Tweet
تعالوا نشوف القصة دي اللي هي مش قصتي
ونكلم في آخر الموضوع
احب انقل لكم تجربتي مع اولادي وانصحكم نصيحه لوجه الله ...
انا أم لبنت وولد , البنت 6 سنوات والولد 4 سنين , وكنت في أول عمرهم عصيبه جداااااااااا وصارمه جدااااااااااا واشخط وازعق واعاقب وأذنب وكنت افتكر ان كده صح وان انا كده ناصحه بقى وان هو ده الأدب اللي بصحيح ....
لكن اكتشفت ان كل اللي بعمله ده غلط في غلط , واني بضيع اجمل سنوات عمري مع أولادي في الشخط والزعيق لغايه الولاد ما اتخنقو مني ...
هو انا ليه مش بتكلم معاهم ؟؟؟ ليه مش بنلعب سوا ؟؟؟ ليه مش بحضنهم واستمتع بامومتي ؟؟ مستنيه ايه ؟؟؟ يروحو يدورو على حضن احن من حضني يترمو فيه ؟؟؟غلطاااااااااااااااااااااااااااااااااااانه
انا دلوقتي غيرت سياستي معاهم تماما ... بقيت صبوره جداااااااااا وأتكلم معاهم وأحضنهم ونتكلم بالراحه ... تصدقو ان انا اللي كنت السبب في عصبيتهم !!!!
هيجيبو الهدوء منين اذا كانت أمهم بتصرخ في وشهم ؟؟
انا كنت لما ألاقيهم بيتعصبوا ويصوتوا على لعبه أو بيضربوا بعض كنت اقوم آكلهم وأعاقبهم وأضربهم لكن دلوقتي لما
ألاقيهم بياكلو في نفسهم ومتعصبين وبيعيطو باخدهم في حضني واطبطب عليهم ونتكلم بهدوووووووووء ,
تصدقو انهم بيهدو على طول وبيسمعوا الكلام ومش بيجادلوا زي الاول ومش بيعندوا خلاص !!!!!! انا كنت السبب في كل ده من غير ما اعرف , ربنا يسامحني
انا بقيت صاحبتهم وحنينه عليهم جدااااااااااا واخدهم في حضني كتير وأبوسهم ولما يعملوا حاجه غلط اوجههم بهدوء وبحب واقولهم مش حنعمل كده تاني يا حبيب ماما ؟؟ يقولولي خلاص يا ماما
وهم بقو مندهشين وفرحانين بماما الحلوة اللي معادتش بزعق وتصرخ في وشهم
الطفل عنده كرامة لازم احافظله عليها ولازم ما اكسرهوش واحترم شخصيته وانميها
تصدقو ان ولادي بقو هاديين وبيسمعو الكلام وبيذاكرو دلوقتي من غير ما اقول !!! سبحان مغير الاحوال
وعلى فكرة انا دعيت كتيييييييير اوي عشان ابقى هاديه وصبوره مع اولادي وانزل لمستوى عقلهم وتفكيرهم ,
لقيتهم بجد رائعين وعندهم براءه انا مكنتش واخده بالي منها , بس الحمد لله ان أنا تداركت الموقف واقدر إني اعوض السنين اللي فاتت واشبعهم حب وحنيه وتفاهم وكلام واستماع وكل حاجه حرمتهم منها ان شاء الله ...
وبنصح كل أم بالله عليكي خدي ابنك في حضنك وشبعيه حب وحنان ولما يعمل حاجه غلط خديه في حضنك وبوسيه وبعدين وجهيه حيسمع كلامك في ثانيه واحده وابتعدي عن التوبيخ والشتيمة والزعيق والإهانه , ولادنا لازم نحترمهم ونحتضنهم قبل ما يضيعو مننا علشان ييجو يحكولنا على كل حاجه وميروحوش لحد تاني يحكوله ..
آسفه على الاطاله بس انا قلت لازم افيدكم وانقل لكم حكايتي وتجربتي
ادعولي ربنا يغفرلي ويسامحني
والسلام عليكم ورحمة الله وبركاته
-------------
القصة السابقة منقولة وليست أنا صاحبة القصة
لكن , بالفعل لاحظت هذا الموضوع مع ابني 3 سنوات فعلا ً لما بحتضنه وبعامله بلطف بيتغير لكن , لما أعاقب بيزيد عنده وتزيد عصبيته وإيه يعني تضربيني
لأ وييجي يضربني هو كمان
لو ضربته على ايده ... يضربني على ايدي
أقوله خلاص هتتعاقب وتعد في مكان لواحدك ... أو احطه في اوضه لواحده "بس طبعا منوره وفيها لعب مش عقاب يعني احطه في اوضه ضلمة واربي جواه خوف ورعب إحنا بنعاقب مش بنعذب " ... لقيته حب الموضوع وخلاص معدش فارق معاه
احنا لو تعلمنا اننا نضرب ولادنا على كل كبيرة وصغيره الضرب والزعيق خلاص مش فارق
لكن , لما احتضنه دايما وأحبه ونكلم بهدوء ومتقوليش هو صغير ومش فاهمك ... لأ هما بيفهموا وبيستعبوا ... يكفي إنه هيفهم حبك وحنانك واسلوبك الحنين معاه
يوم ما تتعلمي إنك تصاحبي ولادك وتحضنيه كل شوية وتقوليله انت حبيبي
وتقوليله إن إحنا اصحاب وإحنا بنحب بعض وتمسكي في ايده زي الأصحاب وتاخديه معاك
والضرب يقل خالص ويكاد يكون مش موجود
يوم ما تزعلي منه هتكون كبيرة أوي عليه
وهتأثر فيه جدا ً
يوم ما تضربيه ضرب خفيفة جدا ً على ايده .... الموضوع بالنسباله هيكون كبير أوي وهيحس بفرق إنه غلط وعمل حاجة ... مش ضرب عمال على بطال وعلى كل كبيرة وصغيرة
أمال إيه فايدة ضربك أصلا
لازم نفرق بين الكبيرة والصغيرة
مش إننا وصلنا بولادنا إن إيه يعني ضرب وإيه يعني زعيق وتزعقي مش فارق وتضربي مش فارق ومعتيش عارفة تعملي ايه معاهم
ولادنا أمانة ياريت نخلي بالنا منهم
لأنهم غالين جدا جدا علينا
تعليق