إعـــــــلان

تقليص
لا يوجد إعلان حتى الآن.

!~φ وداعًا للإلحاد φ~! // مفهرس

تقليص
X
 
  • تصفية - فلترة
  • الوقت
  • عرض
إلغاء تحديد الكل
مشاركات جديدة

  • !~φ وداعًا للإلحاد φ~! // مفهرس


    وداعًا للإلحاد
    تفريغ الحلقة السادسة_ أدركوا اللحظة الفارقة
    لــ د/ حازم شومان



    شبابنا الجميل،أدرِكوا اللحظة الفارقة.
    إحنا دلوقتي يا جماعة في سادس ليلة من الليالي العشر اللي الله عز وجل أقسم بيها في القرآن.
    يا ترى وصلنا مع ذِكر الله عز وجل لفين ؟
    يا ترى وصلنا في حياة قلوبنا مع جنة الذِكر لحد فين يا جماعة ؟

    يعني سبحان الله العظيم كتير قوي من المُلحِدين لما تيجي تتكلم معاهم تلاقيهم دايمًا شايفين إن الحياة قاسية جدًا،وإن أمور الحياة قاسية وإن الأقدار قاسية جدًا،وتلاقي الكلام دا في الشِعر بتاع جيفارا وفي أشعار وفي كلمات ناس كتير جدًا من المُلحِدين،هي الحياة مش قاسية ولا حاجة وأقدار ربنا مش قاسية ولا حاجة ولكن الإنسان لما بيُعرِض عن ذِكر الله عز وجل،الله بيسلب منه أربع حاجات،لما بيُسلَبوا من الإنسان بتبقى الحياة سوداء لا تُطاق.
    إيه الأربع حاجات اللي بيُسلَبوا من الإنسان لما بيُعرِض عن ذِكر الله عز وجل ؟
    رقم واحد السَكِينة ::
    الدنيا معدش بيبقى فيها سَكِينة بقى كلها قلق وتوتر ونوبات هلع وفزع واكتئاب واأمراض نفسية.
    الحاجة التانية البركة ::
    بيبقى الحياة فيها رِزق ولكن مفيش فيها بركة،مفيش بركة في الوقت،مفيش بركة في الشهادات،مفيش بركة في الجواز،مفيش بركة في الذرية.
    الحاجة التالتة اللي بتُسلَب من الإنسان لما بيُعرِض عن ذِكر الله عز وجل التيسير ::

    "يُرِيدُ اللهُ بِكُمُ اليُسْرَ" البقرة،185.
    َ
    ولكن الإنسان مُصَمِم علي العُسر،بتبقى الحياة صعبة،الجنيه بيجي بطلوع الروح،حتى التوبة بتبقى صعبة،حتى الشاب اللي عايز يتوب من عادة سرية بتبقى صعبة،ليه ؟
    لأنهم أعرضوا عن ذِكر الله عز وجل.

    الحاجة الرابعة اللي بتُسلَب التوفيق ::
    الناس بتتعب جدًا لكن في النهاية مبتحققش هدفها،يفضل الناس تِطِحِن في الدنيا،ويجي آخر عُمره يلاقي نفسه موصلش للي هو عايزه،مفيش توفيق.
    فالأربع حاجات دول لما بيُسْلَبوا من حياة الناس بتبقى حياة الناس لا تُطاق.

    طب تعالوا بقى يا جماعة شوفوا ذِكر الله عز وجل
    إزاي بيعالج الإلحاد ؟ إزاي بيعالج الشبهات ؟ إزاي بيعالج الوساوس ؟
    قال رسول الله صلي الله عليه
    وسلم ::لا يقعد قوم بيذكروا الله تعالى إلا ::
    واحد "حفتهم الملائكة" ::
    علشان مفيش شيطان يقدر يدخل ليهم يقدر
    يفسد عليهم سعادتم بالذِكر.
    اتنين "وغشيتهم الرحمة" ::
    يرجعوا تاني زي الجنين اللي كان الرَحِم بيغْشَاه يبقوا محاطين برحمة ربنا عز وجل،كل دا لما بيذكروا الله عز وجل.
    تلاتة "ونزلت عليهم السَكِينة" ::
    السَكِينة تملى قلوبهم بالأماني.

    ومن جوه عندهم سكون مفيش قلق،مفيش فزع،مفيش توتر،مفيش ميعرفش ينام إلا لما ياخد مُهدئ،مفيش ميعرفش يصحى إلا لما ياخد دوا اكتئاب.
    أربعة "وذكرهم الله في من عنده " ::

    نص الحديث ::
    عن أبي هريرة عن النبي صلى الله عليه وسلم قال "ما اجتمع قوم في بيت من بيوت الله تعالى يتلون كتاب الله ويتدارسونه بينهم إلا نزلت عليهم السكينة وغشيتهم الرحمة وحفتهم الملائكة وذكرهم الله فيمن عنده"
    سُنن أبي داود رحمه الله.

    إيه يا إخوانا دا يعني حل الإلحاد والشبهات والشكوك،حل إن السَكِينة ترجع تاني والبركة والتيسير والتوفيق هو ذِكر الله سبحان وتعالى،ما اجتمع شباب في عربية بنتري أو كريزلار أو أي حاجة يسمعون شريط أجنبي أو قدام موقع إباحي إلا حفتهم الشياطين وغمرتهم الكآبة ونزل عليهم الاكتئاب والتوتر،دا سُنة من سُنن ربنا يا جماعة،قد إيه الذِكر بيحفظك في حياتك،قد إيه الذِكر حبيب قلبي ربنا يحفظك بيه من الشياطين والوساوس والاكتئاب،انتَ عارف لما بتقول ذِكر الخروج من المنزل كان مستنيك اتنين شياطين عشان يبنجوك،ربنا عز وجل نجاك منهم بسبب الذِكر،عارف وانتَ داخل بيتك على زوجتك وأولادك،عارف لما بتذكُر ربنا عز وجل وانت داخل،كان فيه شِلة شياطين مستنياك،عازمة نفسها في البيت عندك غصب عنك،انتَ نَجِيت نفسك منهم بإنك ذَكرت الله عز وجل وانتَ داخل البيت،عارف لما بتيجي تنام ،وتذكر الله عز وجل،كان فيه شيطان مستنيك عند راسك،علشان يوترك متعرفش تنام،علشان يجبلك أرق ،علشان ينيمك متصحاش الفجر،عارف لما بتذكر الله عز وجل عند الجِماع ،كان فيه شيطان هيشاركك في ذُريتك،يعني فيه عَدو مستنيك أربعة وعشرين ساعة،لن تنجوا منه إلا بذِكر الله عز وجل.

    هو إيه اللي نجى موسى عليه السلام من فرعون غير ذِكر الله عز وجل ؟!
    "وَلَا تَنِيَا فِي ذِكْرِي" طه،42.
    ،هو إيه اللي نجى يونس عليه السلام من بطن الحوت غير ذِكر الله عز وجل ؟!
    "فَلَولَا أَنَّهُ كَانَ مِنَ المُسَبِّحِينَ" الصافات،143.
    سيدنا يَحيى عليه السلام بيقول لقومه بيقولهم"مثل الذاكر ربه كمثل رجل طلبه العدو سِراعًا في أثره"،يعني أنا لما بقرأ الحديث دا يا جماعة بحس إن فيه واحد بيجري زي المجنون ورا واحد"سِراعًا في أثره"،الشيطان هيتجنن وراكي عايز يضيعِك،"فتحصنَ في حصن حصينًا وليس أحصن من الشيطان من ذِكر الله عز وجل" حديث صحيح عن النبي عليه الصلاة والسلام.
    نص الحديث ::
    أخرج الترمذي والنسائي وصححه الحاكم عن الحارث بن الحارث الأشعري
    حديث طويل وفيه فآمركم أن تذكروا الله وإن مثل ذلك كمثل رجل خرج العدو في إثره سراعا حتى إذا أتى على حصن حصين أحرز نفسه منهم فكذلك العبد لا يحرز نفسه من الشيطان إلا بذكر الله تعالى.

    طب التوصية بتاعتنا إيه المرة دي ؟
    إحنا بنتكلم عن الوقاية من الإلحاد والشبهات والوساوس.
    أذكار الصباح والمساء ::
    الكنز اللي ناس كتير مش واخدة بالها منه،يا جماعة أنا عاملكوا ورقة بفضل ومنة الله عاملينها لكم هتنزل مع الحلقة على طول ورقة مقَسمة أذكار الصباح والمساء لخمس مجموعات،علشان تُدركي خطورة أذكار الصباح والمساء،الجرعة اللي لازم تاخديها مرة بعد الفجر ومرة بعد العصر مدي الحياة.
    واحد ::
    أذكار ضد السِحر والحسد والشياطين اللي مبهدلة الناس،زي إيه ؟ زي قل هو الله أحد والمعوذتين ثلاث مرات.
    النوع التاني من أذكار الصباح والمساء،مقسمينهالكوا علشان تعرفوا خطورة إنها مفاتيح للنجاة.
    اتنين ::
    أذكار تتعلق بالنحاح في الحياة،مفاتيح للنجاح في الحياة عشان ربنا يفتحها في وشك من أول اليوم زي إيه كدا ؟ زي سيد الاستغفار،الاستغفار علشان ربنا يشيل الذنوب اللي مانعة الفتح ،زي يا حي يا قيوم برحمتك أستغيث أصلِح لي شأني كله ولا تكلني إلى نفسي طرفة عين.
    تلاتة ::
    أذكار تتعلق بالتأمين على المستقبل والتأمين على الصِحة والرِزق،الصحة والرزق ؟ تخيل مرتين بتأمن علي صحتك ورزقك زي دعاء اللهمَّ إني أسالُك العافية في الدنيا والآخرة،اللهمَّ إني أسالُك العفو والعافية في ديني ودُنياي وأهلي ومالي،اللهمَّ استر عوراتي وآمن روعاتي،اللهمَّ احفظني من بين يدي ومن خلفي وعن يميني وعن شمالي ومن فوقي وأعوذ بعظمتك أن أُغتال من تحتي.
    أربعة ::
    أذكار تتعلق بإنك تبدأ يومك بصفقة كبيرة وحسنات كبيرة مع الله سبحانه وتعالى.
    زي إيه يا جماعة ؟
    زي الذِكر بتاع "سبحان الله وبحمده عدد خلقه ورِضا نفسه وزنِة عرشه ومداد كلماته"،بناخد كمية حسنات جبارة على الذِكر دا من أول اليوم.
    المجموعة الخامسة ::
    أذكار تتعلق بتجديد العهد مع الله عز وجل،وتجديد الفِطرة في القلب وإحياء معاني الإيمان اللي من غيرها متقدريش تقاومي رياح الحياة العاصفة وابتلائتها.
    زي إيه ؟
    "رضيتُ بالله ربًا وبالإسلام دينًا وبمحمدٍ صلى الله عليه وسلم نبيًا ورسولًا".
    زي إيه ؟
    زي "اللهمَّ بكَ نحيا وبك نموت،اللهمَّ بكَ نحيا وبك نموت وإليك النشور".
    زي إيه ؟
    زي "اللهمَّ ما أصبح بي من نعمةٍ أو بأحدٍ من خلقك فمنكَ وحدك لا شريك لك فلكَ الحمد ولكَ الشكر".

    تخيلوا بقى
    الخمس كنوز دول رسول الله عليه الصلاة والسلام بيحط قدامك كل يوم الفجر خمس صناديق كنوز خمس صناديق مجوهرات وانتَ بترفضهم ،وانتي بترفضيهم!
    نَقِي ذِكر واحد من كل مجموعة،يعني أنا بقولكم الحاجة اللي أنا بحاول أعملها حتى على نفسي، نَقِي ذكر واحد من كل مجموعة خليه دستور في حياتِك،إن شاء الله بإذن الله الورقة الخطيرة بتاعة تقسيم أذكار الصباح والمساء هتنزلكوا بعد الحلقة على طول علي الصفحة علشان تصوروها وتوزعوها وتطبقوها وتنشروها،علشان نبقى جنود لنشر ذِكر الله عز وجل في الأرض.

    حبايب قلبنا في الله،شبابنا الجميل،حبيب قلبنا الغالي أدْرِك اللحظة الفارقة،أدرِكوا اللحظة الفارقة،إحنا في أخطر عشر أيام في السنة،عشر أيام مفيش بعدهم موسم غير بعد عشر شهور،يعني انتِ بتشحني قلبِك بذِكر الله عز وجل لعشر شهور مستمرة،لحد ما يجي رمضان،يعني العشر أيام دول عايزين نركز في ذِكر ربنا عز وجل فيهم قبل ما يروحوا من إيدينا ونلاقي نفسنا خرجنا من غير ما نتشحن لمواجهة الحياة بذِكر الله عز وجل.

    أَدرِكوا اللحظة الفارقة.
    جزاكم الله خيرًا.



    تفريغ الحلقة الخامسة
    ..ღ وَلَا تَنِيَا فِي ذِكْرِي ღ..

    لسماع السلسلة وتحميلها من
    هنــا






    التعديل الأخير تم بواسطة *أمة الرحيم*; الساعة 23-09-2016, 11:26 PM. سبب آخر: فك تشابك كلمة


    رحمــــةُ الله عليـــكِ أمـــي الغاليــــــــــــة

    اللهــم أعني علي حُسن بِــــر أبــي


    ومَا عِندَ اللهِ خيرٌ وأَبقَىَ.

  • #2
    رد: !~φ وداعًا للإلحاد φ~!

    وعليكم السلام ورحمة الله وبركاته
    جزاكم الله خيرًا أختنا، وتقبل منكم مجهودكم المتواصل




    "‏لو تأمَّلتَ حالَ مَن سَبق في حَذرِهم من فضول كل أمر: فضولِ النظر، فضول الكلام،... تجلَّت لك أهميَّةُ اصطفاء الواردات، لأنّها حتما إن نُقِّحت فَصفت حَسُنت لك الصادرات.
    وما تفاوت الأقوامُ في إصدارهم=
    إلا بمبدوء النظر في الإيراد."
    ___
    "ومُغَالِبُ العقباتِ حتمًا غالبٌ
    إلَّا إذا اطَّرحَ الثَباتَ وأقصرا".
    Caption

    تعليق


    • #3
      رد: !~φ وداعًا للإلحاد φ~!

      المشاركة الأصلية بواسطة *السائرة إلى الله* مشاهدة المشاركة
      وعليكم السلام ورحمة الله وبركاته
      جزاكم الله خيرًا أختنا، وتقبل منكم مجهودكم المتواصل
      وجزاكِ خيرًا مثله،بارك الله فيكِ.


      رحمــــةُ الله عليـــكِ أمـــي الغاليــــــــــــة

      اللهــم أعني علي حُسن بِــــر أبــي


      ومَا عِندَ اللهِ خيرٌ وأَبقَىَ.

      تعليق


      • #4
        رد: !~φ وداعًا للإلحاد φ~!

        جزاكم الله خيرًا وأحسن الله إليكم

        تعليق

        يعمل...
        X