Tweet
السلام عليكم ورحمة الله وبركاته
يسر فريق التفريغ بشبكة الطريق إلى الله أن يقدم لكم
تفريغ الحلقة الأولى من برنامج: كأنك تراه
للدكتور/حازم شومان
عنوان الحلقة: مَّا نَفِدَتْ كَلِمَاتُ اللَّهِ
لتحميل التفريغ PDF من هنـــــا
للاستماع للحلقة بجودات مختلفة من هنـــــا
وإليكم نص التفريغ:
بسم الله، والصلاة والسلام على رسول اللهيسر فريق التفريغ بشبكة الطريق إلى الله أن يقدم لكم
تفريغ الحلقة الأولى من برنامج: كأنك تراه
للدكتور/حازم شومان عنوان الحلقة: مَّا نَفِدَتْ كَلِمَاتُ اللَّهِ
لتحميل التفريغ PDF من هنـــــا للاستماع للحلقة بجودات مختلفة من هنـــــا
وإليكم نص التفريغ:رباه ها أنا ذا خلصت من الهوى واستقبل القلب الخلي هداك
ونسيت حبي واعتزلت أحبتي ونسيت نفسي خوف أن أنساك
يقول العلماء -علماء الطبيعة يا جماعة- إن عدد المعلومات الموجودة على جيناتك وعلى الجينات بتاعتِك لو اتكتبت تاخد ألف مجلد كل مجلد خمسمائة صفحة، لو اتحملت على فلاشة هنحتاج فلاشة أربعة جيجا بس مش فلاشة واحدة بس ألف مليون فلاشة علشان المعلومات اللي على جيناتك، يا جماعة كل دي الجينات دي ربنا خلقها بكلمة واحدة، بكلمة واحدة من كلمات القدرة بكلمة كُنْ "مَّا نَفِدَتْ كَلِمَاتُ اللَّهِ" لقمان:27.
تعالوا نعيش مع جنة قَوْل الله: "مَّا نَفِدَتْ كَلِمَاتُ اللَّهِ".
جنة قَوْل الله: "مَّا نَفِدَتْ كَلِمَاتُ اللَّهِ""مَّا نَفِدَتْ كَلِمَاتُ اللَّهِ" آية تذهل قلبك، آية تزلزل قلبِك، "وَلَوْ أَنَّمَا فِي الْأَرْضِ مِن شَجَرَةٍ أَقْلَامٌ وَالْبَحْرُ يَمُدُّهُ مِن بَعْدِهِ سَبْعَةُ أَبْحُرٍ مَّا نَفِدَتْ كَلِمَاتُ اللَّهِ" لقمان:27، ربنا بيقولَّك تخيل، بيقولِّك تخيلي لو جبنا ملايين العمال قطعوا كل أشجار الكرة الأرضية، حتى أشجار غابات الأمازون اللي العلماء بيقولوا لا يستطيع مخلوق إنه يعدَّها، وجبنا ملايين العلماء حولوها لأقلام، وجبنا ملايين العِمالة وحولت البحار بتاعت الكرة الأرضية لحبر، وجبنا ملايين العمال وعبُّوا الحبر في الأقلام..
وجبنا ملايين العمال وقعدوا يكتبوا عطاءات ربنا اللي خرجت من خزائن ربنا هيخلص الحبر ومش هتخلص العطاءات، وقعدوا يكتبوا وسائل الله لإمتاع المؤمنين في الجنة هيخلص الحبر ومش هتخلص وسائل الله في الجنة، وقعدوا يكتبوا معاني القرآن هيخلص الحبر ومش هتخلص معاني القرآن، وقعدوا يكتبوا آيات ومعجزات ربنا في خلق الإنسان وفي خلق الكون هيخلص الحبر ومش هتخلص الآيات، هيخلص الحبر ومش هتخلص النِّعَم..
هيخلص الحبر "مَّا نَفِدَتْ كَلِمَاتُ اللَّهِ" ما نفدت فتوحات الله، مانفدت عطاءات الله، مانفدت وسائل ربنا لحل مشاكل حياتِك، مانفدت وسائل ربنا لإسعادك في الدنيا والآخرة، مانفدت عطاءات خزائن الله، مانفدت شواهد أسماء الله في الكون، معاني القرآن، آيات ربنا، نِعَم ربنا، عِلم ربنا..
"مَّا نَفِدَتْ كَلِمَاتُ اللَّهِ" آية بتبهرك بحاجتين:
بتبهرك بقدرة الله التي لا حدود لها.
رقم اتنين: تبهرِك بمدى وسائل الله لحل مشاكلِك، ولتفريج كربِك، ولإنه يعَيِّشك سعيدة.
ما نفدت كلمات القدرة "مَّا نَفِدَتْ كَلِمَاتُ اللَّهِ" يا جماعة، كلمات القدرة، بكلمة "كُنْ" ربنا خلق الجنة وخلَّاها نعيم، بكلمة كُنْ، و"كُنْ" دي كلمة واحدة من كلمات الله، بكلمة كُنْ ربنا خلق النار وخلاها عذاب، بكلمة كُنْ ربنا خلق المجرات وبكلمة كُنْ يفنيها، بكلمة كُنْ ربنا خلق عشرين مليون نوع على وجه الأرض من الأنواع الحية، وبكلمة كُنْ يفنيها، بكلمة كُنْ ربنا خلق السحاب وخلاه يمطر وبكلمة كُنْ خلاه يمطر نار على قوم من العصاة.
ربنا ماقالش لحاجة كُنْ مرتين أبدًا، ربنا ماخلقش النملة بكنْ والفيل بخمسة كُنْ والمجرة بمية كُنْ، ربنا -سبحانه وتعالى- بكلمة واحدة خلق الكون كله.
يعني سعادتك وشقاءك في كلمة منه، عزِّك وذلِّك في كلمة منه، حل مشاكل حياتِك أو ابتلائك في كلمة منه، يعني كل أحلامِك في الحياة متعلقة بكلمة واحدة من كلمات ربنا -سبحانه وتعالى-.
في قدرة ربنا كل حاجة زي بعضها يا جماعة، خَلْق البحر زي شَقّ البحر، خَلْق القمر زي شَقّ القمر، في قدرة ربنا خَلْق مريم زي خَلْق عيسى، الله قادر.
علشان كده يا لَبؤس الملحدين، الملحدين بيصعبوا عالواحد يا جماعة وهُمَّ بيحاولوا يحاربوا آيات ربنا، ويحاولوا يحاربوا كلمات الله التي لا تنفد..
يعني بيقولَّك لو جبنا رأس دبوس وحبينا نشوف الذرات اللي فيها كل ذرة معجزة، قالَّك عايزين نكبَّر رأس الدبوس بحيث إنها تبقى قد الكرة الأرضية ساعتها الذرة هتبقى قد كرة القدم مش هنعرف نشوف النواة بتاعتها، قالَّك كبَّر بقى كرة القدم تبقى قد ملعب الكرة ساعتها نواة الذرة هتبقى قد ذرة التراب، قالَّك لو الفراغات اللي بين الذرات اتشالت حجم الكرة الأرضية بالقارات بالبشر هيبقى أقل من عقلة الإصبع، تسعة من عشرة سنتيمتر مكعب..
احنا يا إخوانَّا إحنا مين؟ مين اللي بيعترض على ربنا؟ مين اللي بيُجادل في آيات ربنا، مين اللي بيدِّي ضهره لربنا، مين بيصالح مين؟ كل حاجة في خَلْق ربنا معجزة، مانفدت كلمات القدرة.
الله -سبحانه وتعالى- لما قدرة الله دخلت في قلب إبراهيم وقف في وِشّ النمرود وما خافش، لما اليقين بقدرة الله دخل في قلب سيدنا يونس الحوت فتح بقُّه تمانية متر بلع سيدنا يونس ويونس بيقول يارب وهو مش خايف.
لو عرفنا يعني إيه"مَّا نَفِدَتْ كَلِمَاتُ اللَّهِ" مانفدت كلمات القدرة.
ما نفدت كلمات العلممانفدت كلمات العلم يا جماعة، يعني إيه مانفدت كلمات العلم؟ يعني الكلام بس اللي العلماء قالوه في معاني القرآن والسُّنَّة لو الكتب اللي ألفوها اتفردت على وجه الأرض تغطي وجه الأرض كلها، مانفد علم الله اللي في القرآن والسنة.
جون فريش لما فهم جزء من قَوْل الله: "وَأَوْحَى رَبُّكَ إِلَى النَّحْلِ" النحل:68،إدُّوا له جايزة نوبل، جيمس جيمس لما فهم جزء من قَوْل الله: "ثُمَّ اسْتَوَى إِلَى السَّمَاء وَهِيَ دُخَانٌ" فصلت:11،بقى من أعظم علماء الفلك في التاريخ، هابل لما فهم جزء من قَوْل الله -سبحانه وتعالى-: "وَالسَّمَاء بَنَيْنَاهَا بِأَيْدٍ وَإِنَّا لَمُوسِعُونَ" الذاريات:47، إدُّوا له نوبل ولحد دلوقتي من أعظم علماء التاريخ، مانفدت كلمات العلم.
ما نفدت كلمات الكرم.. ما نفدت نِعَم اللهما نفدت كلمات الكرم يا جماعة، ما نفدت نِعَم الله، نخاع العضم بتاعِك بيكَوِّن كل لحظة، كل ثانية اتنين ونص مليون كرة دم حمرا، يعني نخاع عضمَك بيكَوِّن في اليوم اتنين مليار كرة دم حمرا، دا نعمة واحدة من نعم ربنا اللي من غيرها كلنا نتخنق ونموت، ومحدش فينا يقدر يعيش، تقدري تشكريه اتنين مليار مرة في اليوم؟
يا إخوانَّا الجنين وهو في بطن أمه ربنا بيديله في مخه ربع مليون خلية كل دقيقة، ربع مليون نعمة كل دقيقة.
مخك فيه مية مليار خلية، يعني بعدد نجوم مجرة التبانة، لو الخلايا دي اتربطت ببعض توصل من الأرض للقمر، لو الخلايا دي اتفردت تلفّ حوالين الكرة الأرضية أربعين مرة..
عدد الاتصالات ما بين خلايا مخك وانت قاعد قدامي دلوقتي مية ترليون اتصال في الثانية الواحدة يعني أكتر من عدد الاتصالات اللي بين البشرية كلها على وجه الأرض.
ذاكرة المخ بتاعك بس بتستوعب كل يوم نص مليون صورة جديدة، لو اتحمل المعلومات اللي في الذاكرة بتاعتك عايزة ألفين مجلد، عدد المعلومات اللي الذاكرة بتاعتِك تقدر تستوعبها بعدد ذرات الوجود كله اللي ربنا خلقها، بعدد ذرات الكون كله.
وبعد كده الإنسان ممكن يثق في أبوه، ممكن يثق في لواء، ممكن يثق في حد غني ومايثقش في ربنا، ومايُقبِلْش على ربنا.
ما نفدت كلمات الرحمة"مَّا نَفِدَتْ كَلِمَاتُ اللَّهِ" مانفدت كلمات الرحمة يا جماعة، كلمات الرحمة وسايل ربنا لإسعادِك لا حدود لها، وسايل ربنا لحل المشكلة اللي مانيِّمتكش امبارح بالليل لاحدود لها، وسايل ربنا لنصرتك يا مظلوم، وسايل ربنا لنصرة الدعوة، وسايل ربنا لإهلاك الظالمين، وسائل إنفاذ الله لمشيئته لاحدود لها.
الرحمة، إنت علشان ابنك يبقى وزير محتاج تدخَّله كلية اقتصاد وعلوم سياسية وإنت عارف سكة تلاتين أربعين سنة
على ماممكن يبقى قُنصل ولّا.. وفي الآخر ممكن يبقى وزير، لما ربنا أراد إن يوسف يبقى وزير خلَّاه وزير إزاي؟ ربنا وسائل إنفاذ مشيئته لاحدود لها يا جماعة.
مانفدت كلمات الرحمة، رحمة الله، علشان كده مفيش مرض مستعصي على الطب في الدنيا كلها إلا وحصل إن فيه حد راق منه بدون أسباب، كإن ربنا بيقول للدنيا كلها الأمراض اللي مستعصية عليكم الأمراض اللي ملهاش حل عندكم في قدرتي أنا ما نفدت كلمات الله ورحمة الله وقدرة الله على إنه يعالجها.
ما نفدت كلمات النعيم في الجنةمانفدت ياجماعة كلمات النعيم في الجنة، لو جبنا حبر الدنيا كله، حبر البحار كله، وجبنا أشجار الدنيا كلها عملناها أقلام، وكتبنا بيها وسائل إمتاع المؤمنين في الجنة، وكتبنا بيها وسائل النعيم في الجنة سينفد الحبر وتنكسر الأقلام ولن نحيط بالوسائل اللي ربنا أعدها لك علشان يمتَّعك في الجنة.
تعالوا ناخد شجرة واحدة بس في الجنة، شجرة واحدة الثمرة الواحدة في الجنة العلماء بيقولوا بتتفتق عن سبعين نوع من أنواع الطعم، سبعين نوع من أنواع الطعم، ربنا بيقول: "وَأُتُواْ بِهِ مُتَشَابِهاً" البقرة:25، مفيش ثمرة في الجنة طعم ثمرة تانية، رغم إن كل ثمرة سبعين طعم في الثمرة الواحدة..
مفيش طير في الجنة الألحان اللي طالعة من حنجرته زي الطير التاني، مفيش فرع شجرة في الجنة الألحان اللي بيعملها مع نسيم الجنة زي الفرع التاني، مفيش ورقة شجر في الجنة شبه الورقة التانية "ذَوَاتَا أَفْنَانٍ" الرحمن:48، مفيش ورقة شجر في الجنة شبه الورقة التانية، ولون الورقة التانية.
يا جماعة "مَّا نَفِدَتْ كَلِمَاتُ اللَّهِ" القصور مفيش قصر في الجنة تصميمه زي القصر التاني، علشان كده العلماء قالوا إن أول رحلة بيقطعها المؤمن في الجنة "وَتِلْكَ الْجَنَّةُ" الزخرف:72، الملايكة بتقعد معاه ألف سنة تفرِّجُه على نعيمه في الجنة المتجدد ولا ينتهي نعيمه في الجنة.
مانفدت كلمات الله في خلق الإنسان"مَّا نَفِدَتْ كَلِمَاتُ اللَّهِ" في مخلوق واحد، عارفين يا جماعة أنا كان نفسي أصور الحلقة دي بالذات في مكتبة كلية الطب، كنت أتمنى أصورها في مكتبة كلية الطب علشان أوريكم يا إخوانَّا آلاف مؤلَّفة من المجلدات والمراجع العلمية كلها بتتكلم في مخلوق واحد بس، كلها بتتكلم في كلمات الله في بني آدم واحد، فيكِ وإنتِ قاعدة قدامي دلوقتي، في جسمَك وإنت قاعد قدامي دلوقتي..
رأس النحلة اللي جون فريش خاد فيها جايزة نوبل لما اكتشف إن النحلة بتعرف طريق الأزهار من خلال نور الشمس حتى لو السحاب عَمَّى على الشمس بتعرف تشوفها، ياترى فيها كام آية؟ ياترى فيها كام كلمة من كلمات الله -سبحانه وتعالى-؟
يُتَّبَع
تعليق