن بر ولا فاجر من شر ما خلق وذرأ وبرأ، ومن شر ما ينزل من السماء، ومن شر ما يعرج فيها، ومن شر ما ذرأ في الأرض، ومن شر ما يخرج منها، ومن شر فتن الليل والنهار، ومن شر كل طارق إلا طارقا يطرق بخير يا رحمن
                      والرقية
                      وسورة البقرة
                      والتكبير
                      واتحركي من مكانك وقومي اتوضي

                      واشتكي لربك وناجيه وأخرجي ما عندك ولو في غير صلاة وقولي يارب أنا مش كدة ومش عاوزة أكون كدة
                      أختي: أنت فعلا مش كدة

                      الطلعات الأولى صعبة بس ممكن إلا إذا كان معاك مع الوسواس اكتئاب
                      تابعي الحلقة الجاية

                      رب اغفر وارحم وأنت خير الراحمين

                      تعليق


                      • #26
                        رد: ♥ دورة علاج الوسوسة و الإكتئاب ♥ للأستاذة سارة محمد حسن ♥

                        جزاك الله خيرا

                        تعليق


                        • #27
                          رد: ♥ دورة علاج الوسوسة و الإكتئاب ♥ للأستاذة سارة محمد حسن ♥

                          جزانا وإياك يا رقية
                          رب اغفر وارحم وأنت خير الراحمين

                          تعليق


                          • #28
                            رد: ♥ دورة علاج الوسوسة و الإكتئاب ♥ للأستاذة سارة محمد حسن ♥

                            حلقة 17

                            تنبيهات لمريض الاكتئاب
                            أنا عارفة كويس جدا يمكن أكثر مما تتخيلي أن في وقت الاكتئاب الخفيف والمتوسط أنك بتكوني عاجزة عن الحركة في اتجاه إيجابي ..فضلا عن حالات الاكتئاب الحاد يعني
                            وأوعي تفتكري أني بتكلم وأنا قعدة في التكييف ...في زمن زي زماننا محدش مش بيصاب باكتئاب ومش بيمر بحالة ولو لفترة مؤقتة...أنت بس مش متخيلة أني أشد ألما منك عشان أنت غرقانة في عرق اكتئابك

                            اتركي نفسك بهدوء...كأنك في حمام سباحة ...هتلاقي جسمك بيطفو على الماء افردي ذراعيك ..استرخي ..تأملي السماء وابدأي حركي رأسك وشوفي الدنيا صح حبيبتي

                            ابدأي بعمل قلبك : الاحتساب
                            وأنت غرقانة كدة في الاكتئاب احتسبي التعب ده ..دي لحظة الاسترخاء المطلوبة عشان نعمل عملية الطفو

                            إن شاء الله هتكوني بخير وربنا مش هيضيعك
                            عمل قلبك الثاني المطلوب :
                            رجاء رحمة الله والأجر

                            ثالث عمل قلب : رغبتك في الخروج من الي أنت فيه
                            أنت بتكوني في حالة استمتاع بتعذيب نفسك ....أنت مبسوطة وأنت كدة
                            لحظة فارقة : أنا معنديش مشكلة أعيش لي يومين مسترخية بمزاجي وهادية ...لكن مش هسمح لنفسي تغرق وتقتلني والشيطان بيتفرج ومبسوط ...
                            بطلي تأنيب...استرخي ...احتسبي ....رجاء رحمة الله


                            ابدأي بالاستغفار أو الحمد أو أي ذكر حبيب لقلبك مع معرفة أجره
                            وصلي ركعتين قيام خفيف جدا قبل ما تنامي بعشر آيات فقط وأنت قاعدة ...مستحضرة الأجر
                            في الصباح قولي الذكر الي هو : سبحان الله وبحمده عدد خلقه ورضا نفسه وزنة عرشه ومداد كلماته 3 مرات
                            وعاوزاك تبتهجي جدا وأنت بتستحضري الأجر الكبير أوي فيه


                            لاحظي أنت نفسك بتقاوم أصلا أنك تخرجي من الحالة دي ...لازم شوية إرادة مستعينة بالله عشان كدة قلنا نبدأ بأعمال القلب وأي ذكر خفيف
                            شراب الشعير بكميات هيفرق معاك حقيقي جدا
                            جلسة في حديقة هتفرق معاك ...صديقة وفية تجبرك تروحي حديقة وتخليك تتمشي شوية معاها بعد ما تجلسي في الخضرة شوية

                            مش قادرة تنزلي ...شغلي فيديو للبحر وصوت البحر أو العصافير أو أي شيء مبهج من الطبيعة الي ربنا خلقها واتفرجي على صور من جوجل فيها شجر وخضرة ...تأملي وسبحي

                            يتبع بإذن الله
                            رب اغفر وارحم وأنت خير الراحمين

                            تعليق


                            • #29
                              رد: ♥ دورة علاج الوسوسة و الإكتئاب ♥ للأستاذة سارة محمد حسن ♥

                              حلقة 18

                              تصحيح المفاهيم

                              محتاجين نصحح مفاهيمنا : الشرعية من فقه طهارة وأعمال قلوب والأخلاق
                              محتاجين نصحح مفاهيمنا عن الشهوة

                              لما تتعلمي فقه الطهارة صح وتعرفي أن الي بتعمليه زيادة عن كدة غلط وأن من الفقه تجاهل وسوستك
                              لما تسألي شيخا ثقة عن الحكم ويقولك ويجزم لك أن التجاهل هو الصواب وأنك مأجورة
                              وأن وسوستك أنك كافرة وملحدة وو ده أي كلام وطنشي
                              كلمة طنشي وتجاهلي بلسم ...برد على قلبك
                              اسمعيها من ثقة واسألي شيخا ثقة واسمعيها منه واستمتعي بيها جدا ..سجليها أو خدي سكرين شوت وكل ما تتعبي اقرأي الكلمة واستمتعي ونفذي التجاهل زي ما شرحتهولك في عبقرية التجاهل


                              أعمال القلوب
                              انصحك بكتيبات الشيخ محمد صالح المنجد أو مجموعة الأشرطة بعنوان أعمال القلوب له
                              الحكاية أننا معندناش فقه كبير بمعاني أعمال القلوب زي الصبر والاحتساب والرضا والرجاء والخشية
                              عندنا لبس فيها اللبس ده بيؤثر سلبا في نفسيتنا

                              هنفهم أن الصبر مش معناه ترك الأسباب ولا معنى الرضا أننا نرضى بالغلط
                              هنفهم أن الرجاء ده من أهم أعمال القلوب وأن حب الله ده شعور صحي وجميل جدا
                              هنفهم أن الخشية عمل وفيها حياء جميل مش جلد ذات واستمتاع بتحطيم النفس
                              هنفهم أن السماحة والتسامح والعفو مش معناه أنك تيجي على نفسك وتحطميها
                              وهنفهم أن ديننا مش زي النصارى الي يضرب اديله خدك التاني ...هتفهمي أن لك حقوق كثير ولك حقوق في ردود أفعال مشروعة لك وده هيهدي أعصابك جدا وهيعينك


                              كمان هنفهم يعني أيه كبر وإعجاب بالنفس ويعني إيه تواضع ويعني أيه رفق..هم مش في المجموعة دي بس لازم نتعلمهم وأنصح بمجموعة شرح مدارج السالكين للشيخ وليد المنيسي
                              فيه منظومة اسمها الكبر والتواضع للشيخ كمال مشروحة على يوتيوب


                              الكلام ده لما هتتعلميه صح هيقل التحسس المرضي وهيقلل تأنيبك لنفسك وشعورك بالضياع لما تتصرفي صح ويبدأ وسوسة أنك غلطتي وأنت واثقة أن أي تصرف تاني كان مينفعش وظلم لك ومش عارفة توقفي الوسوسة مثلا
                              هيساعدك مقابل التأنيب المرضي لنفسك أو من غيرك الي بيحطم أعصابك وأنت أحوج ما يكون للهدوء
                              وهتفهمي أن الصح كذا وتحاولي تعمليه


                              يتبع بإذن الله
                              رب اغفر وارحم وأنت خير الراحمين

                              تعليق


                              • #30
                                رد: ♥ دورة علاج الوسوسة و الإكتئاب ♥ للأستاذة سارة محمد حسن ♥

                                حلقة 19
                                تنبيهات لمريض الخوف والقلق المرضي
                                مشكلة الي عنده القلق ده انه متخيل انه قلقه هو الي مانع المصايب تحصل ..
                                انت تخيلك ده مش مستحضراه يعني بدليل اني لو سالتك القلق ده منع الشر؟ هتردي بتلقائية لا
                                لكن فيه شعور داخلي جوة اوي انه لو بطل قلق هتحصل مصيبة

                                براحة كدة ركزي
                                جالك الخاطر ده ادعي بالخيرات والعافية من كل الي انت خايفة منه ..وكل ما يجي الخاطر ادعي..وقولي لنفسك ربنا الحافظ وقلقي وخوفي مش بيمنع حاجة...ربنا لا تحملنا ما لا طاقة لنا به وامنحنا ولا تمتحنا...
                                وعليك وعلى الرقية والاذكار والقران وتفسيره ولو قليل كل يوم...كل ما تتعرفي على صفات ربنا كل ما يهدى قلبك ويفوض امره لله ويوقن ان ربنا حكيم ورحيم ..ما يفعل الله بعذابكم ان شكرتم وامنتم؟
                                وظبطي اكلك خصوصا لو انت حامل او بترضعي لازم تتاكدي من انك بتاخدي غذا متوازن مليان كالسيوم حديد بوتاسيوم..الخ
                                يتبع
                                رب اغفر وارحم وأنت خير الراحمين

                                تعليق

                                يعمل...
                                X